كوپشىلىك كۇتكەن قۋانىشتى ءسات ەدى. سەبەبى كىتاپحانا عيماراتى پايدالانۋعا بەرىلگەلى قىرىق جىل وتسە دە, جوندەۋ كورمەگەن. ەندى مىنە, اجارلانىپ, تولعان ايداي تولىقسىپ, جاڭارعان. يگىلىكتى ءىستىڭ اياسىندا قازاقستاننىڭ حالىق جازۋشىسى ساكەن ءجۇنىسوۆتىڭ تۋعانىنا 90 جىل تولۋىنا وراي «سەرىلەردىڭ سوڭعىسى» تاقىرىبىندا عىلىمي-تاجىريبەلىك كونفەرەنتسيا ۇيىمداستىرىلدى. جاڭارعان عيماراتتىڭ قوس قاناتىندا ساكەن ءجۇنىسوۆ پەن جازۋشى-دراماتۋرگ, اقىن تولەگەن قاجىباەۆ اتىنداعى ءماجىلىس زالى مەن مۋزەي كابينەتىنىڭ لەنتاسى قيىلدى.
– ۇلى ماعجاننىڭ قوس قاناتىندا ويلى وقىرماننان وڭ باعاسىن العان ەكى اعامىز تۇرسا, جاراسپاي ما؟ بۇل ءبىزدىڭ وڭىردە بۇرىن-سوڭدى بولماعان جاڭالىق, – دەيدى كىتاپحانا ديرەكتورى, اقىن قۋانىش وسپان.
تولەگەن قاجىباەۆ اتىنداعى مۋزەي-كابينەت كوزى قاراقتى وقىرماننىڭ كوزايىمىنا اينالارى ءسوزسىز. كابينەتكە اقىننان قالعان جادىگەرلەرى, قىرۋار قولجازباسى, تىرناقالدى تۋىندىسىنان باستاپ, ەڭ سوڭعى رومانىنا دەيىن قويىلعان ەكەن. جەكە زاتتارى, جىلدار بويى جيناعان كىتاپتارى, وردەندەرى مەن مەدالدارى, وزگە دە ماراپاتتارى, كوزگە سونشالىقتى ىستىق كورىنەتىن فوتوسۋرەتتەر دە بار.
«زامانىمىزدىڭ زاڭعار جازۋشىسى ءابىش كەكىلباەۆ ايتقانداي, «ادامدى ادام ەتكەن – كىتاپ, ادامزات ەتكەن – كىتاپحانا» دەدى قۇتتىقتاۋ سوزىندە جازۋشى-دراماتۋرگ جابال ەرعاليەۆ. ساكەن سەرى رۋحى تاۋەلسىز سۋرەتكەر ەدى عوي. ەلدىڭ ءسوزىن, مۇڭى مەن زارىن ايتىپ كەتتى. حالقىنا قالتقىسىز قىزمەت ەتكەن قالامگەرگە قانداي قۇرمەت كورسەتسەك تە لايىقتى.
قۇرقىلتايدىڭ ۇياسىنداي جىپ-جىلى, جاپ-جارىق, قۇرىلىسشىنىڭ قالاعىنان جاڭا شىققانداي جارقىراعان كىتاپحانادا تانىمدىق ءىس-شارا ۇيىمداستىرىلىپ, ادەبيەتكە ىنتىق ەلگە تەلەگەي تەڭىز رۋحاني كۇش-قۋات سىيلادى.
كوكشەتاۋ
