تاۋەلسىزدىك مەرەكەسى قارساڭىندا الماتىدا پارتيامىزدىڭ قورىتىندى جيىنىن وتكىزدىك. ەلدەگى بەدەلدى ءارى ىقپالدى قوعامدىق-ساياسي كۇش رەتىندە بارىمىزدى باعامدادىق, جوعىمىزعا قول جەتكىزۋدى جوسپارلادىق.
اتالعان جيىنعا ءبىز ۇلكەن دايىندىقپەن كەلدىك. وعان دەيىن بارلىق دەڭگەيدەگى ءماسليحاتتار دەپۋتاتتارىنىڭ II رەسپۋبليكالىق فورۋمىندا مەملەكەت باسشىسى قاسىم-جومارت توقاەۆتىڭ: ء«ماسليحاتتار – جەرگىلىكتى ءوزىن-ءوزى باسقارۋ جۇيەسىندەگى نەگىزگى ينستيتۋت. ونىڭ تيىمدىلىگى دەپۋتاتتاردىڭ كاسىبيلىگىنە تىكەلەي بايلانىستى. بىلىمىنە بىلىگى ساي دەپۋتاتتار كورپۋسىن جاساقتاۋعا, ەڭ الدىمەن, ولاردى ۇسىنعان پارتيالار مۇددەلى بولۋى كەرەك», دەگەن ءسوزىن باسشىلىققا الا وتىرىپ, ايماقتاردا, اتاپ ايتقاندا, ورالدا – ەلىمىزدىڭ باتىس, تارازدا – وڭتۇستىك, پەتروپاۆلدا – سولتۇستىك, پاۆلوداردا – شىعىس پەن ورتالىق وڭىرلەردەگى پارتيا فيليالدارىنىڭ توپتاستىرىلعان سەمينارلارىن ۇيىمداستىردىق.
جوعارىدا ايتقان ءماسليحاتتار دەپۋتاتتارىنىڭ فورۋمىنان كەيىن بىردەن پرەزيدەنت جانىنداعى مەملەكەتتىك باسقارۋ اكادەمياسىمەن بىرلەسىپ, ەلدەگى ساياسي پارتيالاردىڭ اراسىنان العاش بولىپ «اۋىلدىق اۋماقتاردى باسقارۋ» ديسكۋسسيالىق الاڭىن اشتى. بايانداماشىلار رەتىندە الدىن-الا بەكىتىلگەن تاقىرىپتار نەگىزىندە ءوز سالاسىنىڭ تانىمال ماماندارى تارتىلدى.
جالپى, «اۋىل» پارتياسى جوعارىدا ايتىلعان «ەلدەگى بەدەلدى جانە ىقپالدى قوعامدىق-ساياسي كۇشكە» ءبىر جىلدىڭ بەدەرىندە اينالعان جوق. پارتيامىز ەلدەگى قوعامدىق-ساياسي بەدەل مەن ىقپالعا سوڭعى ساياسي رەفورمالار مەن بارلىق پارتيا اكتيۆىنىڭ زور ۇيىمداستىرۋشىلىق-يدەولوگيالىق جۇمىسىنىڭ ارقاسىندا سوڭعى جىلدارى عانا قول جەتكىزدى.
سوڭعى سايلاۋلاردا پارتيامىزعا سايلاۋشىلار ۇلكەن سەنىم ارتتى. ءبىز ماجىلىستەن – 8, ءماسليحاتتاردان 228 ماندات يەمدەنىپ, دەپۋتات سانى بويىنشا رەسپۋبليكادا ەكىنشى ورىنعا شىقتىق. «اۋىل» پارتياسى اتىنان وڭىرلىك ماسليحاتتارعا 27 ايەل سايلاندى.
اۋداندار مەن وبلىستىق ماڭىزى بار قالالار اكىمدەرىن سايلاۋدا دا پارتيا مۇشەلەرى ەلىمىزدىڭ ءۇش اۋىلدىق اۋدانى – اباي وبلىسى اباي اۋدانىنىڭ, اقمولا وبلىسى اقكول اۋدانىنىڭ, تۇركىستان وبلىسى بايدىبەك اۋدانىنىڭ اكىمى بولىپ سايلاندى. بۇعان قوسا 39 اۋىل اكىمى – ءبىزدىڭ پارتيانىڭ مۇشەسى.
2024 جىلعى 8 جەلتوقسانىندا ەلىمىزدە وتكەن ءماسليحاتتاردىڭ شىعىپ قالعان دەپۋتاتتارىنىڭ ورنىنا سايلاۋدا پارتيامىزدىڭ 7 مۇشەسى دەپۋتات مانداتىن يەلەندى.
ەلىمىزدى ابىگەرگە سالعان كوكتەمگى سۋ تاسقىنى سىندى سىن ساعاتتا حالقىمىزعا ۇندەۋ جاساعان مەملەكەت باسشىسىن «اۋىل» پارتياسى وكىلدەرى دە ءبىراۋىزدان قولدادى. مىڭداعان پارتيالاستارىمىز اپات باستالعان كۇننەن توتەنشە جاعدايدىڭ بەل ورتاسىندا ءجۇردى. «اۋىلدىقتار» سۋ تاسقىنىنان زارداپ شەككەن ايماقتارعا كومەك كورسەتۋ بويىنشا شتاب قۇرىپ, بەلسەندىلەر تاسقىن سۋدان زارداپ شەككەن 211 اۋىلدىق وكرۋگ پەن 5 قالا ورتالىعىندا اپاتتىڭ الدىن الۋ جۇمىسىنا جۇمىلدىرىلدى. اقتوبە, بقو, اتىراۋ, قوستاناي, اقمولا وبلىسىنىڭ تابيعي اپات قۇرساۋىندا قالعان ەلدى مەكەندەرىنە قاجەتتى توننالاعان گۋمانيتارلىق كومەك جولدادى.
دەپۋتاتتار ءتىلسىز جاۋ زالال كەلتىرگەن اۋىلداردىڭ تۇرعىندارىمەن, شارۋا قوجالىقتارى يەلەرىمەن كەزدەسىپ, ولارعا جەرگىلىكتى فيليالدار دەڭگەيىندە كومەك ۇيىمداستىرۋ ءۇشىن قارعىن سۋ قۇرساۋىندا قالعان وبلىستارعا ارنايى ساپارعا شىقتى. وڭىرلىك فيليالداردىڭ 900-دەن اسا بەلسەندى مۇشەسى مەن جاستار قاناتىنىڭ 1 500 بەلسەندىسى اپاتتىڭ الدىن الۋعا ارنالعان ءىس-شارالارعا قاتىستى. نەگىزگى ۆولونتەرلىك توپتار, سونىمەن قاتار پارتيا قاتارىنداعى كاسىپكەرلەر مەن فەرمەرلەر بولگەن 76 اۋىر تەحنيكا اتىراۋ, بقو, سقو, قوستاناي, اقمولا وبلىسى ايماقتارىنداعى اۋىلداردا تابيعي اپاتتىڭ الدىن الۋ جۇمىستارىنا جۇمىلدىرىلدى.
پارتيانىڭ جاستار قاناتى اتىراۋ وبلىسىندا جامبىل وبلىستىق فيليالى جونەلتكەن 30 توننا گۋمانيتارلىق كومەكتى مۇقتاج جاندارعا تاراتىپ, قۇرمانعازى اۋدانىندا زارداپ شەككەندەرگە ارناپ 14 قاناتتى كيىز ءۇي تىكتى. جالپى, «اۋىل» پارتياسى» توپان سۋدان زارداپ شەككەن وڭىرلەرگە بارلىعى 168 ملن تەڭگە سوماسىنداعى 213 توننادان اسا گۋمانيتارلىق كومەك جىبەردى.
تاسقىننىڭ بەتى قايتقان سوڭ ودان كەلگەن زارداپتاردى ەل بولىپ ەڭسەرۋگە كىرىستىك. ءبىز زارداپ شەككەن ازاماتتارىمىزدىڭ ءۇي-جايلارىن قالپىنا كەلتىرۋ ءۇشىن وتكەن تاريحىمىزدا ءوز تيىمدىلىگىن دالەلدەگەن «جاستاردىڭ قۇرىلىس جاساقتارىن» قۇرۋ باستاماسىن جاڭعىرتتىق. سقو-دا 80 جانە بقو-دا 50 ستۋدەنتتەن جاساقتالعان «اۋىل جاستارىنىڭ قۇرىلىس جاساعىن» قۇردىق. ولار جاز بويى ەڭبەك ەتتى, تابىس تاپتى.
«اۋىل» پارتياسى ايماقتاردا كورسەتىلگەن جاردەمنەن بولەك قايىرىمدىلىق قورىن قۇردى. وعان تۇسكەن قاراجاتقا اقمولا, سولتۇستىك قازاقستان, باتىس قازاقستان, قوستاناي وبلىسىنداعى تاسقىننان زارداپ شەككەن ازاماتتارىمىزعا كومەك كورسەتىلدى. تەرىسكەي وبلىستارداعى شاعىن شارۋاشىلىعى بار 135 وتباسىنا جالپى سوماسى 11 ملن-نان اسا تەڭگەگە 2 700 باس قاز بالاپانى مەن 81 توننا ولاردىڭ جەمى, باتىس قازاقستان وبلىسىنداعى وتباسىلارعا 20 مىڭ باس تاۋىق بالاپانى تاراتىلىپ بەرىلدى.
بۇعان قوسا پارتيا ءوز سايلاۋالدى باعدارلاماسىندا بەرگەن ۋادەسى بويىنشا «اۋلادان داستارقانعا», «قاز حابى» ارنايى جوباسىن ازىرلەدى. جوبا اياسىندا جينالعان 3,4 ملن تەڭگەگە 800 باس قاز بالاپانى مەن 600 باس برويلەر تاۋىق بالاپانى جانە 3 425 كيلو ولاردىڭ جەمى, ۆەتەرينارلىق ءدارى-دارمەكتەرى ساتىپ الىنىپ, اقمولا وبلىسى اقكول اۋدانىنداعى 10 جەكە قوسالقى شارۋاشىلىقتارعا تاراتىلدى. ناتيجەسىندە, 1 توننا 400 كگ تاۋىق ەتى مەن 3 توننا 200 كگ قاز ەتى ءوندىرىلىپ, 10 اۋىل تۇرعىنى 5 ايدا نەسيە الماي-اق 1 ميلليون تەڭگەدەن استام تابىس تاپتى.
پارتيا نازارىنان جاستار, ونىڭ ىشىندە NEET ساناتىنداعى جاستارمەن جۇمىس ەشقاشان تىس قالعان ەمەس. ءبىزدىڭ ماماندار «تاۋەلسىزدىك ۇرپاقتارى» گرانتتىق باعدارلاماسى بويىنشا 29 ملن تەڭگەلىك 12 جوباعا كونسۋلتاتسيالىق سۇيەمەلدەۋ كورسەتسە, «Zhas project» جانە جەرگىلىكتى باستامالار بويىنشا 6 ميلليون تەڭگەلىك 6 جوبانىڭ ماقۇلدانۋىنا سەپ بولدى.
جاستار قاناتى بيىل سۋ تاسقىنى باستالعان كەزدە رەسپۋبليكاداعى جاستار ۇيىمدارى اراسىنان ەڭ ءبىرىنشى بولىپ زارداپ شەككەن وتانداستارىمىزعا كومەك كورسەتكەن ۆولونتەرلىك توپتارعا اينالدى. «اۋىل» پارتياسى ۇلتتىڭ رۋحاني, مادەني سالاسىنىڭ دا قايتا تۇلەۋىنە جان جاقتى ۇلەس قوسىپ ءجۇر. بۇل ماسەلەدە دە «اۋىل» پارتياسى جاستار قاناتىنىڭ ۇيىمداستىرۋىمەن حالىقارالىق كىتاپ كۇنىنە ورايلاستىرىلعان «كىتاپقا ەكىنشى ءومىر سىيلا!» اكتسياسى بارىسىندا ەلىمىزدىڭ 29 اۋدانىنا قاراستى 59 اۋىلدىق ەلدى مەكەندە ورنالاسقان كىتاپحانالارعا 21 مىڭعا جۋىق كىتاپتى سالتاناتتى تۇردە تارتۋ ەتتى.
پارتيا بۇدان بولەك, مەملەكەت باسشىسىنىڭ تاپسىرماسىمەن قابىلدانعان «ناۋرىزناما» تۇجىرىمداماسى اياسىندا ەكى ماڭىزدى ءىس-شارا ءۇيىمداستىردى. ونىڭ ءبىرىنشىسى – تۋعان ولكەنىڭ اسەم كوركى مەن كەلبەتىن, اۋىلدىڭ تۇرمىسى مەن تىرشىلىگىن, تىلسىم تابيعاتتىڭ كوز تويماس سۇلۋلىعىن كورسەتەتىن «اۋىل ناقىشتارى» بايقاۋ-فوتوكورمەسى. ەكىنشىسى – ۇلتىمىزدىڭ باتا بەرۋ ءداستۇرىن جاس ۇرپاققا دارىتۋ ماقساتىندا ۇيىمداستىرىلعان «باتامەن ەر كوگەرەر!» رەسپۋبليكالىق باتاگويلەر سايىسى.
بيىل س.سەيفۋللين اتىنداعى قازاتزۋ-مەن بىرلەسىپ اۋىل شارۋاشىلىعى قىزمەتكەرلەرى كۇنى قارساڭىندا ەلىمىزدىڭ 11 جوو ستۋدەنتتەرى اراسىندا ايماقتىق «اۋىل ويىندارى-2024» ءتۋرنيرىن وتكىزدىك. جارىسقا استانا قالاسى, اقمولا, قاراعاندى وبلىسىنداعى جوعارى وقۋ ورىندارىنىڭ ستۋدەنتتىك كوماندالارى قاتىستى. تۋرنيردە ستۋدەنت جاستار اسىق اتۋ, لاڭگى تەبۋ, ارقان تارتىس, ءداستۇرلى ساداق تارتۋ, توعىزقۇمالاق جانە قازاقشا كۇرەس سياقتى ۇلتتىق سپورت تۇرلەرىنەن كۇش سىناستى.
پارتيامىزدىڭ ماجىلىستەگى دەپۋتاتتىق فراكتسياسى بۇگىندە حالىقتىڭ جايلى تۇرمىسى ءۇشىن قاجەت باسقا دا قۇجاتتاردى قابىلداۋعا اتسالىسۋمەن قاتار, جوعارىدا اتالعان ەكى زاڭ جوباسىنا باستاماشىلىق جاساپ, ازىرلەدى. «اگرارلىق نەسيە كورپوراتسياسى», «قازاگروقارجى» جانە باسقا قارجى ينستيتۋتتارىنىڭ باسىن بىرىكتىرىپ, مەملەكەتتەن جىل سايىن ءبولىنىپ جاتقان قارجىنى ءبىر جەرگە توپتاستىرىپ, شارۋالاردىڭ قارجىلىق پروبلەمالارىن ءبىر ورتالىقتا شەشەتىن «اگروبانك» قۇرۋدى ۇسىندى. باستامانى ءماجىلىس پەن سەنات دەپۋتاتتارىنىڭ 60%-دان استامى قولدادى.
«اۋىل» پارتياسى نازارىنان قوعامنىڭ ءالجۋاز توپتارىنىڭ ماسەلەسى دە تىس قالعان ەمەس. «مۇگەدەكتىگى بار ادامداردىڭ قۇقىقتارىن قورعاۋ جونىندەگى» كوميسسيانىڭ فيليالدارداعى وكىلدەرى دەپۋتات تاڭساۋلە سەرىكوۆپەن بايلانىسا وتىرىپ, ينكليۋزيۆتىك قوعامنىڭ بىرنەشە ماسەلەسىن ءماجىلىس مىنبەرىنەن جەتكىزۋ مۇمكىندىگىن الدى. كەيبىر ماسەلەلەر ناقتى شەشىمىن تاپتى.
«اۋىل» پارتياسىنىڭ قىزمەتكەرلەرى ماجارستان ەلشىلىگى ارقىلى سول ەلدەگى سۋ قۇستارىن وسىرۋگە, ولاردان الىناتىن ونىمدەردى تەرەڭ وڭدەۋگە ماماندانعان بيزنەس وكىلدەرىمەن قاز, تاۋىق ءوسىرۋ بويىنشا ناتيجەلى كەزدەسۋلەر وتكىزدى. بۇدان بولەك, ەۋرووداققا مۇشە بىرنەشە ەل مەن ورتالىق ازيا جانە كاۆكاز ەلدەرىنىڭ ەلشىلەرى ارقىلى سول مەملەكەتتەردىڭ پارلامەنتتىك پارتيالارىمەن, حالىقارالىق جانە جەرگىلىكتى قوعامدىق ۇيىمدارمەن ىنتىماقتاستىق, ارىپتەستىك تۋرالى كەلىسىمدەرگە قول قويىلدى.
كەلەر جىلى «اۋىل» پارتياسىنىڭ قۇرىلعانىنا 25 جىل تولادى. مەرەيتويىمىزعا وراي ءبىز بىرنەشە پارتيامەن سەرىكتەستىك تۋرالى مەموراندۋمعا قول قويۋدى جوسپارلاپ وتىرمىز. قازىر بەلارۋستىڭ رەسپۋبليكالىق ەڭبەك جانە ادىلەت پارتياسىمەن, قىرعىز رەسپۋبليكاسىنىڭ «يشەنيم» پارتياسىمەن بايلانىس ورناتىلىپ, ەكىجاقتى ىنتىماقتاستىققا نەگىز جاسالدى. ازەربايجاننىڭ ازاماتتىق ىنتىماقتاستىق پارتياسىمەن, ماجارستاننىڭ حريستيان-دەموكراتيالىق حالىق پارتياسىمەن ىنتىماقتاستىق ورناتۋ ماقساتىندا ءىس-شارالار جوسپارلانىپ وتىر.
پارتيامىز بيىل زامان تالابىنا ساي تولىق جاڭعىرۋدان ءوتىپ, رەبرەندينگ جاسالدى. بۇل – پارتيانىڭ ءيميدجىن جانە ونىڭ ساياسي ارەناداعى ۇستانىمىن نىعايتۋداعى ماڭىزدى قادام بولدى. ءبىز پارتيانىڭ بۇل اتقارعان ىستەرى تەڭىزگە تامعان تامشىداي عانا ەكەنىن بىلەمىز. دەسەك تە, تامشىنىڭ تەڭىزگە اينالاتىنىنا سەنەمىز. ءبىز سول سەنىمگە لايىق بولىپ, بۇقارا ءۇمىتىن اقتاۋعا ءتيىسپىز. قاجەتتى زاڭدار قابىلداندى, ارى قاراي ونى جۇزەگە اسىرۋدى كوپ بولىپ قولعا الۋ كەرەك.
سەرىك ەگىزباەۆ,
«اۋىل» پارتياسىنىڭ توراعاسى,
ءماجىلىستىڭ اگرارالىق ماسەلەلەر جونىندەگى كوميتەتىنىڭ توراعاسى
