سۋرەتتى تۇسىرگەن – ەرلان ومار, «EQ»
وسى جىلدىڭ IV توقسانىندا مەملەكەتتىك ىنتالاندىرۋ شارالارى تەمىربەتون بۇيىمدارىنىڭ جەتەكشى وتاندىق ءوندىرۋشىسى – باسپالداق ساتىلارىن, قابىرعالىق ىرگەتاس بلوكتارىن شىعاراتىن «KazConstructionGroup» كومپانياسىنا كورسەتىلدى. كاسىپورىننىڭ وندىرىستىك قۋاتى جىلىنا 120 مىڭ تەكشە مەتر بەتوندى قۇرايدى.
«QazIndustry» كومپانياعا مەملەكەتتىك ىنتالاندىرۋ شارالارى اياسىندا تەحنولوگيالىق ۇدەرىستەرىن جەتىلدىرۋگە جۇمسالعان 10,3 ملن تەڭگە كولەمىندەگى شىعىندارىن وتەدى. بۇل قاراجاتقا كاسىپورىن جاڭا جابدىقتار ساتىپ الىپ, ءوندىرىس تيىمدىلىگىن ايتارلىقتاي ارتتىردى. ناتيجەسىندە, كومپانيا ءوندىرىستى جاڭعىرتىپ قانا قويماي, ءونىم ساپاسىن جاقسارتىپ, تاپسىرىستاردى ورىنداۋ ۋاقىتىن قىسقارتىپ, جاڭا جۇمىس ورىندارىن اشتى.
«QazIndustry ۇسىنعان مەملەكەتتىك قولداۋ شارالارى ءبىزدىڭ كاسىپورنىمىزدى دامىتۋدا ماڭىزدى ءرول اتقاردى. ءبىز وندىرىستىك ۇدەرىستەردى ايتارلىقتاي جاقسارتتىق, بۇل ءونىم كولەمىن ارتتىرىپ قانا قويماي, ەل ەكونوميكاسىنىڭ دامۋىنا ءوز ۇلەسىمىزدى قوسۋعا مۇمكىندىك بەردى», دەپ اتاپ ءوتتى «KazConstructionGroup» جشس باس ديرەكتورى مۇراتبەك مۇحامبەديەۆ.
جاڭا جابدىق دايىن بەتوندى قۇيىپ, ونى اينالمالى قوراپ ارقىلى ارنايى قالىپتارعا جەتكىزۋگە ارنالعان. بۇل تەحنيكا جۇمىس بارىسىن اۆتوماتتاندىرىپ, ءوندىرىس قارقىنىن ەداۋىر جەدەلدەتتى. اتالعان جابدىقتىڭ ارقاسىندا بىرقاتار ناتيجەگە قول جەتكىزىلدى. بىرىنشىدەن, ءوندىرىس كولەمى 113%-عا ءوستى. جاڭا تەحنولوگيانى ەنگىزۋ ارقىلى كاسىپورىن بىردەي ۋاقىتتا ءونىمدى كوبىرەك شىعارا باستادى, بۇل قارجىلىق كورسەتكىشتەردىڭ جاقسارۋىنا ىقپال ەتتى. ەكىنشىدەن, وندىرىستىك تسيكل ۋاقىتى 25%-عا قىسقاردى. ەندى كاسىپورىن تاپسىرىستاردى جىلدامىراق ورىندايدى, بۇل كليەنتتەردىڭ سۇرانىسىن قاناعاتتاندىرۋعا جانە نارىقتاعى باسەكەگە قابىلەتتىلىكتى ارتتىرۋعا جول اشادى.
ۇشىنشىدەن, جاڭا جابدىقتىڭ ارقاسىندا ءوندىرىس اۋىسىمدىلىعىن ارتتىرۋ مۇمكىندىگى پايدا بولىپ, كومپانيا قوسىمشا 10 جۇمىس ورنىن قۇردى. قازىر «KazConstructionGroup» كومپانياسىندا 46 ادام ەڭبەك ەتەدى. تورتىنشىدەن, شىعىندار ۇنەمدەلىپ, رەنتابەلدىلىك ارتتى. جابدىقتىڭ تيىمدىلىگى 35%-عا ارتىپ, ءوندىرىس شىعىندارى 40%-عا دەيىن ۇنەمدەلە باستادى. وسىلايشا, ءونىمنىڭ وزىندىك قۇنى تومەندەپ, كومپانيانىڭ پايداسى 12%-عا ءوستى.
«KazConstructionGroup» كومپانياسىنىڭ ناقتى ناتيجەلەرى مەملەكەتتىك ىنتالاندىرۋ شارالارىنىڭ تابىسقا جەتۋدەگى ماڭىزدى ءرولىن دالەلدەيدى.
«مەملەكەتتىڭ قولداۋى كاسىپورىندى ءساتتى جاڭعىرتۋدا جانە ونىڭ نارىقتاعى ورنىن نىعايتۋدا شەشۋشى ءرول اتقارادى. ءبىز دامۋدى جالعاستىرىپ, جاڭا جەتىستىكتەرگە جەتۋگە جانە ءونىم ساپاسىن جاقسارتۋعا ۇمتىلامىز», دەدى كومپانيا باسشىسى.
