پەشەنەگە جازىلعان عۇمىرىندا تۋعان جەرى تۇرار رىسقۇلوۆ اۋدانىنان ىرگەسىن الىستاتپاعان قالامگەر كارىپجان ءنۇسىپتىڭ شىعارماشىلىعى دا كىتاپحانا قىزمەتكەرلەرىنىڭ نازارىنان تىس قالعان جوق. تىرىسىندە «سىرساندىق», ء«ومىر ورنەكتەرى» سەكىلدى جىر-جيناقتارىمەن وقىرمان جۇرەگىنە جول تاپقان كارەكەڭنىڭ «بالالارعا بايعازى» اتتى جيناعى سان ءتۇرلى جانرعا تولى. بۇل كىتاپتاعى جاڭىلتپاشتار, اناگراممالار, جۇمباقتار جانە وزگە تۋىندىلاردى جەرگىلىكتى ءبىلىم ءبولىمىنىڭ باسشىلارى مەكتەپتەگى بالالاردىڭ ساناسىنا سىڭىرۋگە ىقپال ەتتى. ال «ونەر دەگەن ولكە بار» اتتى پروزالىق جيناعىندا تۋعان جەردەن تۇلەپ ۇشقان تالانتتار تۋرالى كەڭىنەن تولعانعان.
الاتاۋ باۋرايىنداعى الماتىدا جوعارى ءبىلىم السا دا, 44 جىل بويى اۋداندىق «قۇلان تاڭى» گازەتىندە ءۇزىلىسسىز ەڭبەك ەتكەن قالامگەر شىعارماشىلىعىنا ارنالعان «ونەر شىڭىن ەشبىر جان قۇلاتا الماس» اتتى پوەزيا كەشىنە اقىننىڭ جەرلەستەرى, شاكىرتتەرى, قالامگەرلەر, باۋىرلارى, مەكتەپ وقۋشىلارى ارنايى قاتىستى.
ءىس-شارا بارىسىندا ءسوز العان كارىپجان ءنۇسىپتىڭ ۇل-قىزدارى نۇرداۋلەت ءنۇسىپوۆ, گۇلنازىم اتاباەۆا, اينازىم نامازباەۆا جانە قارىنداسى نۇرشا ءنۇسىپوۆا, جەرگىلىكتى تەلەارنانىڭ ارداگەرى, ۇزاق جىلدار بويى باس رەجيسسەر قىزمەتىن اتقارعان اقىننىڭ جيەنى قارجاۋباي سىدىقنازاروۆ, كومپوزيتور دۇيسەنالى بىقىباەۆ قالامگەردىڭ ونەگەگە تولى ءومىرى تۋرالى ەستەلىك ايتتى. الماتىدان جانە وزگە وڭىرلەردەن كەلگەن قالامگەرلەر مەن كارەكەڭنىڭ شاكىرتتەرى دە ءوز ەستەلىكتەرىمەن ءبولىستى.
ادەبي كەشكە قالامگەردىڭ تۋعان جەرىنەن كەلگەن تۇرار رىسقۇلوۆ اۋداندىق مادەنيەت ءۇيىنىڭ قىزمەتكەرلەرى دە اتسالىستى. ورەلى ولەڭ, ادەمى اندەرمەن ادىپتەلگەن كەش بارىسىندا اقىننىڭ سوزىنە جازىلعان ء«بىز ەكەۋمىز», «سەرىكتەسىپ جۇرەيىك» سەكىلدى شىعارمالار شىرقالدى. ال ءاليحان بوكەيحانوۆ اتىنداعى گيمنازيانىڭ وقۋشىلارى اقىن ولەڭدەرىن جاتقا وقىپ, كوپشىلىكتىڭ ىستىق ىقىلاسىنا بولەندى.
جامبىل وبلىسى
