ءساۋىر ايىنان بەرى جۇرگىزىلگەن اكتسياعا وبلىستا 173 مىڭنان استام تۇرعىن, 4 مىڭنان استام مەكەمە مەن كاسىپورىن قاتىستى. 77 مىڭنان استام اۋلا, 2508 كوپ قاباتتى تۇرعىن ءۇي, 74 مىڭ جەكە تۇرعىن ءۇي, 300-گە جۋىق ساياباق اباتتاندىرىلدى.
– «تازا قازاقستان» اكتسياسى تەك تازارتۋ ەمەس, ساۋ ەكولوگيالىق سانا قالىپتاستىرۋدىڭ ءبىر قادامى. باتالى ىسكە بالالارىمەن بىرگە قاتىسقان اتا-انالار ءوز ەلىنىڭ تازالىعىنا قامقورلىق جاساپ, بولاشاق ءۇشىن اسا ماڭىزدى قۇندىلىق قالىپتاستىرادى. كوشەدەن باستالعان كورنەكى ءىس كەلەشەكتە قورشاعان ورتانى ساقتايتىن جاڭا ۇرپاقتى تاربيەلەيدى», دەيدى وبلىستىق «جاسىل ەل» جاستار ەڭبەك جانە قۇرىلىس جاساقتارى شتابىنىڭ جەتەكشىسى قاسيەت بالمولدا.
ەكولوگيالىق اكتسيا وبلىستا ءساۋىر ايىنان باستالىپ, اپتا سايىن ءوتتى. اباتتاندىرۋ, سانيتارلىق-تازالاۋدى قامتيتىن وبلىستىق ناقتىلى ءىس-شارالار جوسپارى بەكىتىلدى. بيىل ءوڭىر الاپات سۋ تاسقىنىن باستان كەشىردى. تابيعي قۇبىلىستان كەيىنگى وزەن ارنالارى مەن اۋماقتارىن قوقىستان تازالاۋ ماقساتىندا شىلدە, تامىز ايلارىندا «تازا جاعالاۋ» اكتسياسى ۇيىمداستىرىلدى. قىركۇيەك ايىندا «World cleanup day», بۇكىلالەمدىك تازالىق كۇنى اكتسياسى ءوتتى.
– ءساۋىر ايىنان بەرى ۇيىمداستىرىلعان سانيتارلىق تازالىق جۇمىستارى بارىسىندا 6 مىڭنان استام تروتۋار جوندەلدى, 63 مىڭنان استام ءتۇرلى اعاش كوشەتى ەگىلدى, 1221 الەۋمەتتىك نىسان, 1251 تاريحي-مادەني ەسكەرتكىش تازارتىلدى. ەكولوگيالىق ايلىققا 1805 تەحنيكا جۇمىلىپ, 61 750 توننا قوقىس شىعارىلدى, – دەيدى وبلىستىق قوعامدىق دامۋ باسقارماسى جاستار ساياساتى ءبولىمىنىڭ باس مامانى اسىلاي التايقىزى.
«عارىش ساپارى» مەكەمەسى وبلىس اۋماعىنان 197 زاڭسىز قوقىس ورنىن انىقتاعان ەدى. بۇگىنگە دەيىن ونىڭ 149-ى جويىلدى. قالعان قوقىس ورىندارى دا تازارتىلادى دەيدى ماماندار.
رەسپۋبليكالىق اكتسيانىڭ وڭىردە ءوتۋ بارىسى تۋرالى بۇقارالىق اقپارات قۇرالدارىندا دا ۇنەمى جاريالانىپ, كوپشىلىك ۋاقتىلى حابارلانىپ وتىر. ماسەلەن, وبلىستىق گازەت بەتتەرىندە 171 ماقالا, جەرگىلىكتى تەلەارنالاردا 103 سيۋجەت, ينتەرنەت-رەسۋرستاردا 159 ماتەريال, الەۋمەتتىك جەلىلەردە 1300-دەن استام جازبا, 130-دان استام بەينەروليك دايىندالعان.
قوعامدىق ورىنداردى لاستاپ, قورشاعان ورتاعا زيان كەلتىرگەن مەكەمە مەن ادامداردى زاڭعا تارتىپ وتىرۋ دا كەرەك. بيىلدىڭ وزىندە وڭىردە اكىمشىلىك قۇقىق بۇزۋشىلىق تۋرالى كودەكستىڭ 434-2, 505-باپتارىنا سايكەس 10 002 قۇقىق بۇزۋشىلىق انىقتالعان. ناتيجەسىندە جاۋاپتى تۇلعالارعا 71 658 560 تەڭگە كولەمىندە ايىپپۇل سالىندى. ونىڭ 33 065 596 تەڭگەسى ءوندىرىلدى.
اكتسيا وبلىستىڭ بارلىق اۋدانىن قامتىدى. ايتالىق, جاقىندا عانا جاڭاقالا اۋداندىق ءماسليحاتىنىڭ دەپۋتاتى بەگايىم ەسەنعاليەۆانىڭ ۇسىنىسىمەن №9 سايلاۋ وكرۋگىندە ورنالاسقان ساياباققا 200 ءتۇپ اعاش كوشەتى ەگىلدى. ىزگى شاراعا اۋدان باسشىسى الپامىس كوشكىنباەۆ, اكىمدىك قىزمەتكەرلەرى, اۋىل تۇرعىندارى, مۇعالىمدەر قاتىستى.
«تازا قازاقستان» اكتسياسى – كەلەشەكتى كوزدەگەن باستاما. بۇگىن ەگىلگەن تەرەك ەرتەڭگى ۇرپاعىڭا سايا بولادى, جەمىسىن بەرەدى. سوندىقتان مۇنداي يگىلىكتى ءىستىڭ سوڭى بولماۋى كەرەك.
باتىس قازاقستان وبلىسى
