يگى ءىستى «Amanat» پارتياسىنىڭ بەلسەندى مۇشەسى, «اقتەرەك» شارۋا قوجالىعىنىڭ توراعاسى تەمىرلان ءشاينۇسىپوۆ جۇزەگە اسىردى. ىسكەر ازامات بۇعان دەيىن 160 وتباسىنا ءۇي سالىپ بەرگەن ەكەن.
اقتەرەك اۋىلىندا وتكەن سالتاناتتى كىلت تابىستاۋ راسىمىندە جامبىل اۋدانىنىڭ اكىمى نۇرلان ەرتاس تۇرعىنداردى قۇتتىقتاپ, مۇنداي يگى باستامالار اۋىلداردىڭ الەۋمەتتىك-ەكونوميكالىق دامۋىنا زور ىقپال ەتەتىنىن اتاپ ءوتتى.
«تەمىرلان ءشاينۇسىپوۆ اعامىزدىڭ قايىرىمدىلىعىمەن بۇگىن 4 بولمەلى 5 پاتەردىڭ كىلتى تابىستالدى. ول وسى ۋاقىتقا دەيىن 160-تان استام ءۇي سالىپ, اۋىلداستارىنىڭ جاعدايىن جاقسارتتى. الەۋمەتتىك ماسەلەلەردى شەشۋ جولىنداعى وسىنداي باستامالار تەك قانا اۋىلدىق جەرلەردىڭ دامۋىنا ەمەس, تۇتاس ەلدىڭ وركەندەۋىنە ۇلەس قوسادى. اعامىزدىڭ قايىرىمدىلىعى مەن تۋعان جەرىنە دەگەن سۇيىسپەنشىلىگى – بارشامىزعا ۇلگى. بۇگىن كىلت العان وتباسىلاردى قۋانىشتارىمەن قۇتتىقتايمىن. بۇل ۇيلەر سىزدەرگە تەك باسپانا عانا ەمەس, جاڭا ءومىردىڭ باستاماسى بولسىن», دەدى اۋدان اكىمى.
جاڭا ۇيلەر كوپبالالى وتباسىلار مەن اۋىل شارۋاشىلىعىندا ۇزاق جىل بويى ەڭبەك ەتكەن ازاماتتارعا تابىستالدى. ولاردىڭ اراسىندا 40 جىل جۇرگىزۋشى بولىپ ەڭبەك ەتكەن زەينەتكەر مۇراتحان راحمەتقوجاەۆ پەن ۇستا بولىپ جۇمىس ىستەگەن مۇحتار توقسەيىتوۆ تە بار.
«مەنىڭ ومىرىمدە مۇنداي قۋانىش العاش رەت بولىپ تۇر. وسى ءۇيدى سىيعا تارتقان تەمىرلان شاينۇسىپوۆكە العىسىم شەكسىز. ءبىز سياقتى قالىپتى ەڭبەك ەتكەن جانداردى ۇمىتپاي, وسىنداي قولداۋ كورسەتكەنىنە شىن جۇرەكتەن ريزامىن», دەدى مۇراتحان راحمەتقوجاەۆ.
سونىمەن قاتار جاس مەحانيزاتور, ءتورت بالانىڭ اكەسى مەدەت قىپشاقباەۆ, بەس بالانى تاربيەلەپ وتىرعان كوپبالالى وتباسىنىڭ وتاعاسى ەرلان بادامبەكوۆ, ءتورت بالانىڭ اكەسى, «نۇرمۇحاممەتالي» شارۋا قوجالىعىنىڭ جۇمىسشىسى قانات ابدىباەۆ جاڭا قونىسقا يە بولدى.
اقتەرەكتىك تۇرعىنداردىڭ قۋانىشى مۇنىمەن عانا شەكتەلگەن جوق. «Amanat» پارتياسىنىڭ سايلاۋالدى باعدارلاماسى اياسىندا 4 مىڭعا جۋىق تۇرعىنى بار بۇل اۋىلعا گاز قۇبىرى تارتىلىپ, ىسكە قوسىلدى. اۋدان اكىمى نۇرلان ەرتاس پەن «Amanat» پارتياسى الماتى وبلىستىق فيليالىنىڭ اتقارۋشى حاتشىسى ەرلان جاقىپوۆ گاز قۇبىرىنىڭ ىسكە قوسىلۋىمەن تۇرعىنداردى قۇتتىقتادى.
بيىل اۋدانداعى ەلدى مەكەندەردى گازداندىرۋعا بيۋدجەتتەن 6,2 ملرد تەڭگە بولىنگەن. سونىڭ ىشىندە اقتەرەك اۋىلىن گازداندىرۋعا ارنالعان جوبانىڭ قۇنى 1 ملرد 82 ملن تەڭگەنى قۇرايدى. جوبانى جۇزەگە اسىرۋشى مەردىگەر – «كومپانيا گازقۇرىلىس» جشس.
«اۋىلداعى 37 ۇيگە گاز قوسىلعان. الداعى ۋاقىتتا بۇل جۇمىستار جالعاسىپ, اۋىلدىڭ قالعان ۇيلەرىن دە كوگىلدىر وتىنمەن قامتاماسىز ەتۋ جوسپارلانىپ وتىر. ونىڭ كەلۋى تەك تۇرعىنداردىڭ تۇرمىسىن جاقسارتىپ قانا قويماي, اۋىلداعى ماڭىزدى الەۋمەتتىك نىسانداردىڭ جۇمىسىنا دا وڭ ىقپال ەتەدى. مەكتەپتەر, دارىگەرلىك امبۋلاتوريا, بالاباقشالار, مەشىت, شارۋا قوجالىقتارىنىڭ قىزمەت كورسەتۋ ساپاسى ايتارلىقتاي ارتادى. بۇل ءوز كەزەگىندە اۋىلدىڭ الەۋمەتتىك-ەكونوميكالىق دامۋىنا تىڭ سەرپىن بەرەدى», دەپ اتاپ ءوتتى اۋدان اكىمى.
سونداي-اق «Amanat» پارتياسىنىڭ جول كارتاسىنا سايكەس 2027 جىلعا دەيىن ءوڭىردىڭ گازداندىرۋ دەڭگەيىن 70%-عا جەتكىزۋ كوزدەلىپ وتىر. ايتا كەتۋ كەرەك, بۇگىنگى تاڭدا وبلىستا 1,18 ملن ادام گازعا قول جەتكىزگەن.
«اۋداندا شەشىلۋگە ءتيىس ماسەلەلەردى تۇرعىندارمەن بىرلەسىپ تالقىلاپ, ولاردىڭ ۇسىنىس-تىلەكتەرىن جينادىق. سونىڭ ءبىرى – ەلدى مەكەندەردى گازداندىرۋ ماسەلەسى. «Amanat» پارتياسىنىڭ سايلاۋالدى باعدارلاماسى اياسىندا بۇگىن اقتەرەك اۋىلىنا گاز بەرىلىپ, تۇرعىنداردىڭ كوپتەن كۇتكەن ارمانى ورىندالدى. بۇل جۇمىس مۇنىمەن توقتامايدى. الداعى ۋاقىتتا باسقا اۋىلدارعا دا گاز قۇبىرىن تارتۋ جۇمىستارى جالعاسىن تاۋىپ, وبلىستىڭ گازداندىرۋ دەڭگەيى 70 پايىزعا دەيىن ارتادى», – دەدى ە.جاقىپوۆ.
الماتى وبلىسى
