ەسىرتكىگە قاتىستى قىلمىس كوبەيگەن - باس پروكۋراتۋرا

جىلدام اقشا تابامىن دەپ جاۋاپكەرشىلىككە تارتىلىپ جاتقانداردىڭ اتا-اناسى جازانى جەڭىلدەتۋدى سۇرايتىنى جاسىرىن ەمەس. 

بيىل زاڭسىز اينالىمنان كولەمى 18 400 كەلىدەن اساتىن ەسىرتكى تاركىلەنگەن. ونىڭ 467 كەلىسى - سينتەتيكالىق ەسىرتكى. باس پروكۋراتۋرانىڭ اقپاراتىنا سايكەس, سوڭعى 11 ايدا ەسىرتكىنى قايتا وڭدەپ, ساتىپ الىپ نەمەسە ساقتاعان 894 ادام جاۋاپكەرشىلىككە تارتىلسا, 33-ءى كامەلەتكە تولماعان بالا.

«ستۋدەنت ۇلىم الاڭدا بىرگە ويناپ وسكەن دوسىنىڭ ەسىرتكىمەن اينالىسىپ جۇرگەن كۋراتور ەكەنىن, ونى قىلمىسقا جىبەرگەنىن بىلمەگەن. «ەسىرتكى سالىنعان پاكەتتى قولىنا الىپ, بەلگىلەنگەن جەرگە ونى قويۋدى ۇيرەت», دەگەن ديولوگتى سوتتا بىراق ەستىدىك. بۇل ەسىرتكى ساۋدالاعان ەكى ادامنىڭ اراسىنداعى اڭگىمە. بىراق ۇلىم ءوز كولىگىمەن بىرنەشە رەت دوسىن, ياعني ەسىرتكىمەن اينالىسقان كۋراتوردى ايتقان مەكەنجايعا جەتكىزىپ جۇرگەن. ۇلىم وقۋىنا كەتەتىن كۇنى وسى اۋىر جاعداي بولدى», دەيدى جازاسىن وتەۋشىنىڭ اناسى گۇلميرا ءماجنۇنوۆا.

حابار ارناسىنىڭ اقپاراتىنشا, گۇلميرا ءماجنۇنوۆانىڭ ۇلىنا ەسىرتكىنى ۇيىمداسقان توپپەن بىرگە ساتپاق بولدى دەپ, 297-باپتىڭ 3-تارماعى بويىنشا ۇكىم شىققان. زاڭ بويىنشا ەسىرتكىمەن اينالىسقان ەرەسەكتەر نەمەسە كامەلەت جاسىنا تولماعاندارعا 10 جىلدان 20 جىلعا دەيىن باس بوستاندىعىنان ايىرۋ جازاسى بار. سوت شەشىمى شىقسا مۇلكى دە تاركىلەنەدى.

«18 مىڭنان استام ازامات ەسىرتكىگە تاۋەلدى ازامات رەتىندە تىركەۋدە تۇرادى. جىلىنا 3,5 مىڭنان استام ازاماتقا قىلمىستىق ءىس قوزعالاتىن بولسا, 2,5 مىڭنان استام ازامات سوتتالادى. ەندى ءبىر جىلدا وسىنداي تەندەنتسيانى بايقايتىن بولساق, 10 جىلدا 25 مىڭ. ياعني ءبىر اۋىلدىڭ ازاماتى سوتتالىپ كەتەيىن دەپ تۇر. ەلىمىزدە ازاماتتاردىڭ ءىستى بولۋى جاقسى ءىس ەمەس», دەدى زاڭگەر, ساراپشى راۋان قاليەۆ.

ماجىلىستە وسىعان قاتىستى زاڭ بىلتىردان بەرى قارالىپ جاتىر. ءماجىلىس ۇسىنىلىپ وتىرعان وزگەرىستەردى ماقۇلداسا ەسىرتكى تاسىعاندار ءۇشىن 7 جىلدان 12 جىلعا دەيىن باس بوستاندىعىنان ايىرىلادى.