وبلىس اكىمىنىڭ ورىنباسارى, قازاقستان رەسپۋبليكاسى پرەزيدەنتىنىڭ «بايقوڭىر» كەشەنىندەگى ارناۋلى وكىلى قايرات نۇرتاي جىل توعىسىنداعى قۋانىشقا جيىلعان تۇرعىنداردى قۇتتىقتاپ, وڭىردەگى جەتىستىكتەرگە توقتالدى.
– جىل مارەسىندەگى جاڭا عيماراتتار – تىنىمسىز ەڭبەكتىڭ ناتيجەسى. 2024 جىلى وبلىستاعى دەنساۋلىق ساقتاۋ سالاسىنىڭ بيۋدجەتى 146 ملرد 200 ملن تەڭگەگە جەتىپ, «اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا ءوڭىرىمىزدىڭ بارلىق اۋدانىندا قۇنى 10 ملرد 200 ملن تەڭگە بولاتىن 27 مەديتسينالىق نىسان سالىنۋى جوسپارلانعان بولاتىن. 16 دارىگەرلىك امبۋلاتوريا پايدالانۋعا بەرىلدى. قالعان 11 نىساننىڭ قۇرىلىسى دا اياقتالىپ كەلەدى.
وتكەن جىلى ءبىلىم سالاسىنا بولىنگەن قارجى 264 ملرد تەڭگەگە جەتىپ, الدىڭعى جىلمەن سالىستىرعاندا 9,3 پايىزعا ارتتى. ء«بىلىمدى قولداۋ قورىنىڭ» قارجىسىنا قىزىلوردا قالاسىندا فيزيكا-ماتەماتيكا مەكتەپ-ينتەرناتى, 10 ملرد 900 ملن تەڭگەگە «يننوۆاتسيالىق-شىعارماشىلىق ورتالىعى», «ساۋتس ويل» كومپانياسىنىڭ دەمەۋشىلىگىمەن قۇنى 4 ملرد 800 ملن تەڭگە بولاتىن مۋزىكالىق كوللەدجدىڭ جاڭا عيماراتى بوي كوتەرىپ كەلەدى. بۇلار بيىلعى جىلى پايدالانۋعا بەرىلەدى.
قازان ايىندا وڭىردە ەل پرەزيدەنتىنىڭ باستاماسىمەن قولعا الىنعان «جايلى مەكتەپ» ۇلتتىق جوباسىمەن سالىنعان 900 ورىندىق ءبىلىم ورداسى تابىستالدى. بۇل – ەلىمىزدەگى ۇلتتىق جوبا شەڭبەرىندە پايدالانۋعا بەرىلگەن مەكتەپتەردىڭ العاشقىلارىنىڭ ءبىرى. بۇگىندە جالپى 6 000 ورىنعا لايىقتالعان وسىنداي 9 ءبىلىم وشاعى سالىنىپ جاتىر. وڭىردە الەۋمەتتىك سالاداعى اۋقىمدى جۇمىستار جالعاسىن تابادى, – دەدى قايرات نۇرتاي.
مەكتەپ-ينتەرنەت جانىنداعى قوسىمشا عيماراتتا ويىن زالى, مۇعالىمدەرگە, ۇل-قىزدارعا ارنالعان بولەك بولمەلەر, جۋىنۋ بولمەلەرى مەن سپورتتىق قۇرال-جابدىق قوياتىن ورىن قاراستىرىلعان.
اۋدان ورتالىعىنان شالعايدا جاتقان قۋاڭداريا اۋىلىنداعى فەلدشەرلىك-اكۋشەرلىك پۋنكت قۇرىلىسى ماۋسىم ايىندا باستالىپ, جاڭا جىل قارساڭىندا اياقتالدى. وندا تۇرعىندارعا مەديتسينالىق قىزمەت كورسەتۋگە ارنالعان ارنايى كابينەتتەر جابدىقتالىپ, شەت اۋىلداعى اعايىن اۋىرا قالسا جانىنا شيپا بولاتىن بارلىق جاعداي جاسالعان.
قىزىلوردا وبلىسى,
قارماقشى اۋدانى
