فوتو: Oqu-agartu ministrligi
2024-2025 وقۋ جىلىندا ورتا ءبىلىم بەرۋ ۇيىمدارىندا پەداگوگتەر سانى 406 مىڭعا جەتكەن, بۇل بىلتىرعى وقۋ جىلىمەن سالىستىرعاندا 8 مىڭعا كوبەيگەنىن كورسەتەدى.
پەداگوگتەردى جۇمىسقا قابىلداۋدىڭ جوعارى كورسەتكىشى تۇركىستان, الماتى, جامبىل وبلىستارىندا جانە شىمكەنت قالاسىندا تىركەلگەن. وسىلايشا, وڭىرلەردەگى مامان تاپشىلىعى تولىعىمەن جويىلىپ وتىر.
سۇرانىس پەداگوگ ماماندىعىن بىتىرگەن تۇلەكتەر ەسەبىنەن تولىقتىرىلىپ جاتىر. سەبەبى, سوڭعى جىلدارى دارىندى جاستار اراسىنان پەداگوگيكالىق ماماندىقتارعا تۇسۋشىلەردىڭ وڭ ديناميكاسى بايقالعان. مىسالى, بىلتىر 1500 «التىن بەلگى» يەگەرى پەداگوگ ماماندىعىن تاڭداسا, بيىل 1800-ءى تاڭدادى.
«جەرگىلىكتى اتقارۋشى ورگاندار تاراپىنان پەداگوگيكالىق ماماندىقتار بويىنشا ءبىلىم بەرۋ گرانتتارىنىڭ سانى ارتىپ كەلەدى جانە شەكتى بالدىڭ 50-دەن 75 بالعا دەيىن وسۋىنە قاراماستان, ماماندىققا دەگەن قىزىعۋشىلىق جوعارى بولىپ قالا بەرەدى. بيىل پەداگوگيكالىق باعىتتا جوو اياقتاۋشىلار سانى 48 مىڭ ادامدى قۇراعان, ونىڭ 2 مىڭعا جۋىعى وبلىس اكىمدەرىنىڭ گرانتى بويىنشا ءبىلىم العان. جاڭا وقۋ جىلى باستالعالى 8 مىڭعا جۋىق پەداگوگ جۇمىسقا قابىلداندى», دەيدى ورتا ءبىلىم كوميتەتىنىڭ توراعاسى قانىبەك جۇماشەۆ.
ايتا كەتسەك, جالپى 2021 جىلدان باستاپ ءبىلىم بەرۋ جۇيەسىنە جاس مامانداردى تارتۋ بويىنشا بىرقاتار شارالار قابىلدانىپ كەلەدى. اتاپ ايتقاندا, پەداگوگيكالىق باعىتتارعا گرانتتار سانى ارتقان, جوو ستۋدەنتتەرى ءۇشىن ستيپەنديا مولشەرى 58 مىڭنان 67 مىڭ تەڭگەگە دەيىن ۇلعايتىلعان. بۇل رەتتە پەداگوگيكالىق ماماندىقتارعا تۇسەتىن تالاپكەرلەردىڭ ۇبت قورىتىندىسى بويىنشا ورتاشا بالى – 115-ءتى قۇرادى.
