فوتو: اقوردا
قاسىم-جومارت توقاەۆتىڭ ايتۋىنشا, ۋمارۋ سيسوكۋ ەمبالونىڭ قازاقستانعا رەسمي ساپارى الىس جاتقان ەلدەردى بايلانىستىرىپ, حالىقتارىمىزدىڭ تىلەگى مەن نيەتى ءبىر ەكەنىن كورسەتەدى.
«ەكىجاقتى كەزدەسۋدىڭ ناتيجەسىندە ءتيىمدى ۋاعدالاستىقتارعا قول جەتكىزدىك. بۇل ساپار ساياسي, ساۋدا-ەكونوميكالىق, مادەني-گۋمانيتارلىق جانە باسقا دا سالالارداعى ىنتىماقتاستىقتى ودان ءارى نىعايتۋعا مۇمكىندىك بەرەدى. مىسالى, كولىك-لوگيستيكا سالاسىنىڭ الەۋەتىن تولىق پايدالانۋعا ەكى ەل دە مۇددەلى. وسى رەتتە باتىس افريكاداعى بيساۋ پورتى مەن ترانسكاسپي كولىك ءدالىزىن ۇشتاستىرۋ جولدارىن زەردەلەۋگە كەلىستىك. الەمدەگى گەوساياسي احۋال مەن ازىق-ت ۇلىك قاۋىپسىزدىگى ماسەلەسى ۋشىعىپ تۇرعان قازىرگى كەزدە مۇنىڭ ءمان-ماڭىزى ايرىقشا», دەدى قازاقستان پرەزيدەنتى.
قاسىم-جومارت توقاەۆ اۋىل شارۋاشىلىعى سالاسىنداعى سەرىكتەستىك كەلىسسوزدەردەگى باستى تاقىرىپتىڭ ءبىرى بولعانىن ايتتى. تاراپتار قازاقستاننىڭ گۆينەيا-بيساۋعا ءداندى داقىلدى ەكسپورتتاۋعا قاتىستى مۇمكىندىگى مول ەكەنىنە نازار اۋدارعان.
«بۇل رەتتە ەلىمىزدىڭ باستاماسىمەن قۇرىلعان ازىق-ت ۇلىك قاۋىپسىزدىگى جونىندەگى يسلام ۇيىمىنىڭ الەۋەتىن تولىق پايدالانۋعا بولادى. سونىمەن قاتار تاۋ-كەن جانە تابيعي رەسۋرستاردى يگەرۋ ىسىندەگى ىنتىماقتاستىق ماسەلەسىن تالقىلادىق. اتاپ ايتقاندا, تەمىر, فوسفات, بوكسيت جانە باسقا دا سيرەك كەزدەسەتىن مينەرال كەنىشتەرىن بارلاۋ جانە يگەرۋ ءۇشىن بىرلەسە جۇمىس ىستەۋگە زور مۇمكىندىك بار», دەدى مەملەكەت باسشىسى.
پرەزيدەنت ەلىمىزدىڭ تسيفرلاندىرۋ, كيبەرقاۋىپسىزدىك جانە فينتەح باعىتىنداعى جەتىستىكتەرىنە توقتالىپ, تسيفرلىق قىزمەت سالاسىنداعى ىقپالداستىقتى ارتتىرۋدى ۇسىنعانىن جەتكىزدى.
سونىمەن قاتار گۆينەيا-بيساۋ دەلەگاتسياسىن كەلەسى جىلى وتەتىن استانا حالىقارالىق فورۋمىنا شاقىرعانىن ايتتى.
«بۇل قازاقستاننىڭ ەكونوميكالىق جانە ينۆەستيتسيالىق الەۋەتىمەن تولىق تانىسۋعا مۇمكىندىك بەرەدى. ازاماتتارىمىز ءبىر-ءبىرىن جاقىن تانىپ, ءبىلۋى ءۇشىن مادەني-گۋمانيتارلىق بايلانىستىڭ ماڭىزى زور. وسى رەتتە مەن گۆينەيا-بيساۋ جاستارىنا قازاقستاننىڭ جوعارى وقۋ ورىندارىندا ءبىلىم الۋدى ۇسىندىم. بۇل قادامدار ەكى ەل اراسىندا جان-جاقتى ىنتىماقتاستىقتى جانداندىرۋعا ىقپال ەتەرى ءسوزسىز», دەدى قاسىم-جومارت توقاەۆ.
تاراپتار حالىقارالىق ماسەلەلەر جونىندە پىكىر الماسىپ, وي بولىسكەن. قازاقستان پرەزيدەنتى قوس مەملەكەتتىڭ كوپتەگەن وزەكتى تاقىرىپتار بويىنشا ۇستانىمدارى ۇقساس ەكەنىن مالىمدەدى.
«اسىرەسە, جاھاندىق بەيبىتشىلىك پەن وڭىرلىك تۇراقتىلىقتى ساقتاۋعا قاتىستى كوزقاراسىمىز ورتاق. قازىرگى گەوساياسي جاعدايدا بىرىككەن ۇلتتار ۇيىمى مەن افريكا وداعى اياسىندا ءوزارا قولداۋ كورسەتۋ جانە كونسۋلتاتسيالار وتكىزۋ اسا ماڭىزدى. جالپى, جان-جاقتى قارىم-قاتىناستى نىعايتۋعا مول مۇمكىندىك بار. بۇگىنگى ماڭىزدى كەلىسىمدەر – سونىڭ ايقىن كورىنىسى. ۋمارۋ ەمبالو مىرزانىڭ ساپارى قازاقستان مەن گۆينەيا-بيساۋ اراسىنداعى ىنتىماقتاستىققا تىڭ سەرپىن بەرەدى دەپ سانايمىز», دەدى مەملەكەت باسشىسى.
ۋمارۋ سيسوكۋ ەمبالو قازاقستان مەن گۆينەيا-بيساۋ اراسىنداعى ىنتىماقتاستىقتى نىعايتۋ پەرسپەكتيۆاسىنا نازار اۋداردى.
«ەلدەرىمىزدە تابيعي رەسۋرستاردى بارلاۋ, ءبىلىم بەرۋ سالالارى مەن كومىرسۋتەگىن ەكسپورتتاۋ بويىنشا ىقپالداستىقتى جانداندىرۋعا قاجەتتى مەحانيزم بار. سونىمەن قاتار سىزدەرمەن ءتۇرلى حالىقارالىق الاڭداردا قارىم-قاتىناس جاساپ, كوپقىرلى بايلانىسىمىزدى ىلگەرىلەتۋگە مۇددەلىمىز», دەدى گۆينەيا-بيساۋ پرەزيدەنتى.
