كەش بارىسىندا جىل قورىتىندىلاندى. بيىل ەرەكشەلەنگەن سپورتشىلارعا قۇرمەت كورسەتىلدى. ولار باعالى سىيلىقتارمەن ماراپاتتالدى. ەل چەمپيوندارى مەن ءتۇرلى رەسپۋبليكالىق بايقاۋلاردىڭ جەڭىمپازدارى دا ماقتاۋ, ماراپاتتان قۇر قالمادى. مەرەكەلىك باعدارلاماعا جاس سپورتشىلاردىڭ اتا-انالارى مەن باپكەرلەرى دە قاتىستى. سپورت پەن دەنەشىنىقتىرۋدى دامىتۋعا قوسقان ۇلەستەرى ءۇشىن العىسحاتتار تابىستالىپ, سىيلىق ۇلەستىرىلدى. كورەرمەن كادەت سىنىبىنىڭ قويىلىمدارىن تاماشالادى. «دينامو» اۋلا كلۋبىنىڭ قىزمەتكەرلەرى مەن جاس قاتىسۋشىلار كونتسەرتتىك باعدارلامادا بار ونەرىن ورتاعا سالدى.
مەرەكەلىك كەشكە كەلگەن قالا اكىمدىگىنىڭ «استانا جاستارى» جاستار رەسۋرستىق ورتالىعى اۋلا كلۋبتارىن دامىتۋ ءبولىمىنىڭ باسشىسى ولجاس حاميتوۆ, اۋلا كلۋبىنىڭ جاستارعا بەرەرى مول ەكەنىن ايتتى.
«استانا قالاسى اكىمدىگىنىڭ «استانا جاستارى» جاستار رەسۋرستىق ورتالىعى جانە قالالىق پوليتسيا دەپارتامەنتى جاستار مەن بۇلدىرشىندەرگە, قالاداعى اۋلا كلۋبتارىنىڭ تاربيەلەنۋشىلەرىنە جاڭا جىلدىق مەرەكە وتكىزۋدى ۇيعاردى. بۇگىن مىنە, جىل بويى كوزگە تۇسكەن, ءتۇرلى دودالاردا دارالانعان ۇزدىكتەردى جەكە ماراپاتتادىق. نەگىزى «دينامو» اۋلا كلۋبى بۇل سپورتپەن شۇعىلداناتىن ورىن عانا ەمەس, الەۋمەتتىك داعدىنى دامىتاتىن ۇلكەن ورتا سانالادى. مىسالى, مۇندا روبوتتەحنيكا, تاۋعا ورمەلەۋ جانە نىسانا كوزدەۋ سياقتى ۇيىرمەلەر دە بار», دەيدى و.حاميتوۆ.
ءيا, اۋلا كلۋبىندا كامەلەتكە تولماعاندار ءىسى بويىنشا ينسپەكتسياسىنىڭ ەسەبىندە تۇرعان جاسوسپىرىمدەر دە شىنىعىپ, سالاۋاتتى ءومىر سالتىن ۇستانادى ەكەن. بۇگىندە كلۋب قاراپ قالماي, بىرنەشە فەدەراتسيامەن ىنتىماقتاستىق ورناتقان. وسى ارقىلى الدا بولاشاعىنان كوپ ءۇمىت كۇتتىرەتىن جاستاردىڭ شەبەرلىگى شىڭدالادى دەسەدى.
جاڭا جىل كەشىندە «دينامو» دەنەشىنىقتىرۋ جانە سپورتتىق قوعامىنىڭ تاربيەلەنۋشىسى ادەمى جالعاسباەۆا سپورتتاعى ۇزدىك ناتيجەلەرى ءۇشىن سىي-قۇرمەتكە بولەنىپ, ماراپاتتالدى.
«تحەكۆوندومەن 10 جىلدان بەرى شۇعىلدانامىن. قارا بەلبەۋ ەكىنشى دان يەگەرىمىن. سپورتقا باۋلىپ, جەڭىسكە جەتۋىمە سەبەپشى بولىپ جۇرگەن باپكەرىمە العىس ايتامىن. «دينامو» سپورت كلۋبى بۇگىن ءبىزدى ماراپاتتاپ, مەرەيىمىزدى اسىردى. بيىلعى سپورت جىلىندا جاعىمدى جاڭالىق كوپ ەكەن. مىسالى, «دينامو» اۋلا كلۋبىنىڭ 5 تاربيەلەنۋشىسى تحەكۆوندودان ۇلتتىق قۇراما ساپىنا الىندى. ارينە, بۇل ءبىز ءۇشىن ۇلكەن قۋانىش», دەيدى تحەكۆوندوشى قىز ادەمى جالعاسباەۆا.
قازىردە اۋلا كلۋبىندا شىنىعىپ جۇرگەن ورەندەردى اراسىندا بوكس جانە قويان-قولتىق ۇرىستان سپورت شەبەرلەرى مەن سپورت شەبەرلىگىنە ۇمىتكەرلەر بار. جالپى مۇنداعى 12 ۇيىرمەگە 500-گە جۋىق بالا قاتىناسا, ونىڭ ىشىندە 120 بالا سپورتقا تەگىن قاتىسادى. سپورت كلۋبىنداعى جاستار مەن جاسوسپىرىمدەر كەلەر جىلى دا مول تابىسقا جەتىپ, جەڭىمپازداردىڭ مەرەيى ۇستەم بولسىن دەيمىز.
