فوتو: sarbaz.kz
قازىردىڭ وزىندە 150 اسكەري قىزمەتشى تۇراقتى ورنالاسقان جەرىنەن قول ۇزبەي بىلىكتىلىكتى ارتتىرۋدىڭ 10 باعىتى بويىنشا ونلاين وقىپ جاتىر. 10 تىڭداۋشى بەلگىلەنگەن ۇلگىدەگى سەرتيفيكات العان.
پلاتفورما قۇرلىق اسكەرلەرىنىڭ اسكەري ينستيتۋتىندا, الماتى قالاسىنىڭ راديوەلەكترونيكا جانە بايلانىس اسكەري-ينجەنەرلىك ينستيتۋتىندا, اقتوبەدەگى اۋە قورعانىسى كۇشتەرىنىڭ اسكەري ينستيتۋتىندا جانە استانا قالاسىنداعى ۇلتتىق قورعانىس ۋنيۆەرسيتەتىندە ورنالاستىرىلعان.
بۇل ءارتۇرلى ەڭبەك فۋنكتسيالارىن ورىندايتىن جەكە مودۋلدەردى, ۋنيۆەرسيتەتارالىق كىتاپحانانى, وقۋ پروتسەسىن جوسپارلاۋ قۇجاتتارىن, ەلەكتروندىق جۋرنالداردى جانە تسيفرلىق ءبىلىم بەرۋ رەسۋرستارىن قامتيدى.
2024 جىلدىڭ 1 قىركۇيەگىنەن باستاپ ەلەكتروندى جۋرنالدار مەن تسيفرلىق ءبىلىم بەرۋ رەسۋرستارىن قولدانا وتىرىپ, ءبىلىم بەرۋ پروتسەسى باستالىپ, بۇل كۋرسانتتاردىڭ ۇلگەرىمىن باقىلاۋدى ەداۋىر جاقسارتتى.
وتكەن جىلى 15000-عا جۋىق زاپاستاعى وفيتسەر مەن سەرجانت اسكەري كافەدرالارعا قابىلداندى.
قورعانىس ءمينيسترى گەنەرال-پولكوۆنيك رۋسلان جاقسىلىقوۆ قارۋلى كۇشتەر ۇسىنعان ولشەمدەردى ەسكەرە وتىرىپ, اسكەري كافەدرالاردا زاپاستاعى وفيتسەرلەر مەن سەرجانتتاردى اسكەري دايارلاۋ باعدارلامالارىن قايتا قاراۋدى تاپسىردى. ولارعا قۇرلىق اسكەرلەرى اسكەري ينستيتۋتىنىڭ تۇلەكتەرى - كۋرسانتتارعا ارنالعان «ساردار» كۋرستارىنا ۇقساس وقۋ جيىندارىن وتكىزۋدى قاراۋ جونىندە نۇسقاۋلار بەرىلگەن.
جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىندا 41 اسكەري كافەدرا جۇمىس ىستەيدى, وندا زاپاستاعى وفيتسەرلەر مەن سەرجانتتار باعدارلامالارى بويىنشا 15 مىڭعا جۋىق ستۋدەنت دايارلانادى. ونىڭ ىشىندە زاپاستاعى وفيتسەرلەردى دايارلاۋ باعدارلامالارى بويىنشا – 6 744 ادام, زاپاستاعى سەرجانتتار – 8 048 ادام. زاپاستاعى وفيتسەرلەردىڭ باعدارلامالارى بويىنشا وقۋدان وتكەن ستۋدەنتتەر قازاقستان رەسپۋبليكاسى ۇكىمەتىنىڭ قاۋلىسىمەن ەكى جىل مەرزىمگە اسكەري قىزمەتكە شاقىرىلادى.
