فوتولار: كولىك مينيسترلىگى
رەكورد. نەگىزگى 4 اۆتوجول ءدالىزى جانە باسقا جولدار
نەگىزگى 4 اۆتوجول ءدالىزى, اتاپ ايتقاندا, قاراعاندى – الماتى (879 كم), تالدىقورعان – وسكەمەن (768 كم), اقتوبە – قاندىاعاش (96 كم), اتىراۋ – استراحان (212 كم) جوندەلدى.
2024 جىلى 12 مىڭ شاقىرىم جولعا قۇرىلىس پەن جوندەۋ جۇمىستارى جۇرگىزىلدى. بۇل – بۇرىن-سوڭدى بولماعان رەكوردتىق كورسەتكىش. 8 مىڭ شاقىرىم رەسپۋبليكالىق جولدارعا تيەسىلى بولسا, قالعان 4 مىڭ شاقىرىمى جەرگىلىكتى جولدارعا تيەسىلى.
كەلەسى جىلدان باستاپ ءتورت جولاقتى «قاراعاندى-جەزقازعان» جانە «سارىاعاش قالاسىنىڭ اينالما جولى» جوبالارىن باستاۋ كوزدەلگەن. بيىل «قىزىلوردا- جەزقازعان», «اقتوبە-ۇلعايسىن» اۆتوجولىن (بۇلاردا 4 جولاقتى) قايتا جاڭارتۋ جۇمىستارى باستالدى.
تەمىر جولداردى جوندەۋ
بيىل تاسىمالداۋ ساپاسىن ارتتىرۋ ماقساتىندا 1400 شاقىرىمعا جۋىق تەمىر جول جوندەۋدەن ءوتتى. ەلىمىزدىڭ بارلىق وڭىرلەرىن قامتيتىن جۇمىستاردىڭ باسىم بولىگى جاسالعان ۋچاسكەلەر:
اقتوعاي-سەمەي-التاي (153 ش/ق);
شۋ-قاندىاعاش (266 ش/ق);
قاندىاعاش-اقساراي (138 ش/ق);
استانا-الماتى (260 ش/ق);
الماتى-پاۆلودار (106 ش/ق);
جاڭا-ەسىل-كوكشەتاۋ 161 شاقىرىم جانە ت.ب.
جالپى, تەمىر جولداردىڭ 569 شاقىرىمى كۇردەلى جوندەۋمەن, 181 شاقىرىمى كەشەندى جوندەۋمەن جانە 602 شاقىرىم جوسپارلى – الدىن الا جوندەۋمەن قامتىلعان. سونىمەن قاتار 185 لوكوموتيۆ, 1,6 مىڭنان اسا جۇك جانە 143 جولاۋشىلار ۆاگونى ساتىپ الىندى.
«KAZTRAFFIC-2024» كورمەسى
استانادا قاراشادا «قازجولعزي» اق-نىڭ 65 جىلدىعىنا ارنالعان حح حالىقارالىق «KAZTRAFFIC-2024» كورمەسى ءوتىپ, وعان 20 ەلدىڭ 110-نان استام جول سالاسى كاسىپورىندارىنىڭ وكىلدەرى قاتىستى. شارا شەڭبەرىندە زاماناۋي جول-قۇرىلىس تەحنيكاسى مەن جول قۇرىلىسىنا ارنالعان جاڭا ماتەريالدار ۇسىنىلدى.
كورمە شەڭبەرىندە ورتالىق ازيا ءوڭىرىنىڭ جول ينفراقۇرىلىمىن دامىتۋ پەرسپەكتيۆالارى تالقىلانعان كونفەرەنتسيا جانە جول قوزعالىسىنىڭ قاۋىپسىزدىگى مەن تيىمدىلىگىن ارتتىرۋ ماقساتىندا وزىق تەحنولوگيالاردى پايدالانۋعا ارنالعان حالىقارالىق سەمينار وتتى.
اتالعان كورمە – تاجىريبە الماسۋمەن قاتار يننوۆاتسيالىق شەشىمدەردى كورسەتۋ ءۇشىن, سونداي-اق جول سالاسىن ودان ءارى دامىتۋ ستراتەگيالارىن ازىرلەۋ ءۇشىن ماڭىزدى الاڭعا اينالدى.
TransLogistica Kazakhstan – 2024 كورمەسى: ترانسفورماتسيا ءداۋىرى
بيىل قازاننىڭ 9-11 كۇندەرى استانا «Expo» حقو اۋماعىندا وتكەن «TransLogistica Kazakhstan-2024» كورمەسىندە 105 وتاندىق كومپانيا وز جەتىستىكتەرىن كورسەتتى. بۇل رەتتە 108 حالىقارالىق كومپانيا قازاقستانمەن ىنتىماقتاستىقتى دامىتۋعا مۇددەلىلىگىن راستادى.
ءۇش كۇنگە جالعاسقان كورمەگە 49 ەلدەن 4 021 بىرەگەي كەلۋشى كەلدى. قوناقتار اراسىندا مەملەكەتتىك جانە جەكە كومپانيالاردىڭ, حالىقارالىق ىسكەرلىك قاۋىمداستىقتاردىڭ, سونداي-اق ەلدەردىڭ دەلەگاتسيالارىن قوسا العاندا, ەلشىلىكتەر مەن ساۋدا ميسسيالارىنىڭ وكىلدەرى بولدى.
كورمەنىڭ ماڭىزدى بولىگى 22 سەسسيادان تۇراتىن ىسكەرلىك باعدارلاما بولدى, ونىڭ شەڭبەرىندە 102 سپيكەر كولىك-لوگيستيكا سالاسىنىڭ الدىندا تۇرعان نەگىزگى ماسەلەلەر مەن سىن-قاتەرلەردى تالقىلادى.
العاش رەت «قازاقستاندا تەمىرجول كولىگى مەن ينفراقۇرىلىمدى دامىتۋ» جانە «BreakBulk Kazakhstan ءىرى كولەمدى جانە اۋىر سالماقتى جۇكتەردى تاسىمالداۋ» تاقىرىپتارىندا كونفەرەنتسيالار ءوتتى.
كورمە بارىسىندا ەكونوميكالىق جانە لوگيستيكالىق بايلانىستاردى نىعايتۋعا باعىتتالعان «قازاقستان-نيدەرلاندى» ىسكەرلىك كەڭەسى جانە OkLog جۇيەسىنىڭ تانىستىرىلىمى جانە «كولىكتەگى جانە لوگيستيكاداعى IT-شەشىمدەر» كونفەرەنتسياسى ءوتىپ, وندا ساراپشىلار لوگيستيكالىق وپەراتسيالاردىڭ تيىمدىلىگىن ارتتىرۋعا جانە پروتسەستەردى وڭتايلاندىرۋعا باعىتتالعان يننوۆاتسيالىق تسيفرلىق تەحنولوگيالاردى قاراستىردى.
2025 جىلى TransLogistica Kazakhstan كورمەسى 1-3 قازاندا الماتىدا وتەدى.
5 ترانسشەكارالىق حابتاردى جاڭعىرتۋ
اقتاۋ پورتىندا كونتەينەرلىك حاب سالۋ بويىنشا جوبانى ىسكە اسىرۋ باستالدى, اياقتالۋى – 2025 جىلدىڭ سوڭىنا جوسپارلانعان, بۇل – جىلىنا 250 مىڭ جفب-عا دەيىن ارتتىرۋعا مۇمكىندىك بەرمەك.
ال, قۇرىق پورتىنا بيىل قۋاتى جىلىنا 1 ملن توننا بولاتىن جاڭا استىق تەرمينالى ىسكە قوسىلدى.
قورعاس تورابى بويىنشا «SKYHANSA» جشس قازاقستان-گەرمانيا بىرلەسكەن كاسىپورنى جۇك-جولاۋشىلار اۋەجايىنىڭ جوباسىن ىسكە اسىرۋ بويىنشا جۇمىس باستادى. «قورعاس» اەا اۋماعىندا جۇك تەرمينالىن, كەدەندىك باقىلاۋ ايماعىن, جانارماي قويماسىن, اۋە كەمەلەرىنە قىزمەت كورسەتۋگە ارنالعان اۆياتسيالىق-تەحنيكالىق ورتالىقتى جانە جۇك اۋەكومپانياسىن قامتيتىن اۆياتسيا حابىن قۇرۋ جوسپارلانىپ وتىر. وتكىزۋ مۇمكىندىگىن ارتتىرۋ ءۇشىن التىنكول ستانساسىن جاڭعىرتۋ جوسپارلانعان.
وسىنداي جۇمىستى قىرعىزستانمەن شەكارادا ورنالاسقان يندۋستريالىق ساۋدا-لوگيستيكالىق كەشەندە دە جۇرگىزۋ كوزدەلگەن. ال «ەۋرازيا» ترانسشەكارالىق ساۋدا ورتالىعى مەن «ورتالىق ازيا» حالىقارالىق ونەركاسىپتىك كووپەراتسيا ورتالىعىندا وتكىزۋ مۇمكىندىگىن ارتتىرۋ ماقساتىندا «پودستەپنوە – فەدوروۆكا» (144 كم) اۆتوموبيل جولىن جوندەۋ جانە «دارباز – ماقتاارال» (152 كم) تەمىرجول جەلىسىنىڭ قۇرىلىسىن جۇرگىزۋ كۇتىلىپ وتىر.
اتالعان حابتاردىڭ ىسكە قوسىلۋى – جاڭا جۇمىس ورىندارىن قۇرۋعا, جۇكتەردىڭ ءوتۋ ۋاقىتىن قىسقارتۋعا, ونەركاسىپتىك ءوندىرىس كولەمىن ارتتىرۋعا مۇمكىندىك بەرەتىنى ءسوزسىز.
بيىل جۇك تاسىمالى 4 ملن توننادان استى
2024 جىلدىڭ 11 ايىندا جۇك تاسىمالىنىڭ كولەمى 63%-عا ارتىپ, 4,1 ملن تونناعا جەتكەن. بيىل ينفراقۇرىلىمدى دامىتۋعا جانە باعىتتىڭ فۋنكتسيونالىن كەڭەيتۋگە باعىتتالعان ترانسكاسپي كولىك ءدالىزىنىڭ ۇيلەستىرۋ ورتالىعى ىسكە قوسىلدى. بۇل ەۋروپا مەن ازيا اراسىنداعى جەتكىزۋ مەرزىمىن 15 كۇنگە دەيىن قىسقارتادى. جوباعا قازاقستان, ازەربايجان, گرۋزيا, تۇركيا, قىتاي سياقتى نەگىزگى ەلدەر مەن كومپانيالار بەلسەندى قاتىسىپ جاتىر.
2023 جىلمەن سالىستىرعاندا 2024 جىلى تەڭىز كولىگى ارقىلى تاسىمالداۋ كولەمى 3%-عا, ونىڭ ىشىندە ترانزيتتىك جۇكتەردى تاسىمالداۋ 18%-عا وسكەن.
قۇرىق پاروم كەشەنى ارقىلى جۇك اۆتوكولىك قۇرالدارىن وڭدەۋدە 22%-عا وسۋ بايقالعان. اقتاۋ پورتى ارقىلى وتكەن 27 مىڭعا جۋىق كونتەينەردى قوسا العاندا «شىعىس-باتىس» ترانزيتتىك قاتىناسىنداعى كونتەينەر تاسىمالىنىڭ كولەمى 84%-عا ۇلعايعان. سونداي-اق, بيىل قۇرىق پورتىنىڭ «سارجا» تەرمينالى اتالعان كەزەڭدە تۇركيا مەن يران باعىتىندا شامامەن 55 مىڭ تونناعا جۋىق جۇك ء(تۇستى مەتالدار, امموفوس, ارپا) وڭدەدى. سونىمەن قاتار, قۇرىق پورتىنىڭ «ەرساي» تەڭىز تەرمينالىنان 2024 جىلى قازاقستان ارقىلى ءازىربايجاننان وزبەكستانعا ترانزيتپەن 153 گاباريتتى ەمەس جۇك تاسىمالدانعان.
ايتا كەتسەك, بيىل قازان ايىندا قۇرىق پورتىندا جىلىنا قۋاتى 1 ملن توننانى قۇرايتىن تاعى ءبىر استىق تەرمينالى قولدانىسقا ەنگىزىلدى. سونىمەن قاتار, مەملەكەت باسشىسىنىڭ تاپسىرماسى اياسىندا قۇرىق پورتىنىڭ بازاسىندا تولىققاندى لوگيستيكالىق كلاستەر قۇرۋ جۇمىسى بەلسەندى ءجۇرىپ جاتىر.
باسقا دا جەتىستىكتەر
سوڭعى 2 جىلدا قوعامدىق كولىك پاركىنىڭ 3 267 اۆتوبۋسقا جاڭارتىلۋى –اتالعان تەحنيكانىڭ توزۋىن 40% -دان 30% -عا دەيىن ازايتتى. سونداي-اق «كولىك جانە قويمالاۋ» سالاسى بويىنشا 2024 جىلعى قاڭتار-قازاننىڭ قورىتىندىسى بويىنشا 883,4 ملن توننا جۇك تاسىمالدانعان, بۇل – بىلتىرعى كورسەتكىشتەن 8,9% -عا ارتىق. سونىمەن قاتار, شىعىس قازاقستان وبلىسىنداعى بۇقتىرما سۋ قويماسى ارقىلى قازاقستاندا ەڭ ۇزىن كوپىر اشىلدى.
