فوتو: ن.بايبۋلين
ءىس-شارا بارىسىندا گەندەرلىك دامۋ ماسەلەلەرى تالقىلانىپ, كەدەرگىلەردى ەڭسەرۋ جانە ايەلدەردىڭ الەۋەتىن جۇزەگە اسىرۋ جونىندە ۇسىنىستار ايتىلدى جانە ساراپشىلار تاراپىنان ەكسكليۋزيۆتى زەرتتەۋلەرگە نازار اۋدارىلدى. ال, شاقىرىلعان مەيماندار بيزنەس, قارجى, ساياسات, ايەلدەر قۇقىعىن قورعاۋ سالالارى بويىنشا وزدەرىنىڭ جۇمىستارى جانە وزىق تاجىريبەلەرى تۋرالى ءسوز قوزعادى.
ستاتيستيكالىق مالىمەتتەرگە سايكەس قازاقستاندا ايەل ادامدار سانى 10 ميلليوننان اسادى نەمەسە 51 پايىزدان استام. سوندىقتان ولاردىڭ قاۋىپسىزدىگىن قامتاماسىز ەتۋ, قۇقىقتارىن قورعاۋ جانە الەۋەتىن تولىق ىسكە اسىرۋعا قاجەتتى جاعداي جاساۋ ەلدىڭ دامۋى جولىنداعى ماڭىزدى قادام سانالادى.
«قازىرگى ۋاقىتتا ەكونوميكالىق سەكتوردا ايەلدەردىڭ الەۋەتى جەتكىلىكتى دەڭگەيدە ەمەس. اۋىلدىق جەرلەردەگى ايەلدەردىڭ ەكونوميكالىق بەلسەندىلىگى دە ءالى تومەن. ايەلدەرگە قاتىستى زورلىق-زومبىلىق تا ماڭىزدى ماسەلە بولىپ قالىپ وتىر. سوندىقتان مەملەكەت باسشىسىنىڭ باستاماسىمەن ايەلدەردىڭ قۇقىقتارىن جانە بالالاردىڭ قاۋىپسىزدىگىن قورعاۋ تۋرالى زاڭ قابىلداندى. بۇل وسى سالاداعى جاعدايدى وزگەرتۋ جولىنداعى ماڭىزدى قادام ەكەنى انىق. سونداي-اق اليمەنت تولەۋگە قاتىستى ايتارلىقتاي پروبلەمالار بار. سونىڭ سالدارىنان جۇزدەگەن مىڭ بالا قاجەتتى قارجىلىق قولداۋدى الا الماي وتىر دەۋگە تولىق نەگىز بار. سول سەبەپتى, ءبىز بۇگىندە وسى ماسەلەلەردى قامتيتىن ءتيىستى زاڭ جوباسىمەن جۇمىس ىستەپ جاتىرمىز», دەپ ماۋلەن اشىمباەۆ پالاتانىڭ وسى باعىتتاعى زاڭنامالىق قىزمەتى تۋرالى ايتىپ ءوتتى.
سەناتتىڭ ءباسپاسوز قىزمەتىنىڭ مالىمەتىنشە سونداي-اق سەنات توراعاسى دەپۋتاتتاردىڭ, مەملەكەتتىك ورگانداردىڭ جانە ازاماتتىق قوعامنىڭ ۇيلەسىمدى جۇمىسى ايەلدەرگە قاتىستى تۇرمىستىق زورلىق-زومبىلىق, كەمسىتۋشىلىك جانە قوعامداعى ستەرەوتيپتەردى جويۋ سياقتى ولاردىڭ الەۋەتىن ىسكە اسىرۋعا تۇساۋ بولاتىن كەدەرگىلەردى ەڭسەرۋدى تالاپ ەتەتىنىنە توقتالدى.
«ايەلدەردىڭ ەكونوميكالىق جانە ساياسي ومىرگە بەلسەندى قاتىسۋىنا كەدەرگى كەلتىرەتىن نەگىزگى سەبەپتەردىڭ ءبىرى – ولاردىڭ قوعامداعى ءرولى تۋرالى ستەرەوتيپتەردە بولىپ وتىر. وسى ماسەلە تۋرالى بايىپتى ويلانىپ, تاپتاۋرىن قاعيدالاردى وزگەرتۋ ءۇشىن بارلىق دەڭگەيدە بەلسەندى جۇمىس جۇرگىزۋ قاجەت. ايەلدەرگە قاتىستى قاساڭ ويلارمەن ءومىر سۇرە بەرەتىن بولساق, ءبىز الەمدىك تەندەنتسيالاردان قالىپ قانا قويماي, ءوزىمىزدىڭ دامۋىمىزعا كەدەرگى كەلتىرەمىز», دەدى سەنات سپيكەرى.
وتىرىس كەزىندە ساراپشىلار كلۋبىنىڭ مۇشەلەرىمەن قاتار «شەۆرون» كومپانياسىنىڭ ەۋرازيالىق جانە تىنىق مۇحيتى ءوڭىرى بويىنشا باس ديرەكتورى زاميرا كاناپيانوۆا, «وتباسى بانك» اق باسقارما توراعاسى ءلاززات يبراگيموۆا, «LULU Group» جوباسىنىڭ نەگىزىن قالاۋشى اسەل ماشانوۆا, ادۆوكات جاننا ورازباحوۆا, «اگروماشحولدينگ KZ» اق پرەزيدەنتى دينارا شۇكىجانوۆا جانە تاعى باسقا ساراپشىلار ءسوز سويلەپ, گەندەرلىك دامۋ, كەدەرگىلەردى ەڭسەرۋ, سونداي-اق, ايەلدەردىڭ الەۋەتىن جۇزەگە اسىرۋ ماسەلەلەرى بويىنشا پىكىرلەرىن ءبىلدىرىپ, ۇسىنىستارىن ايتتى.
