فوتو: el.kz
«بيىلعى مەملەكەتتىك ءىس-شارالاردىڭ ىشىندە ۇلى جەڭىستىڭ 80 جىلدىعى ەرەكشە ورىن الادى. قازاقستاندىقتار ءناتسيزمدى تالقانداۋعا ەلەۋلى ۇلەس قوستى. ءبىزدىڭ اتالارىمىز بەن اكەلەرىمىز بارلىق مايداندا جانقيارلىقپەن سوعىستى. ونىڭ ۇستىنە, قازاقستان اسكەردى قارۋ-جاراقپەن, ونەركاسىپ ونىمدەرىمەن جانە ازىق-ت ۇلىكپەن قامتاماسىز ەتۋ ىسىندە ماڭىزدى ءرول اتقارعان سەنىمدى تىل بولدى.
مەن ۇلتتىق قۇرىلتايدىڭ اتىراۋداعى وتىرىسىندا جەڭىستىڭ مەرەيلى بەلەسىن اتاپ وتۋگە دايىندالۋ قاجەتتىگىن ايتتىم. سول كەزدە جاريالاعان باستامالارىم قازىردىڭ وزىندە جۇزەگە استى. مىسالى, «ايبىن» وردەنىنىڭ ءۇش دارەجەسى ايگىلى باتىرلارىمىز ساعادات نۇرماعامبەتوۆتىڭ, باۋىرجان مومىش ۇلىنىڭ جانە راقىمجان قوشقارباەۆتىڭ ەسىمىمەن اتالاتىن بولدى. قازاقستاننىڭ اۋە قورعانىسى كۇشتەرىنىڭ 604-ءشى اۋە بازاسىنا ايگىلى ۇشقىش, كەڭەس وداعىنىڭ ەكى مارتە باتىرى سەرگەي لۋگانسكيدىڭ ەسىمى بەرىلدى. ءاليا مولداعۇلوۆانىڭ, مانشۇك مامەتوۆا مەن حيۋاز دوسپانوۆانىڭ ءوشپەس ەرلىگىن مىندەتتى تۇردە جادىمىزدا جاڭعىرتامىز», دەدى قاسىم-جومارت توقاەۆ.
جەڭىستى مەرەكەلەۋ ءۇشىن ەلىمىزدە ءبىرشاما ءىس-شارالار وتكىزۋ جوسپارلانىپ وتىر. پرەزيدەنت وسىنىڭ ىشىندە ەڭ ماڭىزدىسى - اسكەري شەرۋ ەكەنىن اتاپ ءوتتى.
ء«ىس-شارالاردىڭ ەڭ باستىسى – استانادا وتەتىن اسكەري شەرۋ. سوعىس جانە تىل ارداگەرلەرىنە قۇرمەت كورسەتىلەدى, ەشكىم دە ەلەۋسىز قالمايدى. كونتسەرتتەر مەن كورمەلەر وتەدى, دەرەكتى فيلمدەر مەن باعدارلامالار تۇسىرىلەدى, تاريحي كىتاپتار مەن فوتوالبومدار شىعارىلادى. جاۋىنگەرلەرىمىزدىڭ ەسىمىن ەل جادىندا ساقتاۋ ءۇشىن زەرتتەۋ جۇمىستارى جالعاسا بەرەدى. ب.مومىش ۇلىنىڭ – 115, م.عابدۋلليننىڭ – 110, ءا.مولداعۇلوۆانىڭ 100 جىلدىعى سالتاناتتى ءىس-شارالار تىزىمىنە كىرەدى.
جەڭىستىڭ بيىلعى مەرەكەسى قازاقستاننىڭ بىردە-ءبىر ازاماتىن بەي-جاي قالدىرمايتىنىنا سەنىمدىمىن. ويتكەنى ءبىزدىڭ ەلدە سۇراپىل سوعىستىڭ زاردابىن تارتپاعان وتباسى جوق دەۋگە بولادى. سوعىستا قازا تاپقانداردى ۇمىتپاي, قاھارمان ەرلەرىمىزدىڭ رۋحىنا تاعزىم ەتۋ, ەل ىشىندە بەيبىتشىلىك پەن تىنىشتىقتى ساقتاۋ – بارشاعا ورتاق پارىزىمىز», دەدى پرەزيدەنت.
