فوتولار: جاسلان جۇمابەكوۆ, ءالي عالىم
ءىس-شارانى اشقان ەرلان قوشانوۆ وسى جىل قازاقتىڭ ۇلتتىق سپورت تۇرلەرى ءۇشىن ايتۋلى جىل بولعانىن اتاپ ءوتتى. بۇكىل الەم V دۇنيەجۇزىلىك كوشپەلىلەر ويىندارىندا وتاندىق سپورتشىلارىمىزدىڭ جەڭىسىنە كۋا بولدى. پرەزيدەنت باستاماسىمەن ولاردىڭ باسىم كوبى مەملەكەتتىك ناگرادالارعا ۇسىنىلدى.
«مەملەكەت باسشىسى قاسىم-جومارت توقاەۆ ۇلتتىق سپورت تۇرلەرىن دامىتۋعا ەرەكشە كوڭىل بولەدى. ولار ءبىزدىڭ مادەنيەتىمىز بەن مەنتاليتەتىمىزدىڭ اجىراماس بولىگى. پرەزيدەنت تاپسىرماسى بويىنشا ەلىمىزدە ۇلتتىق سپورت ورتالىقتارى, كلۋبتار, مەكتەپتەر اشىلىپ جاتىر. وندا 600 مىڭنان استام ادام قازاقتىڭ ءداستۇرلى سپورت تۇرلەرىمەن اينالىسادى. بۇگىنگى «التىن تۇعىر» سىيلىعى ۇلتتىق قازىنامىزدى ساقتاۋعا جانە ونى ەلىمىزدە, دۇنيە جۇزىندە ىلگەرىلەتۋگە تىكەلەي ىقپال ەتەدى», دەدى ول.
«AMANAT» پارتياسى دا جۇيەلى تۇردە ۇلتتىق سپورتتى دامىتۋعا بارىنشا قولداۋ كورسەتىپ كەلەدى, ماسەلەن ءۇش جىل قاتارىنان بىرەگەي « ۇلى دالا جورىعى» مارافون-بايگەسىن ۇيىمداستىرۋعا اتسالىستى.
بيىل «التىن تۇعىر» ۇلتتىق سىيلىعى 11 نوميناتسيا بويىنشا ۇزدىك سپورتشىلارعا بەرىلدى: كوكپار, بايگە, توعىزقۇمالاق, اسىق اتۋ, قۇسبەگى, ءداستۇرلى ساداق اتۋ, joryq, اۋدارىسپاق, جامبى اتۋ, تەڭگە ءىلۋ, سونداي-اق اقپاراتتىق قولداۋ كورسەتكەنى ءۇشىن.
«كوكپار» نوميناتسياسى بويىنشا سپورتشى ابىلايحان نىشانبەكوۆ, جاتتىقتىرۋشى ەركەباي وماربەك, كوممەنتاتور قامباربەك كاشيگوۆ جانە تورەشىلەر اقىلبەك قىمىزباەۆ پەن عاني احمەتباەۆ ماراپاتتالدى.
«تەڭگە ءىلۋ» نوميناتسياسى بويىنشا سپورتشى راحات كومباروۆ پەن جاتتىقتىرۋشى نۇرجان ابىلقاسىموۆ جەڭىمپاز اتاندى.
«جامبى اتۋ» نوميناتسياسى بويىنشا سپورتشى اقادىل پەرنەباي مەن جاتتىقتىرۋشى ءسانىم مۋرادوۆا ماراپاتتالدى.
«اۋدارىسپاق» نوميناتسياسى بويىنشا جۇلدەلەر سپورتشى سىرىم ءىزباساروۆ پەن جاتتىقتىرۋشى ءبىرجان قوساليەۆكە بەرىلدى.
«Joryq» نوميناتسياسى بويىنشا جۇلدەنى « ۇلى دالا جورىعى-2024» مارافونىنىڭ كۇمىس جۇلدەگەرلەرى اتانعان الماتى قالاسىنىڭ كومانداسى جەڭىپ الدى.
ء«داستۇرلى ساداق اتۋ» نوميناتسياسىندا سپورتشىلار جانىبەك كۋلميرزاەۆ پەن ايكوركەم باتيحان, سونداي-اق جاتتىقتىرۋشى دياس ميللات ماراپاتتالدى.
«بايگە» نوميناتسياسى بويىنشا جۇلدە جاتتىقتىرۋشى تورەبەك كۋرمانكاليەۆكە, جوكەي امانگەلدى حامزا مەن ونىڭ جىلقىسى جەلقاراعا بەرىلدى.
«قۇسبەگى» نوميناتسياسى بويىنشا جۇلدەلەردى سپورتشىلار ەراسىل سەرىكبەك ۇلى, بەكسۇلتان سەيىتجان, يمانعالي ابدۋلكاريم ۇلى جانە جاتتىقتىرۋشى ەلتاي مۇپتەكەەۆ يەلەندى.
«توعىزقۇمالاق» نوميناتسياسىندا سپورتشىلار سالتانات ساپاربەكوۆا, اسىلحان قوجاناسىپ جانە جاتتىقتىرۋشى باۋىرجان تولەگەنوۆ ماراپاتتالدى.
«اسىق اتۋ» نوميناتسياسى بويىنشا سىيلىق سپورتشىلار كاميلا دانياروۆاعا, نۇرقيسسا مولجىگىتوۆكە, جاتتىقتىرۋشى ەسكەندىر راحمەتوۆكە بەرىلدى.
سونداي-اق, ۇلتتىق سپورت تۇرلەرىنە تۇراقتى اقپاراتتىق قولداۋ كورسەتكەنى ءۇشىن «Qazsport» تەلەارناسىنىڭ ۇجىمى «اقپاراتتىق ارىپتەس» نوميناتسياسىن يەلەندى.
