«جاستارعا جۇمىس» جوباسىنىڭ ماقساتى – جۇمىس ىزدەگەن جاستاردى جەرگىلىكتى كاسىپورىندارمەن بايلانىستىرۋ جانە وڭىردەگى جۇمىسسىزدىق دەڭگەيىن تومەندەتۋ. اتالعان جارمەڭكەگە 97 كاسىپورىن قاتىسىپ, 700-گە جۋىق بوس جۇمىس ورنى ۇسىنىلعان.
«قازىرگى تاڭدا الماتى وبلىسىندا 280 مىڭعا جۋىق جاس بار. ولاردىڭ 6 مىڭعا جۋىعى جۇمىسسىز رەتىندە تىركەلگەن. وسىنداي جارمەڭكەلەر ارقىلى ءبىز جاستاردى ەڭبەك نارىعىنا بەيىمدەپ, ءوز سالالارى بويىنشا جۇمىس تابۋىنا مۇمكىندىك جاساپ وتىرمىز. بۇل شارا تەك بوس جۇمىس ورىندارىن ۇسىنۋمەن شەكتەلمەيدى. سونىمەن قاتار جاستارعا ەڭبەك نارىعىنداعى تالاپتار تۋرالى اقپارات بەرىپ, كاسىبي داعدىسىن دامىتۋعا كومەكتەسەدى. وسىنداي شارالاردىڭ ناتيجەسىندە 109 جاس مامان جۇمىسقا ورنالاستى, ال 200-گە جۋىق جاس سۇحباتتاسۋعا شاقىرىلىپ, ءوزىن كورسەتۋ مۇمكىندىگىن الدى», دەيدى «جاستار رۋحى» جاستار قاناتىنىڭ الماتى وبلىستىق فيليالى توراعاسى مەدەت بەكبەرگەنوۆ.
كاسىپورىندار ىشىندە ەرەكشە كوزگە تۇسكەندەردىڭ ءبىرى – تالعار اۋدانىنداعى «Keruen Plus» زاۋىتى. سۋ جانە جىلىتۋ جۇيەلەرىنە ارنالعان پلاستيكالىق قۇبىرلار مەن فيتينگتەر شىعاراتىن بۇل ءوندىرىس ورنى «Wuko deniz» برەندىمەن كەڭ تانىلعان. زاۋىتتىڭ جوعارى وندىرىستىك الەۋەتى مەن ساپالى ونىمدەرى ىشكى نارىقتا ۇلكەن سۇرانىسقا يە. وسى جارمەڭكە بارىسىندا كاسىپورىن 50-دەن اسا بوس جۇمىس ورنىن ۇسىنىپ, جۇمىس ىزدەۋشىلەردىڭ ۇلكەن قىزىعۋشىلىعىن تۋدىردى.
جۇمىس تاپقانداردىڭ ءبىرى – 29 جاستاعى داۋرەن ءسابيتوۆ. ول جارمەڭكەگە قاتىسقاننان كەيىن «Keruen Plus» زاۋىتىنىڭ وندىرىستىك بولىمىنە جۇمىسقا ورنالاستى. بۇرىن جۇمىسسىز بولعان ول بۇل زاۋىتتىڭ جالاقىسى, جۇمىس جاعدايى جانە مامانداردى كاسىبي دامىتۋعا باعىتتالعان مۇمكىندىكتەرىنە ريزاشىلىعىن ءبىلدىردى.
«مەن زاۋىت وكىلدەرىمەن پارتيا ۇيىمداستىرعان جارمەڭكەدە تانىستىم. ولار وزدەرىنىڭ ءوندىرىس ۇدەرىستەرى, ۇسىناتىن مۇمكىندىكتەرى تۋرالى جان-جاقتى اقپارات بەردى. قازىر ءوندىرىس ورنىندا تەحنيكالىق مامان رەتىندە قىزمەت اتقارىپ ءجۇرمىن. جۇمىسىم ۇنايدى ءارى وسىندا ءوسۋ مۇمكىندىكتەرى بار ەكەنىن سەزىنەمىن», دەيدى داۋرەن.
ايتا كەتۋ كەرەك, «Amanat» پارتياسى الماتى وبلىستىق فيليالى مەن «جاستار رۋحى» جاستار قاناتى جۇمىسقا ورنالاستىرۋ ماقساتىندا مەملەكەتتىك قولداۋ شارالارىن كەڭەيتىپ, NEET ساناتىنداعى جاستاردى وقىتۋ جانە جۇمىسپەن قامتۋ ءۇشىن ارنايى سەمينارلار ۇيىمداستىرىپ كەلەدى. سونداي-اق جىل سايىن 350 جەڭىلدەتىلگەن كرەديت بەرۋ جانە كاسىپورىنداردا 5 مىڭ جاس ءۇشىن اشىق ەسىك كۇندەرىن وتكىزۋ جوسپارلانعان. بۇل شارالار جاستار جۇمىسسىزدىعىن 3,5%-دان 2,9%-عا دەيىن تومەندەتۋگە مۇمكىندىك بەرگەنى تۋرالى پارتيانىڭ الماتى وبلىستىق فيليالىنىڭ ءباسپاسوز قىزمەتى حاباردار ەتتى.
الماتى وبلىسى
