بۇگىندە جاناسبەكتەي جاۋىنگەرمەن ءبىر ساپتا قىزمەت ەتىپ جۇرگەنىنە ماقتاناتىن ۇلاندىقتار كوپ. 6699 اسكەري ءبولىمىنىڭ اسكەري قىزمەتشىسى – حالقىنا ادال سارباز, وتباسىندا ۇلگىلى اكە. وسىلاي دەگەن گەنەرال-مايور قايرات ۇمبەتوۆ ونەگەلى وتباسىنا ارنايى كەلىپ, بالالارعا بازارلىق سىيلاپ, قارۋلاسىنىڭ وتباسىمەن جاقىنىراق تانىسۋدى ءجون كورگەن.
«ۇلتتىق ۇلان قولباسشىلىعى قاشاندا قاتارىمىزدا قىزمەت ەتىپ جۇرگەن كوپبالالى وتباسىلارعا ەرەكشە كوڭىل ءبولىپ, ولارعا الەۋمەتتىك قولداۋ تانىتىپ كەلەدى. بۇگىنگى كەزەكتى قىزمەتتىك ساپارىمدا وسىنداي ءبىر ونەگەلى وتباسىمەن جۇزدەسۋ ءساتى ءتۇستى», دەدى ول.
كوپشىلىككە ءمالىم, بيىل مامىردا جاناسبەك كوزسىز ەرلىك تانىتىپ, جۇرت ىقىلاسىنا يە بولدى. وسكەمەن قالاسىندا ءۇلبى وزەنىنىڭ جاعاسىندا سەرۋەندەپ جۇرگەن ول سۋعا باتىپ, اينالاسىنان كومەك سۇراعان قىزدى بايقايدى. وزەننىڭ قاتتى اعىسىنا قاراماستان, سۋعا لاپ قويعان جاناسبەك بويجەتكەندى وزەن جاعاسىنا شىعارىپ, العاشقى مەديتسينالىق كومەك كورسەتكەن. جاۋىنگەردىڭ جانكەشتى ارەكەتىنىڭ ارقاسىندا قىز ءولىم اۋزىنان امان قالدى. بۇل ەرلىگى ءۇشىن ەفرەيتور مەملەكەت باسشىسىنىڭ جارلىعىمەن ءىىى دارەجەلى «ايبىن» وردەنىمەن ماراپاتتالدى.
– سالقىندىعى شەكەدەن وتەتۇعىن ءۇلبى وزەنى ەسىمە تۇسسە, دەنەم قازىر دە تىتىركەنىپ كەتەدى. شىنىمدى ايتسام, سۋعا تۇسۋگە قۇمار ادامدار قاتارىنان ەمەسپىن. بىراق مۇنداي جاعدايدا اسكەري قىزمەتشى بولعاندىقتان, دەرەۋ شارا قولدانىپ, قورقىنىشىڭدى ۇمىتۋ قاجەت. وسكەمەندى كەسىپ وتەتىن قاي وزەننىڭ بولسىن اعىسى قاتتى. ال كوكتەم مەزگىلىندە, ياعني سۋ كوتەرىلگەن شاقتا وزەنگە ءتۇسۋ – ءتىلسىز جاۋدىڭ ءبىر ساتتە قۇربانىنا اينالۋمەن بىردەي. سوندىقتان قالا تۇرعىندارىنا سۋعا تۇسۋگە رۇقسات ەتىلگەن ءيىرىمى از ارنايى جاعاعا بارىپ, وزەنگە شومىلماۋعا كەڭەس بەرەر ەدىم. جالپى, كەز كەلگەن ادام ءتىلسىز جاۋدان قورعانىپ, ساقتىق شارالارىن ەستە ۇستاعان دۇرىس. اسىرەسە, اعىسى قاتتى وزەندەردە شومىلعاندا بارىنشا اباي بولۋلارىن سۇرايمىن, – دەيدى جاناسبەك.
بۇل وقيعا ونىڭ ەسىندە ۇزاققا دەيىن قالارى ءسوزسىز. بىراق سول كۇنى ەفرەيتور اعىستىڭ قاتتى ەكەنىن اڭعارعاننان كەيىن كومەك قولىن سوزۋعا قاتار كەلگەن جولداسىنا سۋعا تۇسۋگە كەڭەس بەرمەگەن. اساۋ تولقىندى ءۇلبى تۇتاستاي ۇشەۋىن دە اعىزىپ اكەتەر دەگەن وي قىلاڭ بەرسە كەرەك. جاناسبەك ۇلتتىق ۇلاندا 2011 جىلدان باستاپ قىزمەت ەتىپ كەلەدى. اسكەري قىزمەتكەر جان شوشىرلىق شاقتاعى تايىنباس باتىل ارەكەتىمەن قارۋلاستارىنىڭ اراسىندا دا ۇلگى بولا ءبىلدى.
– جاناسبەك بار جەردە قويىلعان تاپسىرما جوعارى دەڭگەيدە ورىندالادى. سوندىقتان قايتا-قايتا قاۋزاپ, قويىلعان تاپسىرمانى تاپتىشتەپ, سۇراۋدىڭ دا قاجەتى جوق. جاناسبەكتەي جاۋاپكەرشىلىگى جوعارى سەنىمدى ازاماتتاردىڭ ۇلتتىق ۇلان ساپىندا قىزمەت ەتۋى – ءبىز ءۇشىن ماقتانىش. ويتكەنى ول كەز كەلگەن ۋاقىتتا ناعىز جاۋىنگەرگە ءتان جانكەشتىلىگىمەن وزگەلەردەن بيىك تۇرادى. سونداي-اق ول كومەك سۇراعانعا قولۇشىن بەرۋدەن ەش جالىققان ەمەس. بالكىم, وسىنداي ادامگەرشىلىك قاسيەتتەرىنەن كەيىن بە ەكەن, ۇجىمدا سىيلى ءارى ابىرويلى. سونىمەن قاتار ونىڭ دومبىرا شەرتىپ, كۇي ورىنداي الاتىن ونەرى بارىن بىرەۋ بىلسە, بىرەۋ بىلمەس. ول دومبىرانى ماقامىنا كەلتىرىپ ورىنداعاندا قازاق كۇيلەرىنىڭ قۇدىرەتىن سەزىنىپ, بويىڭدى ەرەكشە رۋح بيلەيدى, – دەيدى 6699 اسكەري ءبولىمىنىڭ 3-اتقىشتار روتاسىنىڭ كومانديرى شالقار اسيحان.
جاۋجۇرەك جاۋىنگەردىڭ وتباسىندا ءتورت بالا بار. قوناققا كەلگەن گەنەرال بالالارعا بازارلىق تاراتىپ, شاڭىراققا شادىمان قۋانىش سىيلادى. ايتپاقشى, حالىق قاھارمانى قايرات ۇمبەتوۆتىڭ ءوزى دە وقۋ-جاتتىعۋ كەزىندە قاتارداعى ساربازدى گراناتا جارىلىسىنان قۇتقارىپ, ەرەن ەرلىك ۇلگىسىن كورسەتكەن ەدى. بەيبىت كۇننىڭ قوس باتىرى قوعامداعى وقيعالارعا بەيجاي قاراماي, جاس ۇرپاقتىڭ بويىنا وتانسۇيگىشتىك قاسيەتتى دارىتۋ قاجەتتىگىن ءسوز ەتتى. كەش سوڭىندا كوپكە ۇلگى بولعان كوپبالالى وتباسى شاڭىراققا ارنايى ات باسىن بۇرعان ۇلتتىق ۇلان باس قولباسشىسىنىڭ ورىنباسارىنا العىس ءبىلدىردى.
