فوتو: primeminister.kz
ەلىمىزدەگى ەڭ ۇزىن كوپىردىڭ اشىلۋىنا مەملەكەت باسشىسىنىڭ تاپسىرماسى بويىنشا پرەمەر-مينيستر ولجاس بەكتەنوۆ قاتىستى.
ايتا كەتەيىك, بۇل جوبا كولىك قاتىناسىنا قاتىستى كوپ جىلعى ماسەلەنى شەشۋگە باعىتتالعان. كوپىر التى اۋداندى – كۇرشىم, ۇلكەن نارىن, مارقاكول, قاتونقاراعاي, تارباعاتاي جانە زايسان اۋداندارىن بايلانىستىرىپ تۇر.
ەكى جولاقتى اۆتوموبيل كوپىرىنىڭ ۇزىندىعى 1316 مەتردى قۇرايدى. كوپىر تاۋلىگىنە 80 مىڭعا دەيىن كولىك وتكىزە الادى, وتكەلگە 18 شاقىرىم جاڭا جول تارتىلعان. جوبا وزىق ينجەنەرلىك تەحنولوگيالاردى قولدانا وتىرىپ, بارلىق ساپا ستاندارتتارىنا سايكەس جۇزەگە اسىرىلعان.
شىعىس قازاقستان - ماڭىزدى كولىك دالىزدەرى وتەتىن ستراتەگيالىق ايماق. بۇقتىرما سۋ قويماسى ارقىلى وتەتىن كوپىر لوگيستيكالىق باعىتتاردى جاقسارتىپ, شەكارالاس ەلدەرمەن ۇزدىكسىز بايلانىستى قامتاماسىز ەتەدى. ودان بولەك, جاڭا كوپىر ءوڭىر تۇرعىندارىنىڭ ىڭعايىنا قاراي بوي تۇزەگەنىن دە ايتا كەتۋ كەرەك. بۇل تۋرالى ۇكىمەت باسشىسى ولجاس بەكتەنوۆ تە ايتا كەتكەن.
«جاڭا كوپىر مەملەكەت باسشىسىنىڭ تاپسىرماسى بويىنشا تۇرعىنداردىڭ جايلىلىعى مەن قاۋىپسىزدىگىن ارتتىرۋ ماقساتىندا سالىندى. ايماقتا تۇرعىندار 50 جىل بويى جازدا نە پاروممەن, قىستا تىكەلەي نە مۇز ۇستىمەن جۇرگەنىن بىلەسىزدەر. قۇرىلىستىڭ سالىنۋىن جەرگىلىكتى تۇرعىندار ۇزاق كۇتتى», دەگەن ەدى پرەمەر-مينيستر.
بۇگىندە جاڭا قۇرىلىستىڭ يگىلىگىن كورىپ جۇرگەن ايماق تۇرعىندارى كوپىر سۋ قويماسىنىڭ ەكى جاعىنداعى ەلدى مەكەندەر اراسىنداعى كولىك قاتىناسىن ەداۋىر جاقسارتقانىن, بۇل كولىكتەردىڭ جەڭىل قاتىناۋىن قامتاماسىز ەتكەنىن, تاۋارلار قوزعالىسىن جەدەلدەتكەنىن, قىزمەتتەرگە قولجەتىمدىلىك ارتقانىن, سونداي-اق وبلىستىڭ تۋريستىك الەۋەتى ەداۋىر اشىلعانىن العا تارتىپ وتىر.
ايتا كەتەتىنى, كوپىردىڭ قۇرىلىسىنا, جالپى, جوبانىڭ ىسكە اسىرىلۋىنا تەك قازاقستان ماماندارى تارتىلعان ەكەن. بۇل ءوز كەزەگىندە جاڭا جۇمىس ورىندارىنىڭ اشىلۋىنا مۇمكىندىك بەرگەن. پرەمەر-مينيستر الداعى ۋاقىتتا دا مۇنداي ءىرى جوبالاردى جۇزەگە اسىرۋ بارىسىندا وتاندىق ماماندار مەن مەردىگەر كومپانيالاردى تارتۋعا ەرەكشە نازار اۋدارىلاتىنىن العا تارتقان.
ء«ارى جۇمىس بەرىپ ءارى ينفراقۇرىلىمدىق بايلانىس پەن دامۋدى قامتاماسىز ەتەتىن مەگاجوبالار كوپ بولۋى كەرەك. سىرتتان ەشكىمدى تارتپاي-اق, ءبىزدىڭ ءوز قۇزىرەتىمىز دە جەتكىلىكتى. وسىنداي رەسپۋبليكالىق ماڭىزى بار ءىرى جوبالاردى جۇزەگە اسىرۋدى جالعاستىرامىز», دەدى ولجاس بەكتەنوۆ.
شىعىس ءوڭىرى قازبا بايلىققا باي ەكەنى بەلگىلى. جاڭا كوپىر سول بايلىقتى يگەرۋگە مۇمكىندىك بەرىپ وتىر. الداعى ۋاقىتتا دا ءتۋريزمنىڭ جاندانۋىنا جاعداي جاساپ, ايماقتىڭ قايتا تۇلەۋىنە سەپ بولادى دەگەن سەنىمدەمىز.
