2024 جىلدىڭ قازان ايىندا سوتتالۋشى س. الداۋ جولىمەن بوتەننىڭ مۇلكىن جىمقىرۋ ماقساتىندا جابىرلەنۋشى م-دان Sony PlayStation 5 ويىن قۇرىلعىسىن جالعا الىپ, ونىڭ رۇقساتىنسىز لومباردقا وتكىزىپ, تۇسكەن اقشانى ءوز قالاۋى بويىنشا جۇمساپ, قۇرىلعىنى قايتارىپ بەرمەي, جابىرلەنۋشىنى اۋرە-سارساڭعا سالعان.
ءوز ارەكەتتەرىمەن س. جابىرلەنۋشى م-عا 300 مىڭ تەڭگە سوماسىندا ماتەريالدىق زالال كەلتىرگەن.
ءارى قاراي ول وسىعان ۇقساس الاياقتىق جاساپ, جابىرلەنۋشى ك-نى الداپ, 360 مىڭ تەڭگە سوماسىندا ماتەريالدىق شىعىن كەلتىرگەن.
سوتتالۋشىنىڭ كىناسى ءوزىنىڭ مويىنداۋ ايعاقتارىمەن, جابىرلەنۋشىلەردىڭ ايعاقتارىمەن جانە قىلمىستىق ءىس ماتەريالدارىمەن دالەلدەندى.
پروكۋرور 3 جىل مەرزىمگە باس بوستاندىعىن شەكتەۋ تۇرىندە جازا تاعايىنداۋدى سۇرادى.
سوتتالۋشى ءوز كىناسىن مويىنداپ, وكىنىش ءبىلدىرىپ, زالالدى وتەپ, ءىس بويىنشا دالەلدەمەلەردى داۋلامادى.
جابىرلەنۋشىلەر جازا تاعايىنداۋدى سوتتىڭ قاراۋىنا قالدىردى.
قك 190-بابى 3-بولىگىنىڭ سانكتسياسى 3 جىلدان 7 جىلعا دەيىنگى مەرزىمگە باس بوستاندىعىن شەكتەۋ نەمەسە ايىرۋ تۇرىندەگى جازانى كوزدەيدى. سوت قىلمىستىق جاۋاپكەرشىلىك پەن جازانى جەڭىلدەتەتىن ءمان-جاي رەتىندە شىن جۇرەكتەن وكىنۋىن تانىدى. اۋىرلاتاتىن ءمان-جايلار انىقتالعان جوق.
سوت ۇكىمىمەن س. قك 190-بابى 3-بولىگىنىڭ 4-تارماعىندا كوزدەلگەن قىلمىستىق قۇقىقبۇزۋشىلىقتى جاساعانى ءۇشىن كىنالى دەپ تانىلىپ, وعان 3 جىل مەرزىمگە باس بوستاندىعىن شەكتەۋ تۇرىندەگى جازا تاعايىندالدى.
ۇكىم زاڭدى كۇشىنە ەنگەن جوق.
