تۇلەكتەردى گرانتپەن قامتاماسىز ەتە الماي وتىرمىز - دەپۋتات

«پرەزيدەنت قاسىم-جومارت توقاەۆ جاستارىمىز ءۇش نارسەنىڭ ايرىقشا ماڭىزدى ەكەنىن ءتۇسىنۋى كەرەك ەكەنىن ايتقان. بۇل – تەرەڭ ءبىلىم, ەڭبەكقورلىق جانە وتانشىلدىق قاسيەت. جاستار تەرەڭ ءبىلىم الۋى ءۇشىن جوعارى ءبىلىم الۋدا قيىندىق كورمەۋى ءتيىس. بۇل – وتە ماڭىزدى اسپەكت», دەدى دەپۋتات.

اشىق دەرەكتەرگە زەر سالساق, 2021-2022 وقۋ جىلى 170 مىڭنان استام تۇلەك مەكتەپتى بىتىرسە, 56 مىڭنان استام تالاپكەر باكالاۆر بويىنشا مەملەكەتتىك گرانتقا يە بولعان. ال 2022-2023 جىلى 172 تۇلەك بىتىرسە, 73 مىڭداي گرانت بولىنگەن.

«بۇل گرانتپەن قامتاماسىز ەتە الماي وتىرعانىمىزدى كورسەتەدى. كوللەدجدەرگە تۇسەتىنى دە بار دەسەك تە, جىل سايىن اقىلى وقۋعا تاپسىراتىندار از ەمەس. جوو-دا اقىلى ءبىلىم الۋعا قاراپايىم حالىقتىڭ قالتاسى كوتەرە مە؟ ماسەلە وسىدان تۋىندايدى. سالىستىرايىق, نازارباەۆ ۋنيۆەرسيتەتىندە ءبىر جىلدىق وقۋ اقىسى 7,5-9 ميلليون تەڭگەنى قۇرايدى. جىل سايىن كيمەپ ۋنيۆەرسيتەتىندە 4,1 ميلليون تەڭگە, قازاق-بريتان تەحنيكالىق ۋنيۆەرسيتەتىندە – 2,4 ميلليون تەڭگە, سۇلەيمەن دەميرەل اتىنداعى ۋنيۆەرسيتەتتە 2,1 ميلليون تەڭگەنى شىعىنداۋعا تۋرا كەلەدى. ءال-فارابي اتىنداعى قازاق ۇلتتىق ۋنيۆەرسيتەتىندە 1,6 ميلليون تەڭگە, ماقسۇت نارىكباەۆ ۋنيۆەرسيتەتىندە – 1,5 ميلليون تەڭگە, ساتباەۆ ۋنيۆەرسيتەتى مەن اسفەندياروۆ اتىنداعى ۇلتتىق مەديتسينا ۋنيۆەرسيتەتىندە – 1,4 ميلليون تەڭگە, ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە – 1,3 ميلليون تەڭگە, اباي اتىنداعى قازاق ۇلتتىق پەداگوگيكالىق ۋنيۆەرسيتەتىندە – 1,1 ميلليون تەڭگە, ابىلايحان اتىنداعى قازاق حالىقارالىق قاتىناستار ۋنيۆەرسيتەتىندە - 1 ميلليون تەڭگە تولەيتىنى بەلگىلى», دەدى دەپۋتات.

دەپۋتات ساۋالىندا ۋنيۆەرسيتەتتەر تالاپكەرمەن كەلىسىم-شارتقا وتىرعان كەزدە, «ينفلياتسيا دەڭگەيىنە قاراي وقۋ اقىسى كوتەرىلەدى» دەگەن تاراۋ قوسىلعانىن, بۇل – تۇتىنۋشىلاردىڭ قۇقىعىن شەكتەۋ ەكەنىن ايتتى.

«قىركۇيەك ايىندا 1 ميلليون تەڭگەمەن كەلىسىم جاساعان ستۋدەنتتەر وقۋ جىلى اياقتالعانعا دەيىن 100-200 مىڭ تەڭگە قوسىپ تولەۋگە ءماجبۇر بولادى. وسى ۋاقىتتا ونىڭ اتا-اناسىنىڭ جالاقىسى كوتەرىلسە جاقسى عوي! بىراق ونداي ۇدەرىستى بايقاپ وتىرعان جوقپىز. بۇل – الەۋمەتتىك ادىلەتسىزدىك», دەدى ول.

دەپۋتاتتىڭ ايتۋىنشا, بۇل جاعدايدى عىلىم جانە جوعارى ءبىلىم مينيسترلىگى قاتاڭ باقىلاۋعا الۋى ءتيىس. مينيسترلىك وقۋ اقىسى 300-400 مىڭ تەڭگەنىڭ توڭىرەگىندە بولاتىنىن ايتسا دا, ۋنيۆەرسيتەتتەر بۇعان ءمان بەرەر ءتۇرى جوق. جاتاقحانا ماسەلەسى دە وزەكتىلىگىن جويعان جوق. ورىن جەتىسپەيدى. 3-4 كۋرس ستۋدەنتتەرى جاتاحانادان ورىن الۋى تىپتەن قيىن. كەيبىر وقۋ ورىندارىندا جاتاقحانادا ءبىر جىلدىق تۇرۋ اقىسى 1 ميلليون تەڭگەگە جەتەدى. اقىلى وقيتىندار ءۇشىن قالتاعا قوسىمشا سالماق سالادى.

«جوعارى وقۋ ورىندارى اقىسىنىڭ قىمبات بولۋى جانە جىل سايىن نەگىزسىز كوتەرىلۋى ستۋدەنتتەر مەن ولاردىڭ اتا-اناسىنىڭ الەۋمەتتىك جاعدايىن قيىنداتادى. سوعان بايلانىستى بىرىنشىدەن, جوعارى وقۋ ورىندارىندارىنداعى وقۋ اقىسىن باقىلاۋعا الۋدى, ەكىنشىدەن, ءبىر وقۋ جىلىندا اقىلى ءبىلىم الۋدى بىرنەشە رەت كوتەرۋدى شەكتەۋدى, ۇشىنشىدەن, جاتاقحانامەن قامتۋدى جانە وندا تۇرۋ اقىسىن قايتا قاراۋدى ۇسىنامىن», دەپ تۇيىندەدى قايرات بالابيەۆ.