بىرلىك, تاتۋلىق جانە ىنتىماق – ەلدىگىمىزدىڭ مىزعىماس تۇعىرى ءھام مەملەكەتىمىزدىڭ باستى قۇندىلىعى. قازاقستان حالقى اسسامبلەياسى مىنە, وسى يدەولوگيانى سەنىممەن, جۇيەلى جۇزەگە اسىرىپ كەلەدى. مەملەكەت باسشىسى قاسىم-جومارت توقاەۆ تا بىلتىر اتالعان ۇيىمنىڭ «بىرلىك. جاسامپازدىق. ورلەۋ» اتتى ءحححىىى سەسسياسىندا بارشا حالقىمىزدىڭ ستراتەگيالىق باعدارىنىڭ تۇپكى ءمانىن وسى ءۇش ۇعىم ءدال ءارى ناقتى بىلدىرەتىنىن, ەل ساياساتىنىڭ بۇلجىماس باعدارى بولىپ قالا بەرەتىنىن ايتتى.
«اسسامبلەيا – ەل بىرلىگىن ءىس جۇزىندە ورنىقتىرا تۇسەتىن ءتيىمدى قۇرىلىم. بۇگىندە بۇل – كونستيتۋتسيالىق مارتەبەسى بار ماڭىزدى قوعامدىق ورگان. اسسامبلەيا وتە اۋقىمدى قايىرىمدىلىق شارالارىن دەر كەزىندە جانە جەدەل ۇيىمداستىرىپ كەلەدى. مۇنىڭ ءبارى كوپ جىلدىق جۇيەلى جۇمىستىڭ ناتيجەسى ەكەنى ءسوزسىز.
اسسامبلەيا مۇشەلەرى «قايىرىمدىلىق كەرۋەنى» جوباسى ارقىلى مۇقتاج جاندارعا ۇنەمى قولداۋ كورسەتىپ ءجۇر. بىلتىردىڭ وزىندە قۇنى 1,7 ميلليارد تەڭگەدەن اساتىن كومەك بەرىلدى. بىرلىگى مىقتى حالىقتىڭ كۇش-قۋاتى ازاماتتاردىڭ ءبىر-بىرىنە دەگەن وسىنداي قامقورلىعىنان ايقىن كورىنەدى», دەي كەلە پرەزيدەنت ءسوز اراسىندا بۇل قۇرىلىم ءوزىن ەتنوسارالىق كەلىسىم مەن جالپىۇلتتىق بىرلىكتى نىعايتۋ جولىندا سىندارلى ساياسات جۇرگىزە الاتىن ءتيىمدى قۇرال رەتىندە تانىتقانىن باسا اتاپ ءوتتى.
اسىرەسە كوكتەمگى سۋ تاسقىنى كەزىندەگى اسسامبلەيانىڭ بەلسەندى ءارى ۇيلەسىمدى جۇمىسى ءوزارا جاناشىر, تىلەۋلەس بولۋدىڭ ماڭىزىن ايقىنداي ءتۇستى.
– قحا-نىڭ حالىقتىڭ ءارتۇرلى توپتارىن قولداۋ بويىنشا اۋقىمدى رەسپۋبليكالىق اكتسيالاردى ۇيىمداستىرۋ تاجىريبەسى بار. اسسامبلەيا مۇشەلەرى مەن ەتنومادەني بىرلەستىكتەردىڭ وكىلدەرى كومەك پەن قاراجات جيناۋعا ءوز بەتىنشە اتسالىستى, سۋ تاسقىنى ايماقتارىنان حالىقتى حاباردار ەتۋگە جانە ەۆاكۋاتسيالاۋعا فيزيكالىق كومەك كورسەتتى. جالپى, قازاقستان حالقى اسسامبلەياسى ءوزىن ەكى جاعىنان كورسەتتى: بىرىنشىدەن, ۇيىمشىلدىق پەن ينستيتۋتسيونالدىق جادىنىڭ جوعارى دەڭگەيى تەز ارەكەت ەتە الاتىن قولشاتىر ينستيتۋت رەتىندە, ال ەكىنشىدەن, اينالاسىندا قازاقستاندىقتار شوعىرلاناتىن, قوعامنىڭ ىرگەلى قاعيدالارى رەتىندە بىرلىك پەن ءوزارا كومەك قۇندىلىقتارىن ۇستاناتىن ينستيتۋت رەتىندە تاعى دا تانىلا ءبىلدى, – دەدى پرەزيدەنت جانىنداعى قسزي وڭىرلەرمەن جۇمىس جونىندەگى ءبولىم باسشىسى ءامينا ۇرپەكوۆا.
بۇگىندە اسسامبلەيانىڭ ينستيتۋتسيونالدىق الەۋەتى نىعايىپ, ۇيىم جەتەكشىلەرى مەملەكەتتىك شەشىم قابىلداۋ ۇدەرىسىنە جانە رەفورمالاردى ىلگەرىلەتۋگە بەلسەنە ارالاسا باستادى. بۇل ءبىر جاعىنان قحا-نىڭ 30 جىلدا وتكەن ترانسفورماتسياسىنىڭ باستى جەتىستىگى دەۋگە بولادى. مۇنى نەگىزگە العان مەملەكەت باسشىسى اسسامبلەيا قىزمەتىن حالىققا ءتۇسىندىرىپ, ودان ءارى ناسيحاتتاۋعا جانە ازاماتتاردى ەل بىرلىگىن نىعايتۋ جولىنداعى اۋقىمدى جۇمىسقا جۇمىلدىرۋعا ۇتىمدى پايدالانامىز دەگەن ەدى. سونداي-اق ول بىلتىرعى 33 سەسسيادا ۇكىمەتكە مەرەيلى بەلەستى اتاپ وتۋگە ارنالعان ءىس-شارالار جوسپارىن ازىرلەۋدى تاپسىردى.
وسىلايشا ۇكىمەتتىڭ 2024 جىلعى 24 قازانداعى قاۋلىسىمەن «بىرلىك پەن كەلىسىمنىڭ 30 جىلى» قازاقستان حالقى اسسامبلەياسىنىڭ 30 جىلدىعىن ۇيىمداستىرۋ جانە وتكىزۋ جونىندەگى ءىس-شارالار جوسپارى بەكىتىلدى. مەرەكەلەۋ سارىنى كوبىنە رەسمي فورماتتا ۇيىمداستىرىلىپ, ەلدەگى ەتنوسارالىق ىنتىماق پەن اۋىزبىرشىلىكتى ۇيىستىرۋعا باعىتتالدى.
اتاپ ايتقاندا, قحا-نىڭ ءحححىV مەرەكەلىك سەسسياسىن, مەملەكەتتىك جانە قوعامدىق ناگرادالاردى, «مادەنيەتارالىق جانە ەتنوسارالىق بىرلىكتى نىعايتۋ اياسىنداعى مادەنيەت جانە ونەر سالاسىنداعى ۇزدىك جۇمىستارى ءۇشىن» جانە «مادەنيەتارالىق جانە ەتنوسارالىق بىرلىكتى نىعايتۋ بويىنشا ادەبيەت جانە جۋرناليستيكا سالاسىنداعى ۇزدىك جۇمىستارى ءۇشىن» سىيلىقتارىن تابىستاۋ, قحا كەڭەسىنىڭ كەڭەيتىلگەن وتىرىسىن وتكىزۋ, وڭىرلىك جوسپارلاردى ازىرلەۋ جانە ىسكە اسىرۋ, «اسسامبلەيا جاستارى» رقب-نىڭ «بىرلىك پەن ىنتىماقتاستىققا 30 جىل» قايىرىمدىلىق اكتسياسى, «جاستار-Life» جانە «ەلىم مەنىڭ» جوبالارى, «سىر ەلى – دوستىق مەكەنى», «بىرلىك-ەدينستۆو.kz» رەسپۋبليكالىق جاستار فورۋمى, «راقمەت, جەر انا!» ەكولوگيالىق اكتسياسى, فرانتسيانىڭ پاريج قالاسىنداعى يۋنەسكو شتاب-پاتەرىندە قحا قىزمەتىنىڭ تانىستىرىلىمىن ۇيىمداستىرۋ سىندى ءىس-شارالاردى وتكىزۋ كوزدەلگەن. ەل بىرلىگىن ەسەلەپ, ۇيىم بەدەلىن ارتتىرا تۇسەتىن بۇل باستامالار كەمىندە 1,5 ملن ادامدى قامتيدى دەپ جوسپارلانىپ وتىر.
