م.اشىمباەۆ بوچچانى سەرىك ەتكەن جاس سپورتشىلارعا ءىلتيپات بىلدىرە كەلىپ, ولاردىڭ وسى جىلدا وتكەن جارىستاردا شەبەرلىك تانىتقانىن جانە اتلەتتەردىڭ تاباندىلىعى مەن جوعارى دەڭگەيدەگى ەرىك-جىگەرىن ايرىقشا اتاپ ءوتتى. سونداي-اق ول مەملەكەت باسشىسى ينكليۋزيۆتى قوعام قۇرۋعا باسا ءمان بەرىپ, ءتيىستى ورگاندارعا ناقتى مىندەتتەر جۇكتەگەنىن تىلگە تيەك ەتتى.
«پرەزيدەنتىمىز قاسىم-جومارت توقاەۆ ينكليۋزيۆتى قوعام قۇرۋدى جانە ادىلەتتى قازاقستان قالىپتاستىرۋدى مەملەكەتتىك ساياساتتىڭ نەگىزگى باسىمدىعى رەتىندە بەلگىلەپ بەردى. وسى رەتتە بوچچانى دامىتۋ ەلىمىزدە ىنتىماقتاستىق, ءوزارا تۇسىنىستىك جانە ينكليۋزيا مادەنيەتىن قالىپتاستىرۋ جولىنداعى وزىق ۇلگىلەردىڭ ءبىرى ەكەنى انىق. بوچچانىڭ پاراليمپيادالىق سپورت ءتۇرى ەكەنىن ەسكەرسەك, ءبىزدىڭ پارااتلەتتەرىمىز ءۇشىن الداعى ۋاقىتتا الەمدىك ءىرى سايىستارعا قاتىسۋعا مۇمكىندىك مول. سىزدەردىڭ تاباندىلىقتارىڭىز بەن ەرىك-جىگەرلەرىڭىز ءاردايىم جارقىن جەڭىستەرگە جەتەلەيدى دەپ سەنەمىن», دەدى سەنات سپيكەرى.
سونىمەن قاتار م.اشىمباەۆ قازاقستان بوچچا فەدەراتسياسىنىڭ قىزمەتىن قورىتىندىلاپ, الداعى جۇمىس جوسپارىنا توقتالدى. ونىڭ ايتۋىنشا, وتاندىق پاراسپورتشىلاردىڭ ىرگەلى جارىستارداعى جەڭىستەرىنىڭ ارقاسىندا ءوتىپ بارا جاتقان جىل تابىستى بولدى.
اتاپ ايتقاندا, بيىل بوچچادان اشىق رەسپۋبليكالىق تۋرنير, قازاقستان چەمپيوناتى مەن ەل كۋبوگى ءۇشىن جارىستار جانە بىرنەشە ماڭىزدى ءىس-شارا ۇيىمداستىرىلدى. سونداي-اق جاتتىقتىرۋشىلار مەن تورەشىلەر رەسمي اتتەستاتسيالاۋدان وتكىزىلدى. بۇل سپورتشىلاردى حالىقارالىق ستاندارتتار بويىنشا جاتتىقتىرۋعا جول اشادى. ودان بولەك, بوچچادان ۇلتتىق قۇرامانىڭ قۇرامى جاڭارتىلدى.
«سپورتشىلارىمىز وتاندىق جانە الەمدىك جارىستاردا بەلسەندىلىك تانىتا ءبىلدى. وسى رەتتە بوچچادان حالىقارالىق چەللەندجەرلەردى ەرەكشە اتاپ وتكىم كەلەدى. سول سايىستاردا قازاقستان قۇراماسى ايتارلىقتاي ناتيجەلەرگە قول جەتكىزدى. سونداي-اق ەلىمىزدە بوچچاشىلار قاۋىمداستىعىنىڭ دامۋ قارقىنى كوڭىل قۋانتادى. قازىرگى تاڭدا 20 ءوڭىردىڭ 11-ىندە بوچچا ۇيىرمەلەرى رەسمي تۇردە جۇمىس ىستەپ كەلەدى. الداعى ۋاقىتتا بۇكىل ەلدى قامتۋدى جوسپارلاپ وتىرمىز. تاعى ءبىر ايتا كەتەر جايت, 12 پارااتلەتىمىز «قازاقستان رەسپۋبليكاسىنىڭ سپورت شەبەرى» اتاندى. جاسوسپىرىمدەر قاتارىنان تاعى 10 اتلەت سپورت شەبەرىنە ۇمىتكەرلەر ساناتىنا قوسىلدى. كەلەسى جىلى «Astana Boccia Challenger» ءىرى حالىقارالىق ءتۋرنيرى وتەدى. 20-عا جۋىق ەلدىڭ وكىلدەرى قاتىساتىن بۇل سايىس الداعى جىلدىڭ باستى وقيعاسى بولماق», دەپ م.اشىمباەۆ وسىنداي اۋقىمدى جۇمىستىڭ جۇيەلى جۇرگىزىلۋىنە بەلسەندى اتسالىسىپ, قولداۋ كورسەتىپ كەلە جاتقان سپورتشىلارعا, اتا-انالارعا, جاتتىقتىرۋشىلار مەن تورەشىلەرگە العىس ءبىلدىردى.
ايتا كەتەيىك, بيىل فينليانديادا وتكەن حالىقارالىق جارىستا وتاندىق بوچچاشىلار جەكە جانە كوماندالىق سىندا 3-ورىن الدى. باحرەيندە بولعان ءىرى ءتۋرنيردىڭ جەكەلەي سىنىندا المات رەحات كۇمىس مەدال ەنشىلەسە, يتيانا شىڭعىسحانوۆا قولا جۇلدەگە قول جەتكىزدى. سونداي-اق رۋسلان ەرەمباەۆ پەن ەلميرا مۇسىراليەۆا جۇپتىق جارىستا ءۇشىنشى ورىننان كورىندى. ال قۋانىش اسقاربەكوۆ, الەكساندر كۋرمانتاەۆ جانە يتيانا شىڭعىسحانوۆا كوماندالىق سايىستا جەڭىس تۇعىرىنىڭ ەكىنشى ساتىسىنا جايعاسقان ەدى.
