بىراق بىرقاتار قيىندىققا دا كەزىكتىك. بيىل مۇنايعا بايلانىستى جوسپاردى ورىنداي المادىق. 90,3 ملن توننانىڭ ورنىنا 87,8 ملن توننا ءوندىرىلدى. ەكسپورتقا 70,8 ملن توننا ەمەس, 68,3 ملن توننا ساتامىز. قاشاعاننىڭ ەكىنشى كەزەڭىن ىسكە قوسۋ 2025 جىلعا اۋىستىرىلدى. بيۋدجەت تاپشىلىعىنا قاتىستى جاعداي جاقسارعان جوق, ەداۋىر ناشارلادى. ينفلياتسيا تەجەلگەنمەن, 5 پايىزدىق كورسەتكىشتىڭ اۋىلى الىس. حالىقتىڭ تابىسى ينفلياتسياعا ىلەسە الماي جاتىر. بيۋدجەت داعدارىسى كەشە, بۇگىن پايدا بولا سالعان جوق, ول – جىلدار بويى قوردالانعان تەرەڭ قارجىلىق قۇرىلىمدىق داعدارىستىڭ سالدارى.
قازىر بيۋدجەت شىعىندارىن قىسقارتۋ عانا ەمەس, توقتاتۋ دا مۇمكىن ەمەس, ايلىق ەسەپتىك كورسەتكىشتى قوزعاعان سايىن كەلەسى جىلى يندەكستەۋ بىزگە 1-2 ترلن تەڭگە شىعىن ءوسىمىن بەرەدى. ۇلتتىق بانككە ينفلياتسيانىڭ ءوسۋى مەن ەكونوميكانىڭ ءوسىمىنىڭ ورتاسىن دۇرىس انىقتاۋ قيىنعا تۇسەيىن دەپ تۇر. بيىل ينفلياتسيانى 8% شەگىندە ۇستاپ قالعىمىز كەلدى, بىراق ونى دا ورىنداۋ وڭاي ەمەس.
بيىلعى شىعىس كىرىستەردەن 26%-عا ارتىق. ورتاشا العاندا بۇل كورسەتكىش 20%-عا تەڭ. 2024 جىلدىڭ 11 ايىندا بيۋدجەتكە سالىق 4 ترلن تەڭگەگە كەم تۇسكەن. قارجى مينيسترلىگى جاريالاعان ەسەپكە ساي, قاڭتار-قاراشا ايلارىندا بيۋدجەتكە 14,3 ترلن تەڭگە سالىق تۇسۋگە ءتيىس ەدى. الايدا 11 ايدا 10 ترلن تەڭگە عانا سالىق جينالعان. ۇكىمەت 11 ايدا تابىس سالىعى مەن كورپوراتيۆتى تابىس سالىعىنىڭ ارقايسىسىنان قازىناعا 4 ترلن تەڭگە تۇسەدى دەپ جوسپارلاعان. بىراق قاڭتار-قاراشا ايلارىندا تۇسكەن ءار سالىق 2,9 ترلن تەڭگەدەن اسپاعان.
سوعان قاراماستان, جىلدى جاقسى اياقتادىق دەۋگە نەگىز بار. ىشكى جالپى ءونىم 4,4%-عا ءوسىم كورسەتتى. بارلىق الەۋمەتتىك مىندەتتەمەنى ورىنداي الدىق. ۇلتتىق قور ەسەبىنەن بيۋدجەتتىڭ نەگىزگى مىندەتتەمەلەرىن اتقاردىق. حالىق ورنىقتى ءوسىپ جاتىر, ساياسي تۇراقتىلىق بار جانە حالىقارالىق قارىم-قاتىناس تا ويداعىداي.
سونداي-اق الماتىدا جاڭا اۋەجايدىڭ اشىلۋىن, اەس بويىنشا وتكىزىلگەن رەفەرەندۋمدى, قىتاي-ەۋروپا باعىتىندا جۇك ءترانزيتىنىڭ ايتارلىقتاي ءوسىمىن, قارجى, ساۋدا سالالارىنداعى تسيفرلاندىرۋدىڭ كۇرت ارتۋىن, تاسقىننان زارداپ شەككەندەر ماسەلەسىنىڭ شەشىمىن تابۋىن, شەكارا شەبىندەگى جايلى جاعدايدى دا وڭ ناتيجەلەر قاتارىنا جاتقىزا الامىز.
