«جىل ۆولونتەرى» بايقاۋى مەملەكەت باسشىسى قاسىم-جومارت توقاەۆتىڭ باستاماسىمەن 2020 جىلدان بەرى وتكىزىلىپ كەلەدى. بۇل سىيلىق قوعامدىق پايدالى باستامالاردى دامىتۋعا ەلەۋلى ۇلەس قوسقان ۆولونتەرلەردى ىنتالاندىرۋعا جانە ەرىكتىلىك قوزعالىسقا جاڭا قاتىسۋشىلاردى تارتۋعا باعىتتالعان.
– ۆولونتەر دەگەن تۇسىنىك ءبىزدىڭ اسار ۇعىممەن ۇشتاسادى. جىل ۆولونتەرىن انىقتاۋداعى ماقسات – ەسەپسىز, ەسىل ۋاقىتتارىن جۇمساعان قايىرىمدى جاندارعا دەگەن العىس نيەتى. وعان قوسا ولاردى كوپ الدىنا شىعارىپ تانىستىرۋ, جىل بويىنا جاساعان ەڭبەكتەرىن ناسيحاتتاۋ, سايكەسىنشە, قوعامدا مەيىرىمدىلىك, قايىرىمدىلىق قۇندىلىقتارىنىڭ ورنىعۋىنا ىقپال ەتۋ. مەنىڭشە, بايقاۋ الەۋمەتتىك ماڭىزى بار مىندەتتەردى بەلسەندى تۇردە شەشىپ, ۆولونتەرلىك مادەنيەتتى دامىتاتىن وتاندىق جانە حالىقارالىق ۆولونتەرلەر مەن ۆولونتەرلىك ۇيىمداردىڭ ەڭبەگىن, قوعامنىڭ ىلگەرىلەۋىنە قوسقان ۇلەسىن مويىنداۋ الاڭىنا اينالدى. ءارى بيىلعى جوبالار مەن باستامالار ەرىكتىلىك قىزمەتتەگى جانقيارلىق پەن تيىمدىلىكتىڭ ۇلگىسى بولدى, – دەدى ۇلتتىق ۆولونتەرلەر فرونت-ءوفيسىنىڭ جەتەكشىسى ايبەك دوسىمبەتوۆ.
حالىقارالىق ۆولونتەرلەر كۇنىن مەرەكەلەۋ اياسىندا ەلىمىزدە ۆولونتەرلىك جانە قايىرىمدىلىق مادەنيەتىن دامىتۋعا باعىتتالعان «يگى ىستەر مارافونى» جوباسىنىڭ جەڭىمپازدارى بەلگىلى بولدى.
جالپى, «يگى ىستەر مارافونى» جوباسى 2024 جىلدىڭ 9 شىلدەسىنەن 1 جەلتوقسانىنا دەيىن رەسپۋبليكانىڭ ءار ءوڭىرىن قامتىپ, بىرلىكتىڭ كۇشىن, يگىلىكتىڭ ۇلگىسىن كورسەتتى. مارافون بارىسىندا 7 مىڭنان استام يگى ءىس جاسالدى. ال قاتىسۋشىلار سانى 50 مىڭعا جۋىقتادى.
باستاما بەس اپتادان تۇراتىن يگى ىستەردى قامتىدى. اتاپ ايتقاندا, «ەكولوگيا», «ينكليۋزيا», جانۋارلاردى قورعاۋ, قارتتار مەن جاستار كۇنىنە ارنالعان مەيىرىم اپتالىعى.
جوبا اياسىندا 3 200-گە جۋىق اعاش ەگىلدى, 240 توننا قوقىس, پلاستيكا, ماكالاتۋرا جينالدى, 1000-نان اسا ءۇيسىز قالعان جانۋارلارعا كومەك كورسەتىلدى. 6000 وتباسىنا, مۇمكىندىگى شەكتەۋلى ازاماتتارعا, جالعىزىلىكتى قارتتارعا ازىق-ت ۇلىك, تۇرمىستىق حيميا, ءدارى-دارمەك ۇلەستىرىلىپ, اۋلانى تازالاپ, وتىن جارىپ كومەك كورسەتىلدى. وسىنداي قايىرىمدى ىستە شەت قالماي, قول ۇشىن سوزعاندار اراسىنان «ەڭ مەيىرىمدى ايماق», «ەڭ مەيىرىمدى ۇجىم», «ەڭ مەيىرىمدى وقۋ ورنى», «ەڭ مەيىرىمدى اۋىل», «ەڭ بەلسەندى مەديا» اتالىمىندا ۇزدىكتەر انىقتالىپ, 20 جەڭىمپاز ماراپاتتالدى.
سونداي-اق مەرەكە اياسىندا استانادا «Volunteer FEST-2024» فەستيۆالى ءوتتى. مۇندا دا ەكولوگيا, مەديتسينا, الەۋمەتتىك كومەك, ينكليۋزيا سىندى سالالاردا جۇمىس ىستەيتىن 70-تەن استام ەرىكتىلەر ۇيىمى ماراپاتتالدى. اسىرەسە تابيعاتتى قورعاۋعا اتسالىسقاندارعا, حالىقتىڭ وسال توپتارىن قولداعاندارعا, توتەنشە جاعدايلار كەزىندە توسىلماي جەدەل ارەكەت ەتكەن جاندارعا, مۇمكىندىگى شەكتەۋلى ازاماتتارعا كومەكتەسكەندەرگە, قوعامدا تەمىردەي ءتارتىپتىڭ ساقتالۋىنا ۇلەس قوسقاندارعا, ەل ساۋلىعىنا الاڭداعاندارعا, جانۋارلارعا قامقورلىق ەتكەندەرگە ەرەكشە قۇرمەت كورسەتىلدى.
قايىرىمدى ىستە كوپتىڭ العىسىن ارقالاعانداردىڭ ءبىرى – «مەيىرىمدى جاندار» قوزعالىسى. ەرىكتىلەر توبى بەس جىلدان بەرى كوپبالالى انالارعا, ەرەكشە بالالارى بار وتباسىلارىنا جانە حالىقتىڭ الەۋمەتتىك وسال توپتارىنا جاردەم بەرىپ كەلەدى. ولاردىڭ كۇش-جىگەرى تەك كومەك بەرۋمەن شەكتەلمەي, ەلدە ۆولونتەرلەر قاتارىن ارتتىرۋعا دا سەپ بولىپ ءجۇر. ياعني كومەككە, قولداۋعا يە بولعانداردىڭ كوپشىلىگى قازىر «مەيىرىمدى جاندارمەن» بىرگە ەرىكتىلىكپەن اينالىسادى.
– ءسىز ۇلكەن وزگەرىسكە سەبەپ بولعان كەزدە, ءسىزدىڭ مىندەتىڭىز ءوز ەلىڭىزدى جاقسارتۋ جانە قيىن جاعدايعا تاپ بولعاندارعا كومەكتەسۋ ەكەنىن تۇسىنەسىز. ءبىزدىڭ ماقساتىمىز ءبىر – مۇقتاج جاندارعا قولداۋ كورسەتۋ جانە جاناشىر ازاماتتاردىڭ جاڭا بۋىنىن تاربيەلەۋ, – دەدى «مەيىرىمدى جاندار» ەرىكتىلەر قوزعالىسىنىڭ جەتەكشىسى دينارا ىدىرىسوۆا.
فەستيۆالعا مىڭداعان قاتىسۋشى جينالدى, ولاردىڭ اراسىندا تانىمال قوعام قايراتكەرلەرى, بلوگەرلەر مەن ەسترادا جۇلدىزدارى بولدى. قوناقتار ەرىكتىلەردىڭ جۇمىسىمەن تانىستىراتىن فوتوكورمەنى تاماشالادى. ءىس-شارا «تازا قازاقستان» اكتسياسى اياسىندا «استانا جاستارى» جاستار رەسۋرستىق ورتالىعى مەن ەلوردالىق جاستار ساياساتى ماسەلەلەرى باسقارماسىنىڭ ۇيىتقى بولۋىمەن ۇيىمداستىرىلدى.
– ءبىزدىڭ ەرىكتىلەر جوعالعان ادامداردى ىزدەۋگە, مۇمكىندىگى شەكتەۋلى جاندارعا كومەكتەسۋگە, ەكولوگيالىق جاعدايدى جاقسارتۋعا بەلسەندى قاتىسادى. بيىل ەلىمىزدە جاستار مەن كۇمىس ەرىكتىلەرگە, ياعني قوعامعا كومەكتەسۋگە بەلسەندى قاتىساتىن ەگدە جاستاعى ادامدارعا ەرەكشە نازار اۋدارىلدى. بۇگىندە استانادا 6000-نان استام ادامدى قامتيتىن 70-كە جۋىق ۇيىم جۇمىس ىستەيدى. ءبىز ولاردى ناگرادالارمەن عانا ەمەس, باعالى سىيلىقتارمەن, كەزدەسۋلەرمەن جانە كەرى بايلانىسپەن دە قولداۋعا تىرىسامىز, – دەدى استانا قالاسى جاستار ساياساتى ماسەلەلەرى باسقارماسىنىڭ باسشىسى سامات يبراەۆ.
