بۇل كوپتەن كۇتكەن وقيعا «سامۇرىق-قازىنا» قورىنىڭ قولداۋىمەن جۇزەگە استى. ورتالىقتىڭ قىزىل لەنتاسىن «استانا وپەرا» تەاترىنىڭ ديرەكتورى عالىم احمەدياروۆ, «سامۇرىق-قازىنا» اق باسقارما توراعاسى نۇرلان جاقىپوۆ, «Samruk-Kazyna Trust» كق باس ديرەكتورى الفيا اديەۆا قيدى.
اتالعان ورتالىقتى اشۋ جايى ونەر يەلەرى اراسىندا كوپتەن بەرى ماسەلە ەتىپ كوتەرىلىپ جۇرگەن تۇيتكىلدىڭ ءبىرى بولاتىن. سونىڭ ءىس جۇزىندە شەشىلگەنىنە ولار شىن قۋانىشتى. ەندى تەاتر ارتىستەرى مەن تەحنيكالىق ۇجىم فيزيكالىق جۇكتەمەلەر مەن جاراقاتتان كەيىن قالىپقا كەلۋ ءۇشىن مامانداندىرىلعان وڭالتۋ كابينەتىنىڭ كومەگىنە جۇگىنە الادى. سەبەبى تەاتر ونەرى جان-تانىڭمەن بەرىلۋدى تالاپ ەتەدى. ءاربىر سپەكتاكل – ايلار بويعى دايىندىق, كۇش-جىگەر مەن كوبىنەسە كاسىبي جاراقاتتارعا الىپ كەلەتىن فيزيكالىق جۇكتەمە. وسى ۋاقىتقا دەيىن وتاندىق ارتىستەر ءوز كۇشىنە عانا سەنەتىن, بولماسا وقىس جاعدايدا جالپى بەيىندىك ەمحانالارعا جۇگىنەتىن. ەندى وڭالتۋ كابينەتىنىڭ ارقاسىندا كاسىبي كومەك قولجەتىمدى بولا ءتۇستى. كابينەتتىڭ ءىشى بۇلشىق ەتتى قالپىنا كەلتىرۋگە, اۋىرسىنۋدى باسۋعا ءارى ءتۇرلى ەمشارالاردى جۇرگىزۋگە ارنالعان زاماناۋي قۇرالدارمەن جابدىقتالعان. ءدال وسى جەردە ارتىستەردىڭ قالىپتى جۇمىسىنا تەزىرەك ورالۋىنا قالاي كومەكتەسۋدى بىلەتىن رەابيليتولوگ ماماننىڭ دا كەڭەسىن الۋعا بولادى.
ء«بىز ءۇشىن قىزمەتكەرلەردىڭ دەنساۋلىعى ءبىرىنشى كەزەكتە, سەبەبى ولار تەاتردى جاندى, ومىرشەڭ, جىگەرلى ەتەدى, دەپ اتاپ ءوتتى قازاقستاننىڭ ەڭبەك سىڭىرگەن قايراتكەرى, «استانا وپەرا» ديرەكتورى عالىم احمەدياروۆ. – وسىناۋ جوبانىڭ ماڭىزدىلىعىن ءتۇسىنىپ, قولداۋ كورسەتكەنى ءۇشىن «سامۇرىق-قازىنا» قورىنا ريزاشىلىعىمىزدى بىلدىرەمىز. بۇل – تەاترىمىز ءۇشىن عانا ەمەس, ەلىمىزدىڭ تۇتاس تەاتر سالاسى ءۇشىن جاساعان ەلەۋلى قادامى, – دەدى تەاتر باسشىسى.
وڭالتۋ كابينەتىنىڭ اشىلۋى – تەاتر ومىرىندەگى جاڭا كەزەڭنىڭ بەلگىسى. ءوزىنىڭ اۋقىمدى قويىلىمدارى ءھام ترۋپپانىڭ جوعارى كاسىبيلىگىمەن تانىمال «استانا وپەرا» تاعى دا يننوۆاتسيالىق ىزدەنىستىڭ ۇلگىسىنە اينالدى. ەندى تەاتر ارتىستەرى دەنساۋلىقتارىنىڭ سەنىمدى قولدا ەكەنىن بىلگەندىكتەن, بار زەيىندەرىن باستى قۇندىلىق – شىعارماشىلىققا اۋدارا الادى.
