تەاتردىڭ جەتەكشى سوليستەرى, قازاقستاننىڭ ەڭبەك سىڭىرگەن قايراتكەرلەرى – ايگەرىم بەكەتاەۆا, باقتيار ادامجان, ەركىن راحماتۋللاەۆ, سونداي-اق حالىقارالىق بايقاۋلاردىڭ لاۋرەاتتارى, سوليستەر شۇعىلا ادەپحان, سوفيا ءادىلحانوۆا, دياس قۇرمانعازى جانە كوردەبالەت ارتىستەرى دۋباي تورىندە التى كۇن بويى قىسقى عاجايىپتاردىڭ عالامات اتموسفەراسىن سىيلادى.
تەاتر تاريحىنا ۇڭىلسەك, «ششەلكۋنچيك» بالەتى الەمنىڭ كوپتەگەن تەاترىندا ءتۇرلى قولتاڭبادا قويىلعان. ال ونىڭ ءتول نۇسقادا ساراپتالعان جاڭاشىل قويىلىمىنداعى ەلوردالىق ترۋپپانىڭ جوعارى ورىنداۋشىلىق دەڭگەيى «دۋباي وپەرا» ۇجىمىنىڭ دا ايرىقشا نازارىن اۋداردى.
«استانا وپەرا» الەمدە عانا ەمەس, وسىندا, دۋبايدا دا تانىمال ءارى ورەلى ونەرىمەن ءبىزدىڭ ەلىمىز ءۇشىن دە سىيلى. وتكەن ماۋسىم زور جەتىستىكپەن ەستە قالدى, ترۋپپانىڭ سونداعى جارقىن ونەر كورسەتۋىنەن كەيىن ايتۋلى ۇجىمدى قايتا شاقىرۋدى ۇيعاردىق. بۇل جولى دا بيلەتتەر تولىعىمەن ساتىلىپ, بيىلعى تابىسىمىز ءبىز ويلاعاننان دا اسىپ ءتۇستى. بۇل «استانا وپەرانى» العاش كورۋدى قالاعان نەمەسە ونى بۇرىننان جاقسى كورەتىن دۋباي جۇرتشىلىعىنىڭ وسى ۇجىممەن كەزدەسۋدى تاعاتسىزدانا كۇتكەنىن دالەلدەيدى. ترۋپپانىڭ قۇرامىندا تەاترعا ايرىقشا ەنەرگيا ۇستەيتىن جاس دارىنداردى كورۋ كوڭىلگە ەرەكشە قۋانىش ۇيالاتادى. «استانا وپەرا» – ورىنداۋشىلىق ونەر الەمىنە قاتىسى بار بارلىق جانعا شابىت بەرەتىن جوعارى كوركەمدىك شەبەرلىكتىڭ جارقىن ۇلگىسى», دەپ اتاپ ءوتتى «دۋباي وپەرا» تەاترىنىڭ ديرەكتورى پاولو پەتروچەللي.
دۋبايداعى التى ونەر كورسەتۋدىڭ ارقايسىسى كورەرمەندەردىڭ دۋ قول شاپالاعى مەن تاڭدانىسىنا ۇلاستى. بالەت ترۋپپاسى جوعارى شەبەرلىك دەڭگەيىن پاش ەتىپ, وتاندىق ارتىستەردىڭ ونەرى قالا تۇرعىندارى مەن قوناقتارىنا ۇمىتىلماس اسەر قالدىردى. زالدا وتىرعان قالىڭ كورەرمەن دە قويىلىمنان كەيىن ءوز اسەرىن قۋانا ءبولىسىپ جاتتى. سونىڭ ءبىرى – اقش ازاماتى زەيدان سالەي.
«ارتىستەردىڭ بارلىعى شىنىمەن دە تاماشا جۇمىس اتقاردى. بۇل تاڭعالارلىق اتموسفەرالىق مۋزىكامەن سۇيەمەلدەنگەن ۇزدىك ءارى جىگەرلى بالەت بولدى. «دۋباي وپەراعا» العاش رەت كەلىپ وتىرمىن, وسىعان دەيىن اقش پەن ەۋروپاداعى وپەرا تەاترلارىندا بولسام دا, مۇنداي عاجايىپتى ەش جەردەن كورمەپپىن. بۇل – بۇرىن-سوڭدى تاماشالاعان سپەكتاكلدەرىمنىڭ ىشىندەگى ەڭ ۇزدىگى. «استانا وپەرا» ترۋپپاسىنىڭ ونەر كورسەتۋى ساناما ۇلكەن سىلكىنىس اكەلدى دەسەم, ارتىق ايتپاعانىم. بارلىعى 10 بيلەت ساتىپ الىپ, مۇندا وتباسىممەن جانە دوستارىممەن كەلدىم, بۇگىنگى كەش سوعان تۇرارلىقتاي بولدى. ادەمى قويىلىم تاماشالاپ, كەرەمەت ۋاقىت وتكىزدىك. اسىرەسە زالداعى جاھاندىق اتموسفەراعا تاڭعالدىم: مۇندا الەمنىڭ ءار قيىرىنان كورەرمەندەر – امەريكالىقتار, ورىستار, ارابتار, ۇندىستەر, وڭتۇستىك شىعىس ازيا, قىتاي, جاپونيا تۇرعىندارى جينالىپتى. وسى رەتتە مۋزىكانتتاردى دا اتاپ وتكىم كەلەدى, ولار تاڭعالارلىق دالدىكپەن جانە سەنىمدىلىكپەن وينادى. ارتىستەردىڭ ونەر كورسەتۋى جارقىن ءارى اسەرلى بولدى. بۇل كەش كوپكە دەيىن ەسىمدە قالارى ءسوزسىز» دەپ قويىلىمنان العان اسەرىن ىركىمەدى.
دۋبايعا مەكسيكادان كەلگەن كورەرمەن ارتۋرو پەرەس ريۆەرا دا ونىڭ سوزىمەن كەلىستى. – كەرەمەت ونەر كورسەتۋگە كۋا بولدىم. وسىناۋ سپەكتاكلدىڭ اۋقىمدىلىعىنا ءتانتىمىن. دۋبايعا مەحيكودان ارنايى ۇشىپ كەلىپ, «ششەلكۋنچيكتى» اسىعا كۇتكەن ەدىم. وپەرا تەاترىنىڭ ساحناسىنان ءسانى مەن سالتاناتى كەلىسكەن كوستيۋم, دەكوراتسيالار ءھام كورسە كوز تويعىسىز اسەم بوياۋلاردى كورە العانىما قاتتى قۋانىشتىمىن. شىنىمەن دە جوعارى دەڭگەيدەگى ترۋپپانىڭ ونەر كورسەتۋىنە كۋا بولدىق, دەدى ارتۋرو پەرەس ريۆەرا.
ال ماەسترو دجۋزەپپە اكۋاۆيۆانىڭ سوزىنشە, بۇل عاجايىپ گاسترولدىك كەشتەردە «دۋباي وپەرا» شاعىن جەر شارىن ەسكە سالىپ, وندا بارلىق ەل مەن ۇلت وكىلدەرى جينالعانداي اسەر
ەتىپتى.
– مادەنيەت – ادامدار مەن ەلدەر اراسىندا كوپىر سالۋعا كەرەمەت مۇمكىندىك. مەن ءوزىمنىڭ بارلىق مانسابىمدى وسى بايلانىستاردى قۇرۋعا جانە دامىتۋعا ارنادىم, دەگەن «استانا وپەرا» سيمفونيالىق وركەسترىنىڭ ديريجەرى دجۋزەپپە اكۋاۆيۆا ءسوزىن ءارى قاراي جالعادى: – ءبىز مۇندا وسىمەن ەكىنشى رەت ونەر كورسەتىپ وتىرمىز. البەتتە, بۇل – كەرەمەت تاجىريبە. بىلتىر بەس سپەكتاكل وتكىزىپ, ونىڭ بارىندە انشلاگ بولعان ەدى. بيىلعى ۇسىنعان التى قويىلىمىمىز دا لىق تولى زال جينادى. كورەرمەندەردىڭ جۇرەگىنەن ورىن العان جۇمىسىمىزدى ماقتان ەتەمىن. «استانا وپەرانىڭ» كەرەمەت وركەسترىنە ديريجەرلىك ەتىپ, وسىنداي بەدەلدى ساحنادا ونەر كورسەتكەن كەزىمدە مەن ءاردايىم زور قۋانىش پەن تولقىنىستى سەزىنەمىن, دەپ اتاپ ءوتتى ماەسترو دجۋزەپپە اكۋاۆيۆا.
مادەنيەت جانە اقپارات مينيسترلىگىنىڭ قولداۋىمەن جۇزەگە اسىرىلعان «استانا وپەرا» تەاترىنىڭ شىعارماشىلىق ومىرىندەگى ماڭىزدى گاسترول وتاندىق بالەت مەكتەبىنىڭ جوعارى كاسىبيلىگىن حالىقارالىق ارەنادا, الەمنىڭ مادەني جانە ەكونوميكالىق ورتالىعى دۋبايدا وسىلايشا زور ابىروي, تەڭدەسسىز داڭق بيىگىندە پاش ەتىپ قايتتى.
