پالاتا سپيكەرى سپەكتاكل مەن جازۋشىنىڭ جالپى شىعارماشىلىعى وتباسىن ساقتاۋ, باردى باعالاۋ سياقتى ادامگەرشىلىك قۇندىلىقتاردى دارىپتەيتىنىن اتاپ ءوتتى. ءتالىمى مەن تاعىلىمى ەشقاشان ەسكىرمەيتىن, سول ارقىلى ءالى تالاي بۋىنعا ونەگە بەرەتىن مۇنداي تۋىندىلار ۇلتتىق ادەبيەتتىڭ جانە مادەنيەتتىڭ قۇندى قازىناسى ەكەنى انىق.
ايتا كەتەيىك, «گاۋھارتاس» مۋزىكالىق دراماسى – «UMAI-2023» ۇلتتىق سىيلىعىنىڭ «تەاتر ونەرى» اتالىمى بويىنشا «ۇزدىك سپەكتاكل» اتانعان العاشقى قويىلىم. سپەكتاكلدىڭ قويۋشى رەجيسسەرى – قازاقستاننىڭ ەڭبەك سىڭىرگەن قايراتكەرى, مۋزىكالىق جاس كورەرمەندەر تەاترىنىڭ ديرەكتورى, بىلىكتى ۇستاز اسحات ماەميروۆ.
دۋلات يسابەكوۆتىڭ «گاۋھارتاس» پوۆەسى 1967 جىلى جازىلعان. شىعارمادا وتباسىلىق قۇندىلىقتىڭ ماڭىزى جانە ايەلدى قۇرمەتتەۋ سياقتى قازىرگى كەزدە دە وتە وزەكتى سانالاتىن تاقىرىپ قوزعالادى.
استانا قالاسى اكىمدىگىنىڭ مۋزىكالىق جاس كورەرمەن تەاترى «گاۋھارتاس» مۋزىكالىق دراماسىن ساحنالاعان ءبىر جىل ون ايدىڭ ىشىندە حالىقتىڭ كوزايىمىنا اينالىپ, كورەرمەن نازارىنا 250 مارتە ۇسىنىلىپ, قازاقستان مەن ەۋرازيانىڭ تەاتر كەڭىستىگىندە رەكوردتىق كورسەتكىشكە قول جەتكىزدى. سپەكتاكلدىڭ ءار قويىلىمى انشلاگپەن ءوتىپ, بۇگىنگى تاڭعا دەيىن 100 مىڭنان اسا كورەرمەن تاماشالادى.
قويىلىم ەلوردامىزدان بولەك الماتى, اقتاۋ, اتىراۋ, ورال, تالدىقورعان, تاراز, شىمكەنت, تۇركىستان, وسكەمەن, سەمەي, جاڭاوزەن قالالارىندا, سونىمەن قاتار باياناۋىل, ويىل, سىرىم, قاراتوبە اۋداندارىندا كورسەتىلگەن ەدى. بۇعان قوسا استانا قالاسىنىڭ ماسكەۋدەگى مادەنيەت كۇندەرى اياسىندا ماسكەۋ مەملەكەتتىك «دراما ونەرىنىڭ مەكتەبى» تەاترىندا كورسەتىلدى.
