بۇدان بولەك, ەلەكتر سىمدارى, مەكتەپ پارتالارى, ساياباقتارعا ارنالعان ورىندىقتار مەن ءورت ءسوندىرۋ بولىمدەرىنە, مەديتسينالىق مەكەمەلەرگە مىڭ ءتۇرلى ولشەمدەگى شكافتار مەن توسەكتەر دە جاسالادى. وسى كۇنى وتاندىق ءونىمنىڭ 400-گە جۋىق ءتۇرى تۇتىنۋشىعا جونەلتىلىپ جاتىر. وندىرىلگەن بۇيىمداردى ارلەۋگە قولدانىلاتىن ويۋ-ورنەكتەر زاماناۋي لازەر قوندىرعىسىمەن سالىنادى.
وتاندىق نارىقتا 2012 جىلدان بەرى جۇمىس ىستەپ, «TEKMETAL» برەندىمەن تانىمال بولعان زاۋىت بولشەكتەن جاپپاي وندىرىسكە دەيىن ءارتۇرلى ماقساتتاعى مەتالل ونىمدەرىن سەريالىق وندىرۋگە ماماندانعان.
«ون جىلدان اسقان جۇمىس بارىسىندا زاۋىت ءتۇرلى مەتالل بۇيىمدارىن وندىرۋدە ۇلكەن تاجىريبە جيناقتادى. بۇگىندە زاۋىت ءارتۇرلى سالادا تۇراقتى ەڭبەك ەتەتىن 100-دەن اسا ادامنىڭ قولايلى ورتاسىنا, ورتاق «ۇيىنە» اينالدى دەۋگە بولادى. مەتالل كونسترۋكتسيالارىن دانەكەرلەۋشىلەر مەن قۇراستىرۋشىلاردان باستاپ, كونسترۋكتورلار مەن ينجەنەرلەردىڭ تاجىريبەسى تولىعىپ, باسەكەگە قابىلەتتى ءونىم وندىرۋدە تاباندىلىق تانىتىپ كەلەدى», دەيدى «Kaz Tek Invest» زاۋىتىنىڭ ديرەكتورى نۇرمۇحان مادەليەۆ.
جۇمىسشىلاردىڭ الەۋمەتتىك جاعدايىن ۇنەمى جاقسارتۋ, ەڭبەكتى قورعاۋ, مامانداردىڭ بىلىكتىلىگىن ارتتىرۋ – زاۋىتتى دامىتۋدىڭ باسىم باعىتتارىنىڭ ءبىرى. كومپانيا سەرىكتەستەرىنە يننوۆاتسيالىق تەحنولوگيالاردى پايدالانا وتىرىپ, زاماناۋي جابدىقتا جاسالعان جوعارى ساپالى تاۋارلاردى ءتيىمدى باعامەن ۇسىنا وتىرىپ, كوشباسشى بولۋعا ۇمتىلادى. سونىمەن قاتار ءونىم ساپاسىنا كەپىلدىك بەرەدى.
العاشىندا 25 جۇمىسشىمەن ءىسىن باستاعان كاسىپورىندا جاڭا تسەحتار ىسكە قوسىلىپ, ءونىم كولەمى ارتا تۇسكەن. ءوندىرىس ۇدەرىسى قالىپتى جولعا قويىلىپ, تۇراقتى دامىدى. زاۋىتتىڭ تەحنيكالىق جاراقتاندىرىلۋىنا جىل سايىن شامامەن 500 ملن تەڭگە كولەمىندە ينۆەستيتسيا سالىنعان. بىلتىردان بەرى ورتا ەسەپپەن ايىنا 200 مىڭ بىرلىك ءونىم شىعارىپ جاتىر. زاۋىت ونىمدەرى ەل ىشىندە ساتىلادى جانە شەتەلگە دە ەكسپورتتالادى. قىرعىزستان, تاجىكستان, وزبەكستان مەن شۆەتسارياعا جونەلتىلىپ, سونداي-اق پارسى شىعاناعى مەن لاتىن امەريكاسىنان تاپسىرىس قابىلدايدى. وسى ەلدەردە فيليالدارى دا جۇمىس ىستەيدى.
ء«ونىم شىعارۋدا ءبىر ارناعا تۇسكەن كاسىپورىننىڭ كەڭەيۋىنە الەمدى جايلاعان ىندەتتىڭ كەرى اسەرى تيمەي قويمادى. تاپسىرىس كولەمى كەمىپ, جۇمىسشىلار سانى دا اناعۇرلىم ازايدى. دەسە دە, ىزدەنىسپەن ەڭبەك ەتەتىن زاۋىت ۇجىمى ۋاقىت كوشىنەن قالماي, جاڭاشىلدىققا بەيىمدەلىپ, زامان تالابىنا ساي بۇيىمدار شىعارۋعا تالپىنىپ كەلەدى. بۇل باعىتتا جۇمىستى جانداندىرىپ, جاڭا تەحنولوگيالار ەنگىزىپ, ءوندىرىس كولەمىن ورىستەتۋگە نيەتتىمىز», دەيدى نۇرمۇحان مادەليەۆ.
جارىق شامدارىن شىعارۋدا كوش باسىنان كورىنەتىن زاۋىت «جايلى مەكتەپ» باعدارلاماسى اياسىندا سالىنىپ جاتقان عيماراتتاردىڭ اۋلاسىن جارىقتاندىرۋعا, وزىق ۇلگىدەگى قورشاۋلارىن جاساۋعا بەلسەنە قاتىسىپ كەلەدى. بۇدان بولەك, قارعىن سۋ باسقان قۇلسارى مەن اتىراۋ قالالارىنا زاماناۋي ۇلگىدەگى ايالداما مەن جايلى ورىندىق, سونىمەن قاتار قوقىس جاشىكتەرىن جاساپ بەرمەك.
ىسكە قوسىلعالى ەلەكتر شامدارىنىڭ 30 مىڭنان استام ءتۇرىن جاساعان زاۋىت ونىمدەرى بىرەگەيلىگىمەن ەرەكشەلەنەدى. وعان شامداردىڭ باسىم بولىگىنىڭ ارنايى تاپسىرىسپەن, ءبىرىن-ءبىرى قايتالامايتىنداي ەتىپ جاسالاتىنى سەبەپ. ءسانى مەن سالتاناتى كەلىسكەن بىرەگەي تۇرمىستىق بۇيىمدار گەرمانيا, جاپونيا, قىتاي, تايۆان, اقش-تان الىنعان وزىق ستانوكتار كومەگىمەن جاسالادى. قولدانىسقا كەرەك شيكىزاتتىڭ 80-85 پايىزى وتاندىق ءونىم سانالادى. مەتالل تەمىرتاۋ مەن قاراعاندى, تالدىقورعان قالالارىنان الىنسا, قالعان 15 پايىزى قىتاي ەلىنەن ەلەكتروندىق بولشەك كۇيىندە كەلەدى. زاۋىتتا جاسالعان ونىمدەر زەرتحانالىق تەكسەرىستەن وتكىزىلىپ, ساپاسىنا كەپىلدىك بەرىلەدى.
ءوندىرىس ورنىندا وسى كۇنى 110 ادام تۇراقتى ەڭبەك ەتەدى. جۇمىسكەرلەرگە تولىققاندى جاعداي جاسالعان. زاۋىت ىرگەسىندە الىستان كەلگەن جۇمىسشىلار ءۇشىن 50 ورىندىق جاتاقحانا دا سالىنعان.
«اۋىلىمىزدا وسىنداي زاۋىتتىڭ بارىنا قۋانامىز. سەبەبى تۇرعىنداردىڭ دەنى وسى جەردە ەڭبەك ەتىپ, وتباسىن اسىراپ وتىر. ايلىعىمىز ۋاقتىلى بەرىلەدى. ءبىز ەڭبەك ەتكەلى دە ون شاقتى جىلعا جۋىقتادى», دەيدى قاسىمبەك اۋىلىنىڭ تۇرعىنى جادىرا قارشىباەۆا.
مونتاج ءبولىمىنىڭ بريگاديرى ايعانىم سۇلتانوۆا 3 بريگادا بويىنشا 35 ادام جۇمىس ىستەيتىنىن العا تارتتى. ولاردىڭ باسىم بولىگى – شام قۇراۋدىڭ شەبەرى اتانعان ايەلدەر.
وتاندىق ءونىم وندىرۋدە وزىندىك ورنى بار زاۋىت ونىمدەرى ءتۇرلى دەڭگەيدەگى كورمەلەرگە قاتىسىپ, جۇلدەلى ورىندارعا يە بولىپ ءجۇر. بيىل ينۆەستيتسيا كولەمى 10 ملن دوللاردى قۇراعان. وسى ورايدا جامبىل اۋدانىنىڭ بيۋدجەت قورىن تولىقتىرىپ, سالىق تولەپ وتىرعان زاۋىت ونىمدەرىنە اتالعان اۋداننان تاپسىرىس تۇسپەيتىنى, ياعني ساپالى ءارى كەپىلدىگى بار وتاندىق ءونىمنىڭ جەرگىلىكتى تاراپتان قولداۋ كورمەي وتىرعانى قىنجىلتپاي قويمايدى.
الماتى وبلىسى
