ۇلت بىرلىگى – ۇلى بايلىق
الدىمەن ءسوز العان سەكتور مەڭگەرۋشىسى بيىلعى بارلىق ءىس-شارالار اسسامبلەيا جىلى اياسىندا ءوتىپ وتىرعاندىعىنا نازار اۋدارتتى. سونداي-اق, ل.پروكوپەنكو كەزەكتەن تىس پرەزيدەنتتىك سايلاۋداعى ن.ءا.نازارباەۆتىڭ جەڭىسى حالىقتىڭ ەلباسى رەفورمالارىنىڭ باعىتىن قولدايتىندىعىن كورسەتكەندىگىن تىلگە تيەك ەتتى. سوندىقتان دا, ۇلىقتاۋ ءراسىمى تاۋەلسىز قازاقستان تاريحىندا دامۋدىڭ جاڭا كەزەڭىنە اياق باسۋدىڭ باستاپقى نۇكتەسى بولىپ تابىلادى. مۇنىڭ بارلىعى «نۇرلى جول» جاڭا ەكونوميكالىق ساياساتىمەن, بەس ينستيتۋتتىق رەفورمامەن جانە «ماڭگىلىك ەل» جالپىۇلتتىق جوباسىمەن قابىسىپ جاتىر.
ارينە, مۇنىڭ بارلىعى جاھاندىق كۇردەلى گەوساياسي جاعداي مەن الەمدەگى اسكەري-ساياسي شيەلەنىستىڭ وربۋىنە قاراماستان, قازاقستاننىڭ الەمدەگى اسا دامىعان 30 ەلدىڭ قاتارىنا قوسىلۋىنا جەتكىزۋى ءتيىس. بۇل تۇرعىدان كەلگەندە, پرەزيدەنتتىڭ بەيبىتشىلىك پەن كەلىسىم ساياساتى رەفورمالار جۇرگىزۋدى قامتاماسىز ەتىپ وتىر.
بۇدان كەيىن ءسوز العان ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ قحا كافەدراسىنىڭ مەڭگەرۋشىسى بيىلعى اسسامبلەيا جىلى رۋحاني تولىسۋ جىلى بولۋعا ءتيىس دەگەندى باسا ايتتى. اناتولي باشماكوۆتىڭ سوزىنە قاراعاندا, ءتورت نەگىزگى ايتۋلى مەرەكە ءبىر-بىرىنە ءسايكەس كەلمەيتىندەي سياقتى كورىنگەنىمەن, ولاردىڭ استارىندا وزىندىك ءبىر بايلانىس جاتىر. ەگەر وسىلاردى قاستەرلەي بىلسەك, وندا وسكەلەڭ ۇرپاقتىڭ بويىندا ءوز تاريحىنا دەگەن قۇرمەتتى قالىپتاستىرا الامىز, دەگەن كافەدرا مەڭگەرۋشىسى ەلباسىنىڭ سەنىمدى وكىلى رەتىندە وڭىرلەردى ارالاعان كەزىندە تۇرعىنداردىڭ رۋحاني قۋاتىن سەزىنگەندىگىمەن دە بولىسە كەتتى.
«كەز كەلگەن شەتەلدەردە پرەزيدەنتتىك سايلاۋدا ءار كانديداتتى قولداعان حالىق جاق-جاققا ءبولىنسە, قازاقستاندا كەرىسىنشە ساياسي ناۋقان كەزىندە حالىق جۇدىرىقتاي جۇمىلا تۇسكەندىگىن كورسەتتى», دەدى ا.باشماكوۆ.
پرەزيدەنت جانىنداعى مەملەكەتتىك باسقارۋ اكادەمياسىنىڭ ۇلتارالىق بايلانىستاردى زەرتتەۋ ورتالىعىنىڭ باسشىسى ايگۇل سادۋاقاسوۆا «بۇگىننەن باستاپ ەلىمىزدىڭ جاڭا تاريحي بەتى اشىلدى دەۋگە بولادى. ويتكەنى, كەشە عانا قازاقستان رەسپۋبليكاسىنىڭ پرەزيدەنتى ءوز لاۋازىمىنا تاعايىندالىپ, ءوز قىزمەتىن باستاپ كەتتى. بيىلعى قازاقستان حالقى اسسامبلەياسىنىڭ 20 جىلدىعىمەن بايلانىستى كوپتەگەن شارالار ىسكە اسىپ جاتىر. قحا بىرىكتىرۋشى ينستيتۋت رەتىندە قالىپتاستى, ەلباسىنىڭ ءوزى ايتقانداي, 17 ميلليون قازاقستاندىقتىڭ باسىن قوسىپ, ءبىر ماقساتقا جۇمىلدىردى. قازاقستاندىقتاردىڭ ءبىر ادامداي ءوز تاڭداۋلارىن جاساۋى – وسى جۇمىستىڭ ناتيجەسى», دەدى.
قاراعاندى وبلىستىق «LITUANICA» ليتۆا مادەني بىرلەستىگىنىڭ توراعاسى ءوز كەزەگىندە وڭىردە 24 ەتنومادەني بىرلەستىكتىڭ ناتيجەلى جۇمىس جاسايتىندىعىنا نازار اۋدارتتى. ۆيتالي تۆاريوناس بۇل بىرلەستىكتەر وزدەرىنىڭ تاريحي وتاندارىمەن بايلانىستار ورناتىپ قانا قويماي, قازاقستان حالقىنىڭ بىرلىگى مەن تۇتاستىعىنا ەرەكشە ۇلەس قوسىپ تا كەلە جاتىر دەگەندى باسا ايتتى. سونداي-اق, اسسامبلەيا مۇشەلەرى وڭىردە سۋ تاسقىنى سالدارىنان جاپا شەككەندەرگە ناقتى كومەكتەر كورسەتىپ, ارنايى ەسەپشوتقا 6 ميلليون تەڭگە دە اۋدارىپتى. جانە دە قولداۋ رەتىندە بىرنەشە توننا بولاتىن ءارتۇرلى جۇكتەر مەن ازىق-ت ۇلىكتەر جەتكىزىپ بەرىلگەن.
ال جاقىندا وتكەن كەزەكتەن تىس سايلاۋ حالقىمىزدىڭ تۇتاستىعى مەن بىرلىگىن جانە دە حالقىمىزدىڭ جاسامپازدىققا ۇمتىلۋىن تاعى ءبىر پاش ەتتى, دەدى مادەني بىرلەستىك توراعاسى.
اسقار تۇراپباي ۇلى,
«ەگەمەن قازاقستان».
