ۇستاز دا قاراپ قالعان جوق. پوليتسياعا شاعىمدانىپ, شاكىرتىنىڭ ارەكەتىنە قاتىستى ارىز ءتۇسىردى. ەندى بالانىڭ اتا-اناسى ول ءۇشىن سوتتا جاۋاپ بەرۋى ءتيىس.
- پەداگوگ وقۋشىلاردىڭ ءبىرى مەكتەپ ىشىندە وعان ادەپسىز ءسوز ايتقانىن كورسەتىپ, پوليتسياعا شاعىمداندى. جەتكىنشەكتىڭ ارەكەتىندە اكىمشىلىك قۇقىق بۇزۋشىلىق سيپاتتارى بار. بۇل ۇساق بۇزاقىلىق بولىپ سانالادى, – دەپ حابارلادى پاۆلودار وبلىستىق پوليتسيا دەپارتامەنتىنىڭ ءباسپاسوز قىزمەتى.
ءتارتىپ ساقشىلارى ءتيىستى تەكسەرۋ جۇمىستارىن جۇرگىزگەن سوڭ كامەلەتتىك جاسقا تولماعان وقۋشىنىڭ اتا-اناسىن جاۋاپقا تارتتى. ماتەريالدار سوتقا جولداندى.
تاياۋدا پاۆلودار وبلىسىندا تاعى ءبىر وقۋشىنىڭ بەيادەپ ارەكەتى الەۋمەتتىك جەلىلەردە تاراعان ەدى. ول ساباق ۇستىندە ورىندىققا شىعىپ, ايقايلاپ, ترەند تۇسىرمەك بولدى. مۇنداي ارەكەتى ءۇشىن فيزيكا ءپانىنىڭ مۇعالىمى شاكىرتكە قول جۇمسادى. بۇل ءسات تە بەينەجازبادا كورسەتىلىپ, كوپشىلىكتىڭ تالقىسىنا ءتۇستى. سالدارىنان ەر ادام مەكتەپتەن قۋىلىپ, وعان قاتىستى قىلمىستىق ءىس قوزعالعان بولاتىن.
بۇل جاعدايعا قاتىستى جەلى قولدانۋشىلارىنىڭ پىكىرى ەكىگە جارىلدى. ءبىرى ۇستازدىڭ مۇنداي ارەكەتى دۇرىس ەمەس ەكەنىن العا تارتسا, ەندى ءبىرى مۇعالىمگە سىيلاستىق تانىتپاي, ساباق وتكىزۋىنە بوگىت جاساعان وقۋشى مەن اتا-اناسىن جاۋاپقا تارتۋ كەرەك دەگەن پىكىرىن ءبىلدىردى.
جالپى, بيىل پاۆلودار وبلىسىندا ۇساق بۇزاقىلىق جاساعانى ءۇشىن 1268 ادام جاۋاپقا تارتىلدى. ونىڭ ىشىندە كامەلەتتىك جاسقا تولماعان 51 بالا بار.
