شىنىندا, زاڭ ەرەجەلەرى ادامدى شەكتەۋگە ەمەس, قورعاۋعا قىزمەت ەتۋى كەرەك. ءاربىر بۇزىلعان زاڭ – مەملەكەتتىك ينستيتۋتتارعا كورسەتىلگەن قوقان-لوقىدان بولەك, ازاماتتاردىڭ ارى مەن نامىسىن اياققا تاپتاۋمەن تەڭ ەكەنىن ۇمىتپاعانىمىز ءجون. وسىنى انىق ءتۇسىنۋ قوعامداعى ءوزارا قۇرمەتتىڭ وزەگىن قالىپتاستىرادى. ال ءاربىر ازامات زاڭ ەرەجەلەرىن قۇرمەتتەگەن سايىن كورشىسىنە, ارىپتەسىنە, اينالاسىن قورشاعان ادامدارعا دەگەن ىقىلاس-پەيىلىن پاش ەتە تۇسەدى. مىسالى, كولىك جۇرگىزۋ ەرەجەسىن بەرىك ۇستانۋ ارقىلى ءوزىمىزدى عانا ەمەس, كۇرە جولدىڭ بويىنداعى كوپتەگەن ادامنىڭ ءومىرىن ساقتاپ قالامىز. كەز كەلگەن مولشەردە بەرىلگەن پارادان باس تارتۋ ارقىلى دامۋعا تىكەلەي ىقپال ەتەتىن مەملەكەتتىك جۇيەنىڭ ادالدىعىنا قولداۋ كورسەتەمىز.
زاڭ ۇستەم بولماي ادىلدىك ورنامايدى. ونى ءتىپتى قوعامدى بىرىكتىرىپ ۇستاپ تۇرعان ۇستىن رەتىندە تۇسىندىرۋگە بولادى. ازاماتتارى زاڭعا سەنۋدەن قالىپ, ەرەجەلەرى ورىندالماي جاتقان ەلدىڭ قۇردىمعا كەتۋى وڭاي. ونداي ەلدى كىرپىشى بىرتىندەپ مۇجىلە باستاعان ۇيگە ۇقساتۋ كەرەك. بۇل قوعامعا دا قاتىستى تەڭەۋ. ءبىزدىڭ ارقايسىسىمىز «ەشتەڭە ەتپەيدى» دەگەن ويمەن زاڭ بۇزا بەرسەك, ادىلدىكتىڭ وزەگىن شىرىتەمىز. سونداي-اق زاڭدى بەرىك ۇستانۋ ۇلتتىق قاۋىپسىزدىككە تىكەلەي ىقپال ەتەدى. ەگەر بالالارىڭىز قۇقىعى قورعالاتىن دامىعان مەملەكەتتە ءومىر سۇرگەنىن قالاساڭىز, وزىڭىزدەن باستاڭىز. بۇعان دەيىن تاريحي تالاي قيىن كەزەڭنەن وتكەن ەلىمىزدىڭ كەلەشەگى قانداي بولاتىنى بىزگە تىكەلەي بايلانىستى.
ەلىمىزدىڭ قۇقىق قورعاۋشىلارى كۇندەلىكتى زاڭ ەرەجەلەرىنىڭ بۇزىلۋىنان تۋىنداعان سالدارعا كۋا. ءتىپتى ەرەجەلەردى بۇزۋدان, نەمقۇرايدىلىقتان نەمەسە پاراقورلىقتان كوپتەگەن ادامنىڭ ءومىرى قۇردىمعا كەتىپ جاتقانىن كورىپ وتىر. وسى تۇرعىدا ءاربىر ازاماتتىڭ جاساعان دۇرىس قادامى تاعدىرلاردى تۇزەۋگە سەپتىگىن تيگىزەدى.
ول ءۇشىن اركىم ءوزىنىڭ قۇقىقتارى مەن مىندەتتەرىن ايشىقتاعان كونستيتۋتسيانى وقىپ, زاڭدى جەتىك مەڭگەرۋگە ءتيىس. سول ارقىلى وزگەلەرگە ۇلگى بولىپ, ەشكىم جوق جەردىڭ وزىندە زاڭدى بەرىك ۇستانادى. قوعامداعى زاڭ بۇزۋشىلىقتى جاسىرماي ايتىپ, اشىقتىقتى, جاريالىلىقتى تالاپ ەتەتىن قوعامدىق باستامالارعا بەلسەندى قاتىسادى. مىنە, وسىنداي نەگىزگى ەكى-ءۇش باعىتتىڭ ءوزى ادامنىڭ قانداي ەكەنىن انىق كورسەتەدى.
وزگەلەردىڭ لاۋازىمىنا, ءدىني نە جاراتىلىس تۋرالى ۇستانىمىنا قاراماستان, قۇرمەت ءبىلدىرۋ زاڭ مەن ءتارتىپتىڭ بەرىك ورناعانىنىڭ بەلگىسى. ونى قالىپتاستىرۋعا اركىمنىڭ قوسار ۇلەسى بار. كەرەك دەسەڭىز, كۇندەلىكتى ءتارتىپتى ۇستانۋدىڭ ءوزى زاڭنىڭ بەرىك ورناۋىنا ىقپال ەتەدى. ونىڭ تۇعىرىن بەكىتۋ ارقىلى ءاربىر ادامنىڭ باقىتتى ءومىر سۇرۋىنە قولايلى قوعام قالىپتاستىرامىز.
ەلىمىز بۇگىندە قۋاتتى, قۇقىقتىق مەملەكەت قۇرۋدىڭ داڭعىل جولىنا ءتۇستى. بۇل جول وڭاي ەمەس. ونى ءاربىر ازاماتتىڭ سانالى جاساعان قادامىمەن باسىپ وتە الامىز. سوندىقتان قۇقىق قورعاۋشى رەتىندە ايتارىم – زاڭدى بەرىك ۇستانىپ جاسالعان قادام بولاشاعىمىزدى جارقىن, كەلەشەگىمىزدى كەمەل ەتە تۇسەدى.
ۆيكتور تەن,
تالدىقورعان قالالىق قۇقىق قورعاۋ ورتالىعىنىڭ باسشىسى
