جاڭا دارىگەرلىك نىسان پرەزيدەنت قاسىم-جومارت توقاەۆتىڭ تاپسىرماسىنا سايكەس, «اۋىلدا دەنساۋلىق ساقتاۋدى جاڭعىرتۋ» ۇلتتىق جوباسىنىڭ اياسىندا سالىنعان. امبۋلاتوريا عيماراتى دارىگەرلىك قىزمەتكە قاجەتتى جابدىقتارمەن تولىق قامتىلعان. مۇندا ناۋقاستى قابىلداۋ, ۆاكتسيناتسيا, اكۋشەر, فيزيوتەراپيا, تۋبەركۋلەزگە قارسى ەم-شارالار بولمەلەرى, سونداي-اق قاجەت كەزىندە ناۋقاستى وقشاۋلايتىن پالاتا, ءتىپتى ءدارىحانا بولمەسى دە قاراستىرىلعان.
– اۋىلدا وسىنداي امبۋلاتوريانىڭ اشىلۋى حالىقتىڭ ءومىر ساپاسىن جاقسارتۋ جونىندەگى مەملەكەت باسشىسىنىڭ تاپسىرماسى جۇيەلى ورىندالىپ جاتقانىن كورسەتەدى. ءبىز وڭىردەگى دەنساۋلىق ساقتاۋ جۇيەسىنە, سونىڭ ىشىندە اۋىل مەديتسيناسىنا ۇنەمى كوڭىل ءبولىپ, دامىتىپ كەلەمىز. ماقساتىمىز – ءار تۇرعىن, اسىرەسە اۋىل حالقى قاي جەردە تۇراتىنىنا قاراماستان تولىققاندى زاماناۋي دارىگەرلىك كومەككە قول جەتكىزۋگە ءتيىس. بيىل اقجايىق اۋدانىندا دەنساۋلىق ساقتاۋ سالاسىن جاڭعىرتۋ باعدارلاماسى اياسىندا 8 نىسان سالىنىپ جاتىر. بازارتوبە اۋىلىنداعى امبۋلاتوريا – سونىڭ العاشقىسى. بازارتوبەلىكتەرگە قۋانىش قۇتتى بولسىن ايتامىز, – دەدى وبلىس اكىمى ناريمان تورەعاليەۆ.
راسىندا, بۇل ۇلكەن قۋانىش. ويتكەنى جايىق وزەنىنىڭ سول جاق بەتىندە ورنالاسقان ەلدى مەكەن تۇرعىندارىنا اۋدان ورتالىعىنداعى اۋرۋحاناعا بارۋى قيىن. وزەندە كوپىر جوق, اسفالت جولدا جوق. ەندى تۇرعىندار جەڭىل-جەلپى اۋرۋعا بولا اۋدان ورتالىعىنا بارۋدىڭ ازابىنان قۇتىلدى.
ءوڭىر باسشىسى اقجايىق اۋداندىق اۋرۋحاناسىنىڭ ديرەكتورى اناربەك بەليسانوۆقا مەديتسينالىق مەكەمە ۇجىمىنىڭ حالىق اراسىندا سالاماتتى ءومىر سالتىن ناسيحاتتاپ, جۇرتشىلىقتىڭ ءوز دەنساۋلىعىنا جاۋاپكەرشىلىگىن كۇشەيتۋى قاجەتتىگىن دە ەسكەرتتى. جاڭا عيماراتتىڭ لەنتاسىن وبلىس اكىمى مەن اۋىلدىق ارداگەرلەر كەڭەسىنىڭ توراعاسى حاميت جاناليەۆ كەستى.
– ءبىز بۇگىن وتە قۋانىشتىمىز. تۋعان اۋىلىمىزدا وسىنداي زاماناۋي نىساننىڭ اشىلۋى ءبىزدىڭ ۋاقىتىمىزدا دا, قارجىمىزدا دا ۇنەمدەيدى. جاڭا امبۋلاتوريانى سالۋعا اتسالىسقان بارشا جانعا العىس ايتامىز, – دەيدى حاميت اعا.
باتىس قازاقستان وبلىسى
