سۋرەتتى تۇسىرگەن – ەرلان ومار, «EQ»
مۇندا الەۋمەتتىك جەلى مەن ەل اراسىندا ايتىلىپ قالاتىن ءبىراز قاڭقۋ سوزگە نۇكتە قويىلعان. راس, پرەزيدەنتىمىزدىڭ بۇۇ دەڭگەيىندە بەدەلى بار. مۇنى قىزعاناتىندار دا از ەمەس. قىم-قۋىت كەزەڭدە الەمدىك ديپلوماتياعا ءىزاشار باستامالارى ونەگە بولىپ وتىر. دەگەنمەن بىزگە بىرلىك پەن ساقتىق قاتار قاجەت.
الاڭداۋىمىزدىڭ ءبىر سەبەبى: ول ۇرلىق-قارلىققا قارسى بىتىسپەس ايقاس جاريالادى. «بالتالىمەن الىسساڭ دا, قالتالىمەن الىسپا!» دەگەن. ميللياردتارىن بەرىپ قويىپ قالتالىلار تەك جاتپاسى بەلگىلى. كەشەگى قاڭتار سونى كورسەتتى. ول تۋرالى سۇحباتتا دا جاقسى ايتىلعان. قاڭتاردا شىنجىر بالاق, شۇبار توستەر اشقۇرساق كوپشىلىكتى العا سالىپ, مەملەكەتتىك توڭكەرىس جاساۋعا ءبىر-اق قادام قالعان ەدى.
پرەزيدەنت 2022 جىلعا دەيىن ەلىمىزدە قوس وكىمەت قالىپتاسا باستاعانى تۋرالى اۋىر دا بولسا اششى شىندىقتى ايتقان. سۇراقتى توتەسىنەن قويا بىلگەن جۋرناليست ەرلان ءجۇنىس جارادى. «مەملەكەت باسشىسى سىرتقى ساياساتپەن تىم قاتتى شۇعىلدانىپ كەتىپ, ىشكى ساياساتتى قالتارىستا قالدىرعان جوق پا؟» دەگەن كوپشىلىكتىڭ ويىنا پرەزيدەنت ءدوپ جاۋاپ بەردى. ىشكى ساياسات تا – ول كىسىنىڭ ءجىتى قاراپ وتىرعان وزەكتى ماسەلەسى. باق-تىڭ مالىمەتى بويىنشا بىزدەگى الەۋمەتتىك از قامتىلعاندار سانى ءالى دە 2 ميلليونداي كورىنەدى. قاڭتار ءتارىزدى وقيعانىڭ قاي ەلدە بولسىن قايتالانۋى مۇمكىن ەكەنىن سۇحباتتا پرەزيدەنتتىڭ ءوزى دە ايتتى. ال قاندى قاڭتاردىڭ ەلىمىزدە بۇرق ەتە ءتۇسۋى پيعىلى جامان ارانداتۋشى توپتىڭ ارەكەتى ەكەنى تاعى بەلگىلى. وتىز جىلعا سوزىلعان ادىلەتسىزدىك سالدارىن بۇگىنگى بيلىك بىرەر جىلدا جويا سالۋى مۇمكىن ەمەس. ول ءۇشىن كۇللى قوعامدى وزگەرتۋ كەرەك. ادامدى وزگەرتۋ كەرەك. بۇل وڭاي شارۋا ەمەس. پرەزيدەنت – جالعىز, ءبىز – كوپپىز. كوپتى وزگەرتۋگە كوپ ۋاقىت كەرەك. كوپتى وزگەرتۋدىڭ قيىنى – ءبىز قۇدايدى مانسۇقتاعان قوعامنان شىقتىق. قۇدايسىز قوعام قىلمىستان قورىقپايدى. قىلمىستى قۇرىقتاۋدىڭ قيىنى سودان. ويتكەنى اللاعا ەمەس, اقشاعا تابىنىپ كەتتىك. ەندەشە, كەدەرگىلەردىڭ ۇلكەنى ىشكى ساياساتتا. پرەزيدەنت سۇحباتى – سول كەرى كەتكەن كەدەرگىلەردى جەڭۋگە حالىقتى شاقىرۋ دەپ بىلەمىز.
سماعۇل ەلۋباي,
قازاقستاننىڭ حالىق جازۋشىسى
