ۇلتتىق بايانداما تانىستىرىلدى

مادەنيەت جانە اق­پارات مينيستر­لىگىنىڭ جاستار جانە وتباسى ىستەرى كوميتە­تى توراعاسىنىڭ ورىنباسارى ءبىر­جان ءالىمجانوۆ ءسوز باسىن­دا جاستار ساياساتىن ىسكە اسىرۋ­دىڭ نەگىزگى باعىتتارى مەن دامۋ پەرسپەكتيۆالارى تۋرالى ايتتى. ونىڭ ايتۋىنشا, جاستار ساياساتىنىڭ ماڭىزدى مىندەتى جاستاردىڭ ساپالى ءبىلىم الۋى مەن كاسىبي وسۋىنە مۇمكىندىك بەرىپ, جاعداي جاساۋ قاجەت.

ءوز كەزەگىندە «جاستار» عى­لىمي-زەرتتەۋ ورتالىعىنىڭ دي­رەكتورى ايسۇلۋ ەرنيازوۆا بۇگىنگى جاستار ساياساتتىڭ وبەك­تىسى عانا ەمەس, ەلدىڭ ترانسفورماتسياسىنا ەلەۋلى ۇلەس قوسا الاتىن بەلسەندى سۋبەك­تىسى بولىپ وتىرعانىن العا تارتتى. ونىڭ پىكىرىنشە, جاستار اراسىندا بۇرىن زەرتتەلمەگەن ۇردىستەردى انىقتايتىن پانارالىق زەرتتەۋلەر جۇر­گىزۋ ماڭىزدى. بۇل ولاردىڭ قۇزىرەتتەرىن دامىتۋعا, باسە­كە­گە قابىلەتتىلىگىن ارتتىرۋعا جانە وزدەرىن جۇزەگە اسىرۋعا قولايلى جاعداي جاساۋعا ىق­پال ەتپەك.

زەرتتەۋشى, PhD ەلميرا وتار ءبىلىم ساپاسىن جاقسار­تۋعا ىقپال ەتەتىن رەسۋرس­تار­دى نەعۇرلىم تەڭ جانە قول­جەتىمدى بولۋگە جاعداي جا­ساۋ­دىڭ ماڭىزىنا توقتالدى. بۇ­عان وقىتۋدىڭ يننوۆاتسيا­لىق تاسىلدەرىن ەنگىزۋ, ءبىلىم بەرۋ مەكەمەلەرىنىڭ ماتەريالدىق-تەحنيكالىق بازاسىن جاقسار­تۋ جانە تسيفرلىق تەحنولوگيا­لاردى دامىتۋ كىرەدى.

سونداي-اق «Eurasian Resources Group» كومپانيا­­سى­نىڭ جاستار ساياساتى جونىن­دەگى مەنەدجەرى يلياس قۇداباەۆ جاس­تاردىڭ مانساپتىق تاڭداۋ­لا­رى مەن ولاردىڭ كاسىبي باع­دا­رىن انىقتايتىن فاكتورلاردى ­ەسكەرۋ قاجەتتىگىن ايتتى.

«ستۋدەنتتەردىڭ شامامەن 30%-ى الداعى بىرنەشە جىلدا ءبىر كومپانيادا جۇمىس ىستەگىسى كەلەتىنىن بىلدىرسە, تورتتەن ءبىرى جەكە بيزنەسىن اشۋدى جوسپارلايدى. ماماندىعىنا سايكەس جۇمىس ىستەۋدەن باس تارتۋدىڭ باستى سەبەپتەرى – جۇمىس پروتسەسىنىڭ مونوتوندىعى, كا­سىبي قىزىعۋشىلىقتىڭ تو­مەندىگى جانە ەڭبەكاقىنىڭ ازدىعى», دەپ اتاپ ءوتتى ول.

ال MIND عىلىمي-تالداۋ ورتالىعىنىڭ سىرتقى ساياسات جانە حالىقارالىق زەرتتەۋلەر باعدارلاماسىنىڭ جەتەكشىسى ميراس جيەنباەۆ مەملەكەتتىڭ سىرتقى دامۋ ستراتەگياسىن قالىپتاستىرۋداعى جاستاردىڭ رولىنە نازار اۋداردى. ونىڭ ايتۋىنشا, جاستار جاڭا كوزقاراسقا, يننوۆاتسيالىق ويلاۋعا جانە جاھاندىق ترەندتەر تۋرالى تەرەڭ بىلىمگە يە بولا وتىرىپ, سىرتقى ساياساتقا ءتيىمدى تاسىلدەردى ازىرلەۋگە ايتارلىقتاي ۇلەس قوسا الادى.

تالقىلاۋعا قاتىسقان جاس­تار مەن ساراپشىلار زامان­داستارىنىڭ بولاشاققا دەگەن كوزقاراسى مەن ولاردىڭ بەلسەندى قاتىسۋىنىڭ ما­ڭىز­دىلىعىن اتاپ ءوتتى. ولار­دىڭ وي-پىكىرى ءبىر ارناعا تو­عىستى. ايتۋىنشا, جاستار سايا­ساتى سالاسىندا ءتيىمدى شە­شىمدەر ازىرلەۋ ءۇشىن وسىن­داي ساراپتامالىق تالقى­لاۋ­لاردىڭ سانىن ارتتىرۋ قا­جەتتىگىن قولداپ, وڭ پىكىرلەرىن ءبىلدىردى.