ءوتىپ بارا جاتقان جىلداعى ەڭ جاعىمدى جاڭالىق – اتىراۋ وبلىسىنداعى پوليەتيلەن زاۋىتىن قارجىلاندىرۋ ماسەلەسىنىڭ شەشىلۋى. بۇل وتە ءىرى, كەمى 1 000 ادامدى جۇمىسپەن قامتاماسىز ەتەتىن, جىلىنا 1,25 ملن توننا پوليەتيلەن وندىرەتىن زاۋىت بولماق. جوبا جۇزەگە اسقاندا ىشكى جالپى ءونىم كورسەتكىشىنىڭ 1,2%-عا وسۋىنە ىقپال ەتپەك. جوباعا 7,4 ملرد دوللار ينۆەستيتسيا تارتىلعان. جوبانى «Silleno» كومپانياسى جۇزەگە اسىرادى. كومپانيا اكتسيونەرلەرى – «قازمۇنايگاز» ۇك» اق (40%), «Sinopec Overseas Investment Holding» (30%) جانە «سيبۋر حولدينگ» جاق (30%). جوبا اكتسيونەرلەر قاراجاتى مەن حالىقارالىق بانكتەردەن الىنعان نەسيە ەسەبىنەن قارجىلاندىرىلادى. زاۋىت قۇرىلىسى 2029 جىلى اياقتالۋعا ءتيىس.
كاسىپورىننىڭ ىسكە قوسىلۋى يمپورتتالاتىن پوليەتيلەن كولەمىن وتاندىق ونىممەن الماستىرۋ جانە قوسىلعان قۇنى جوعارى ءونىم ەكسپورتىن ۇلعايتۋعا جول اشادى. گەولوگيالىق بارلاۋ سەگمەنتىندە دە ءبىراز جاڭالىق بار. «قازمۇنايگاز» بيىلدان باستاپ وتاندىق ينۆەستورلارمەن بىرگە كەن ورىندارىندا تەرەڭ قاباتتا بارلاۋ جۇمىستارىن جۇرگىزۋدى جوسپارلاپ وتىر.
الەمدىك دەڭگەيدەگى مۇناي تابىسىنىڭ 2%-ى ءبىزدىڭ ەلدىڭ ۇلەسىندە. سالىق تۇسىمدەرىنىڭ 40%-ى مۇناي-گاز سەكتورىنان ءتۇسىپ جاتىر. وپەك-كە مۇشە ەل رەتىندە مۇناي ءوندىرۋ نەمەسە بارلاۋ جۇمىستارىن مۇمكىندىگىنشە شەكتەۋگە تىرىسامىز.
گاز ءوندىرۋ سەگمەنتىندە جاڭا فورمۋلا – ىنتالاندىرۋ فورمۋلاسى ىسكە قوسىلدى. ەندى گاز وڭدەيتىن زاۋىتتار كەمى ءوز ونىمدەرىن 120 دوللارمەن ەكسپورتتاي الادى. بۇرىن ونىڭ مولشەرى 30-40 دوللار بولاتىن. 2025 جىل مۇناي-گاز سەكتورىنداعى جاڭا مۇمكىندىكتەرگە جول اشاتىنىنا سەنەمىن.
