ەلباسى حالىقتى قازاقستان حالقىنىڭ بىرلىگى كۇنىمەن قۇتتىقتادى

استانا. 1 مامىر. بۇگىن قازاقستان حالقىنىڭ بىرلىگى كۇنى مەرەكەسىنە وراي ەلىمىزدىڭ بارلىق جەرىندە ارنايى ءىس-شارالار وتۋدە. استانا قالاسىندا «قازاق ەلى» مونۋمەنتى الدىنداعى الاڭدا «نۇرلى جول – جەڭىس جولى» اتتى مەرەكەلىك شارا ۇيىمداستىرىلدى. وعان مەملەكەت باسشىسى نۇرسۇلتان نازارباەۆ قاتىسىپ, حالىقتى مەرەكەمەن قۇتتىقتادى. بۇل تۋرالى akorda.kz حابارلادى. ەلباسى قازاقستان حالقىن مەرەكەمەن قۇتتىقتاپ, وتكەن سايلاۋدا ەل ازاماتتارى كۇش-جىگەرى مەن بىرلىگىن بۇكىل الەمگە تانىتقانىن اتاپ ءوتتى. «كوپەتنوستى حالىقتىڭ تۇتاستىعى مەن تۇراقتىلىعى ارقاسىندا قازاقستان زور تابىستارعا جەتتى. ەل الدىندا تۇرعان مىندەتتەردى ورىنداۋ ءۇشىن بىرلىكتى ساقتاۋ كەرەك», – دەدى نۇرسۇلتان نازارباەۆ. سونداي-اق, قازاقستان پرەزيدەنتى كورسەتكەن سەنىمى مەن قولداۋى ءۇشىن بارشا حالىققا العىسىن ءبىلدىردى. «مەنى قولداعان بارلىق قازاقستاندىقتارعا العىس ايتقىم كەلەدى. ماعان وسى كۇندەرى ەلىمىز بەن الەمنىڭ سان تاراپىنان, ءتۇرلى سالا وكىلدەرىنەن مىڭداعان قۇتتىقتاۋ حاتتار مەن جەدەلحاتتار, تەلەفون قوڭىراۋلارى كەلىپ تۇسۋدە. بارىنە ۇلكەن راحمەت ايتامىن. وسىنداي حالىققا قىزمەت ەتۋ – ۇلى مارتەبە. مەن ءوزىمدى وسى جۇمىسقا ارناعان اداممىن جانە قازاقستاننىڭ العا ىلگەرىلەۋى ءۇشىن, ءبىزدى بۇكىل الەم قۇرمەتتەۋى ءۇشىن جانە ەل الدىندا تۇرعان مىندەتتەردى تابىستى جۇزەگە اسىرۋ ءۇشىن ءبارىن جاسايتىن بولامىن. ءبىز مۇنى ەلدىڭ جانە بولاشاق ۇرپاقتىڭ الدىنداعى پارىزىمىزدى ورىندادىق دەپ ايتۋ ءۇشىن اتقارۋعا ءتيىسپىز», – دەدى مەملەكەت باسشىسى. سوڭىندا نۇرسۇلتان نازارباەۆ بارشا قازاقستاندىقتارعا باق-بەرەكە جانە تابىس تىلەدى. مەرەكەلىك شارا اياسىندا كونتسەرتتىك باعدارلاما ءوتىپ, وعان قازاقستاننىڭ ەسترادا جۇلدىزدارى, ەلوردالىق جانە وڭىرلىك ەتنومادەني بىرلەستىكتەر وكىلدەرى, سونداي-اق, رەسپۋبليكانىڭ شىعارماشىلىق ۇجىمدارى قاتىستى. الاڭ اۋماعىندا ەتنواۋىل قۇرىلىپ, ەلوردانىڭ عانا ەمەس, ەلدىڭ باسقا قالالارىنىڭ دا ەتنومادەني بىرلەستىكتەرى ءوز ۇلتىنىڭ مادەنيەتىن, بولمىسىن, دوستىق ءداستۇرى مەن قوناقجايلىعىن پاش ەتتى. ەلامان قوڭىر. دەرەك, سۋرەت: akorda.kz.