سۋرەت: 365info.kz
ءماجىلىس دەپۋتاتى, «Amanat» پارتياسى فراكتسياسىنىڭ مۇشەسى ناتاليا دەمەنتەۆا اقمولا وبلىسىندا ساپارمەن ءجۇر. حالىقپەن كەزدەسۋىن ول ارشالى اۋدانى انار اۋىلىنداعى اناركول بوگەتىنىڭ كوكتەمگى سۋ تاسقىنىنا دايىندىعىن باقىلاۋدان باستادى. ويتكەنى وتكەن عاسىردىڭ ورتاسىندا سالىنعان اۋىل مەن كول اراسىنداعى ۇزىندىعى 1 300 مەتردى قۇرايتىن بوگەت ابدەن ەسكىرگەن. ونىڭ ۇستىنە اۋىل تۇرعىندارىن تاسقىن سۋدان قورعاۋعا قاۋقارسىز ەدى. وسىعان بايلانىستى بىلتىر قايتا جاڭعىرتۋ جۇمىسى باستالىپ, بۇگىنگە دەيىن اينالما كانالدىڭ ءبىر بولىگى تازارتىلىپتى. بوگەت قابىرعاسى نىعايتىلىپ, 6 مەترگە دەيىن كەڭەيتىلگەن.
«مەملەكەت باسشىسى قاسىم-جومارت توقاەۆ جۋىردا «Ana tili» گازەتىنە بەرگەن سۇحباتىندا اتاپ وتكەندەي, بىلتىر جويقىن سۋ تاسقىنى بولدى. زارداپ شەككەندەر قاتارىندا ارشالى اۋدانى دا بار. سوندىقتان الداعى كوكتەمگە دايىن بولۋىمىز كەرەك. ماجىلىستە جاڭا سۋ كودەكسىنىڭ جوباسى قارالىپ جاتىر. مەملەكەت 2030 جىلعا دەيىن 40-تان اسا جاڭا سۋ قويماسىن سالۋ جانە ەل اۋماعىندا جۇمىس ىستەپ تۇرعان 37 سۋ قويماسىن جوندەۋ باعىتىندا جۇمىس جۇرگىزىپ جاتىر», دەدى ن.دەمەنتەۆا.
ال باتىس قازاقستان وبلىسىنا جۇمىس ساپارى بارىسىندا ءماجىلىس دەپۋتاتى, جالپىۇلتتىق سوتسيال-دەموكراتيالىق پارتياسى فراكتسياسىنىڭ توراعاسى اسحات راقىمجانوۆ «جايىقتەپلوەنەرگو» اق جىلۋ ەلەكتر ورتالىعىنىڭ ۇجىمىمەن كەزدەستى. بۇگىندە شاھاردى جىلۋ جانە ىستىق سۋمەن قامتاماسىز ەتىپ وتىرعان مەكەمەنىڭ 88 پايىزى توزعان. سوندىقتان رەكونسترۋكتسيا جۇمىستارى جۇرگىزىلىپ جاتىر. مىسالى, ءبىرىنشى تۋربو اگرەگاتتى اۋىستىرۋ بەس جىل بۇرىن باستالىپ, 2025 جىلدىڭ ناۋرىز ايىندا ىسكە قوسۋ جوسپارلانعان.
«مۇنداعى وزەكتى ماسەلە – جابدىقتاردىڭ قىمباتتىعى. دەلدالدار ارقىلى ساتىپ الاتىن بولعاندىقتان, تاريفكە دە اسەر ەتۋى مۇمكىن. جۇمىسشىلاردىڭ ايتۋىنشا, ورتاشا جالاقى 200 مىڭ تەڭگەنىڭ اينالاسىندا, سالدارىنان جاستاردىڭ مۇندا جۇمىس ىستەۋگە دەگەن قىزىعۋشىلىعى تومەن», دەدى ا.راقىمجانوۆ.
ءماجىلىس دەپۋتاتتارى جۇلدىز سۇلەيمەنوۆا مەن قازىبەك الىشەۆ اقتوبە وبلىسىنداعى اعايىنمەن جۇزدەسىپ, «اmاnاt» پارتياسىنىڭ سايلاۋالدى باعدارلاماسى اياسىندا سالىنعان بالالار فۋتبول اكادەمياسىن كورىپ قايتتى. اڭگىمە بارىسىندا ماجىلىسمەندەر مەملەكەت باسشىسى قاسىم-جومارت توقاەۆ جولداۋىندا دەپۋتاتتارعا سپورت سالاسىنداعى زاڭنامانى جاڭارتۋدى تاپسىرعانىن ەسكە سالدى. پرەزيدەنت ءوز سوزىندە بۇل تۇزەتۋلەردىڭ جاڭا چەمپيوندار بۋىنىن دايىنداۋعا نەگىز بولاتىنىن ەرەكشە اتاپ وتكەن ەدى. بىلتىر قاراشا ايىندا ءماجىلىس دەپۋتاتتارى دەنە شىنىقتىرۋ جانە سپورت ماسەلەلەرى تۋرالى زاڭ جوباسىن العاشقى وقىلىمدا ماقۇلداعان.
ءوز كەزەگىندە ءماجىلىس دەپۋتاتى گۇلدارا نۋرۋموۆا بايزاق اۋدانى قىزىل جۇلدىز اۋىلىنداعى جاڭا دارىگەرلىك امبۋلاتوريانىڭ جۇمىسىمەن تانىستى. مۇندا 3 دارىگەر, 13 ورتا مەديتسينا قىزمەتكەرى جانە ءبىر پسيحولوگ جۇمىس ىستەيدى. اتالعان امبۋلاتوريا اۋىلداعى 5 مىڭعا جۋىق تۇرعىنعا قىزمەت كورسەتەدى.
«مەملەكەت دەنساۋلىق ساقتاۋ سالاسىنا ۇنەمى ەرەكشە كوڭىل بولەدى. بيىل دارىگەرلەردى قورعاۋعا, ولاردىڭ مارتەبەسىن كوتەرۋگە باعىتتالعان ساپالى جاڭا زاڭ كۇشىنە ەندى. بىرقاتار الەۋمەتتىك كەپىلدىك ەنگىزىلىپ, قۇقىقتىق قورعاۋ كۇشەيتىلدى. اتاپ ايتقاندا, مەكتەپكە دەيىنگى ۇيىمداردا مەديتسينا قىزمەتكەرلەرىنىڭ بالالارىنا ءبىرىنشى كەزەكتە ورىن بەرىلەدى, باسى ارتىق ەسەپ بەرۋ ماسەلەسى قىسقارتىلادى, دارىگەرلەردىڭ كاسىبي جاۋاپكەرشىلىگى ساقتاندىرىلادى جانە باسقا دا وزگەرىستەر بار», دەدى دەپۋتات.
پەتروپاۆل قالاسىنداعى بوگەتتى قالپىنا كەلتىرۋ جۇمىستارى دا ءماجىلىس دەپۋتاتتارىنىڭ نازارىنان تىس قالمادى. بىلتىرعى الاپات سۋ تاسقىنى سولتۇستىك قازاقستان حالقىن ءبىراز ابىگەرگە سالعان ەدى. وسىنى ەسكەرىپ, تەرىسكەيلىكتەر بيىل الدىن الا قامدانىپ جاتىر. دەپۋتات ەركەبۇلان مامبەتوۆ پەن دميتري كولودا وڭىرگە ساپارى بارىسىندا ويقالا شاعىن اۋدانىنداعى 1960 جىلى پايدالانۋعا بەرىلگەن بوگەتتىڭ جاي-كۇيىمەن تانىستى. قازىرگى تاڭدا نىسانعا 205 مىڭ توننا ينەرتتى ماتەريال جەتكىزىلگەن. بوگەتتى بەتون پليتالارىمەن نىعايتۋ جۇرگىزىلىپ جاتىر. جوبانىڭ جالپى قۇنى 851 ملن تەڭگەنى قۇرايدى.
بۇدان وزگە ايماقتاردا دا ءماجىلىس دەپۋتاتتارى وندىرىستىك جانە الەۋمەتتىك نىسانداردى ارالاپ, ەڭبەك ۇجىمدارىندا كەزدەسۋلەر وتكىزىپ, ازاماتتاردى جەكە ماسەلەلەرى بويىنشا قابىلداۋدى جالعاستىرادى. سونىمەن قاتار ولار سايلاۋشىلارعا قابىلدانعان زاڭنامالىق وزگەرىستەر تۋرالى اقپارات بەرىپ, ماسەلەلەرىن تىڭدايدى.
