وتكەن جىلى اسكەري مامانداردى دايارلاۋ ساپاسىن ارتتىرۋ ءۇشىن قورعانىس مينيسترلىگىنىڭ جوعارى وقۋ ورىندارىنداعى وقۋ پروتسەسى قارۋلى كۇشتەردىڭ جاۋىنگەرلىك دايارلىق جوسپارىمەن بىرىكتىرىلدى. كۋرسانتتاردىڭ اسكەري تاعىلىمدامادان ءوتۋ ۋاقىتى ۇزارتىلىپ, بۇل ولاردىڭ پراكتيكالىق تاجىريبە الۋىنا وڭ اسەر ەتتى.
كۇردەلى گەوساياسي جاعدايدى جانە قازىرگى زامانعى قارۋلى قاقتىعىستاردى ەسكەرە وتىرىپ, اسكەري مامانداردى دايارلاۋدىڭ وقۋ جوسپارلارى مەن باعدارلامالارى قايتا قارالدى.
ۇلتتىق قورعانىس ۋنيۆەرسيتەتىندە جۇمىلدىرۋ دايىندىعى فاكۋلتەتى اشىلىپ, وندا جوعارى بىلىكتى وقىتۋشىلار ءتۇرلى مەملەكەتتىك ورگاندارعا ماماندار دايىنداۋدا.
وقۋ پروتسەسىن وڭتايلاندىرۋدىڭ تاعى ءبىر ءساتتى مىسالى رەتىندە راديوەلەكترونيكا جانە بايلانىس اسكەري-ينجەنەرلىك ينستيتۋتىن اتاۋعا بولادى. مۇندا وقۋ مەرزىمى 5 جىلدان 4 جىلعا دەيىن قىسقارىپ, ال وقۋ باعدارلاماسى وزگەرىسسىز قالدى. مۇنداي قادام وقىتۋدىڭ قارقىندىلىعى مەن تيىمدىلىگىن ارتتىرۋعا مۇمكىندىك بەردى.
قۇرلىق اسكەرلەرىنىڭ اسكەري ينستيتۋتىندا ءبىتىرۋشى كۋرسانتتارعا كوشباسشىلىق قاسيەتتەردى دامىتۋعا, نۇسقاۋشى-ادىستەمەلىك داعدىلاردى جەتىلدىرۋگە, بولاشاق وفيتسەرلەردىڭ كاسىبي شەبەرلىگى مەن فيزيكالىق دەڭگەيىن ارتتىرۋعا باعىتتالعان «ساردار» كۋرسى ەنگىزىلدى. بۇل كۋرستىڭ ناتيجەلەرى كۋرسانتتاردىڭ قارۋلى كۇشتەر بولىمشەلەرىنە وفيتسەرلىك لاۋازىمدارعا بولىنۋىنە اسەر ەتەدى.
500 دەن استام اسكەري قىزمەتشى شەتەلدىك اسكەري جوعارى وقۋ ورىندارى مەن وقۋ ورتالىقتارىنا وقۋعا جىبەرىلدى.
ۇجىمدىق قاۋىپسىزدىك تۋرالى شارت ۇيىمىنا مۇشە مەملەكەتتەر ءۇشىن اسكەري كادرلاردى دايارلاۋ تۋرالى كەلىسىم, سونداي-اق ەكىجاقتى حالىقارالىق شارتتار شەڭبەرىندە شەت مەملەكەتتەردىڭ جوعارى وقۋ ورىندارى مەن وقۋ ورتالىقتارىنا 390 اسكەري قىزمەتشى وقۋعا جىبەرىلدى.
ولاردىڭ 139-ى رەسەي فەدەراتسياسىنىڭ اسكەري وقۋ ورىندارىندا ماگيستراتۋرادا, رەزيدەنتۋرادا, اديۋنكتۋرادا جانە باكالاۆرياتتا وقىسا, 37 اسكەري قىزمەتشى تۇركيا رەسپۋبليكاسىنا وقۋعا جىبەرىلدى. 13 – ءى اقش جوعارى وقۋ ورىندارىندا, قالعاندارى بەلارۋس, وزبەكستان, ءۇندىستان, يتاليا, قىتاي جانە كورەيادا باكالاۆريات جانە ماگيستراتۋرا باعدارلامالارى بويىنشا وقيدى.
ەكىجاقتى ىنتىماقتاستىق اياسىندا قازاقستان ارمياسىنىڭ 190 اسكەري قىزمەتشىسى اقش, تۇركيا, يتاليا, پولشا, وزبەكستان, ازەربايجان, قىتاي, كورەيا, پاكىستان جانە ءۇندىستاندا كۋرستىق دايىندىقتان ءوتتى.
ءبىلىم بەرۋ باعدارلاماسى اياسىندا العاش رەت قازاقستان ۇلتتىق قورعانىس ۋنيۆەرسيتەتىنىڭ «قارۋلى كۇشتەر باس شتابى اكادەمياسى» فاكۋلتەتىنىڭ ماگيستراتۋراسىندا كورەيا, يران جانە پاكىستاننان ءتورت اسكەري قىزمەتشى وقۋدان ءوتتى. فرانتسيا مەن ءۇندىستان قارۋلى كۇشتەرىنىڭ ەكى وفيتسەرى وقۋىن جالعاستىرۋدا.
700-دەن استام اسكەري قىزمەتشى مەن ازاماتتىق پەرسونال وتاندىق كاسىپورىنداردا بىلىكتىلىكتى ارتتىرۋ كۋرستارىنان ءوتتى
ۇلتتىق قورعانىس ۋنيۆەرسيتەتىندە 550 اسكەري قىزمەتشى 14 باعىت بويىنشا بىلىكتىلىكتى ارتتىرۋ كۋرستارىن ءبىتىردى.
بۇدان باسقا, 150-دەن استام اسكەري قىزمەتشى مەن ازاماتتىق پەرسونال قىزمەتكەرلەرى «ارلان» جاۋىنگەرلىك ماشينالارىن زەردەلەۋ جانە ولارعا قىزمەت كورسەتۋ, ءدىني ەكسترەميزم مەن تەرروريزمنىڭ الدىن الۋ, ورتتەن قورعاۋ, ۇشۋ كەزىندە ورنيتولوگيالىق قامتاماسىز ەتۋ بويىنشا جانە قورعانىس ونەركاسىبى كاسىپورىندارىندا ارنايى جانە جالپى اسكەري ماقساتتاعى عيماراتتاردى سالۋ جانە پايدالانۋ, اقپاراتتىق جانە كيبەرقاۋىپسىزدىك, رادياتسيالىق قاۋىپسىزدىك بويىنشا وقىتۋدان جانە مەملەكەتتىك ورگاندار مەن وتاندىق ۇيىمداردىڭ بازاسىندا بۋحگالتەرلىك كۋرستاردان ءوتتى.
