فوتو: ۇكىمەت
باستى مىندەت – پرەزيدەنتتىڭ «ادىلەتتى قازاقستان: زاڭ مەن ءتارتىپ, ەكونوميكالىق ءوسىم, قوعامدىق وپتيميزم» اتتى جولداۋىندا ايتىلعان, وڭىرلەردەگى حالىقتىڭ ءال-اۋقاتىن ارتتىرۋ جانە ستراتەگيالىق ماسەلەلەردى شەشۋ ارقىلى ورنىقتى الەۋمەتتىك-ەكونوميكالىق پروگرەستى قامتاماسىز ەتۋ جونىندەگى تاپسىرمالارىن ورىنداۋ. ماڭعىستاۋ وبلىسى اكىمىنىڭ, سالالىق مينيسترلىكتەر باسشىلارىنىڭ باياندامالارى تىڭدالدى.
كولىك جانە لوگيستيكا, وتىن-ەنەرگەتيكا كەشەنى, كوممۋنالدىق ينفراقۇرىلىم, تۋريستىك كلاستەردى قوسقاندا, وبلىس ەكونوميكاسىنىڭ نەگىزگى سالالارىن دامىتۋ جونىندەگى شارالار تالقىلاندى.
پرەمەر-مينيسترگە ماڭعىستاۋ وبلىسىنىڭ 2021-2023 جىلدار ارالىعىنداعى الەۋمەتتىك-ەكونوميكالىق دامۋىنىڭ كەشەندى جوسپارى وڭىرلىك ءونىمنىڭ 50%-عا – 4,5 ترلن تەڭگەگە دەيىن ءوسۋىن قامتاماسىز ەتكەنى باياندالدى. 2025 جىلعا دەيىنگى كەزەڭدە 1,8 ترلن تەڭگە سوماسىنا 259 ءىس-شارانى ىسكە اسىرۋ كوزدەلگەن.
ماڭعىستاۋ وبلىسىنىڭ ەلىمىزدەگى كولىك-لوگيستيكا سالاسى ءۇشىن ستراتەگيالىق ماڭىزىن ەسكەرە وتىرىپ, رەسپۋبليكالىق ماڭىزى بار ۇزىندىعى 680 شاقىرىمدى قۇرايتىن اۆتوجولدار ۋچاسكەلەرىن جوسپارلى رەكونسترۋكتسيالاۋدى قوسقاندا, اقتاۋ پورتى بازاسىندا كونتەينەرلىك حاب سالۋ جانە باسقا دا ينفراقۇرىلىمدى دامىتۋ ماسەلەلەرى قارالدى. تەڭىز پورتىن, اۋە جانە تەمىرجول ينفراقۇرىلىمىن كەڭەيتۋ, ءتۇرلى قىزمەت كورسەتۋ جانە ولاردىڭ ساپاسىن ارتتىرۋ باسىمدىققا يە بولۋى ءتيىس.
كولىك ءمينيسترى مارات قاراباەۆ بيىلعى 10 ايدا تحكب ءدالىزى بويىنشا تاسىمالداۋ كولەمى 68%-عا, ال كونتەينەرلىك تاسىمالداۋ 2,7 ەسەگە ارتقانىن باياندادى. تەمىرجول كولىگىمەن 2,3 ملن توننا, تەڭىز جولىمەن — 6,3 ملن توننا جۇك تاسىمالداندى, بۇل 2023 جىلمەن سالىستىرعاندا 3%-عا ارتىق.
پرەمەر-مينيستر ماڭعىستاۋ وبلىسىندا اۆياتسيالىق حابتى دامىتۋ قاجەتتىگىنە توقتالدى. كولىك مينيسترلىگىنە ەنەرگەتيكا مينيسترلىگىمەن جانە «قازمۇنايگازبەن» بىرلەسىپ وڭىرگە اۆياوتىندى تىكەلەي جەتكىزۋ, سونداي-اق شەتەلدىك اۆياكومپانيالاردى تارتا وتىرىپ, جاڭا باعىتتار بويىنشا سۋبسيديالاناتىن ىشكى اۆيارەيستەردى ۇلعايتۋ ماسەلەلەرىن پىسىقتاۋ تاپسىرىلدى. سونىمەن قاتار ماڭعىستاۋ وبلىسىنا باسقا وڭىرلەردەن جولاۋشىلار مارشرۋتتارىن كوبەيتۋ ءۇشىن تەمىرجول ينفراقۇرىلىمىن دامىتۋ ماڭىزدى.
ولجاس بەكتەنوۆ «اقتاۋ تەڭىز پورتى» ەركىن ەكونوميكالىق ايماعىن كەڭەيتۋ ءۇشىن الەۋەتتى ينۆەستورلاردى تارتۋ جونىندەگى جۇمىستى كۇشەيتۋدىڭ ماڭىزىنا نازار اۋداردى. بۇل رەتتە جوبالاردى ىسكە اسىرۋ بارىسىندا وبلىس تۇرعىندارى ءۇشىن تۇراقتى جۇمىس ورىندارىن اشۋ ماڭىزدى. وسى جىلدىڭ 11 ايىنىڭ قورىتىندىسى بويىنشا 525 جۇمىس ورنىن اشقان 14 جوبا ىسكە قوسىلدى.
بۇگىنگى تاڭدا ءوڭىردىڭ وڭدەۋ ونەركاسىبىندە 17,2 مىڭ ادام جۇمىس ىستەيدى. ونەركاسىپ جانە قۇرىلىس ءمينيسترى قانات شارلاپاەۆ سالادا تۇراقتى جۇمىس ورىندارىن اشۋ ماقساتىندا ينۆەستورلاردى ىزدەۋ جۇمىستارى جۇرگىزىلىپ جاتقانىن ايتتى. قازىرگى ۋاقىتتا 3,9 مىڭ جۇمىس ورنىن اشاتىن 1,5 ترلن تەڭگە سوماسىنا 19 پەرسپەكتيۆالىق جوبا پىسىقتالۋدا.
ەنەرگەتيكا سالاسىندا جاۋاپتى مينيسترلىكتىڭ الدىنا «قىزىل تاۋەكەل ايماعىنداعى» 19 ەنەرگيا كوزىنىڭ, جىلۋ جانە ەلەكتر ماگيسترالدى جانە ورامىشىلىك جەلىلەردىڭ تىزبەسىنە كىرەتىن ماەك-ءتى جاڭعىرتۋ بويىنشا مىندەتتەر قويىلدى. بۇعان دەيىن ماەك-ءتىڭ تۇراقتى جۇمىسى ءۇشىن رەسپۋبليكالىق بيۋدجەتتەن 5 ملرد تەڭگە بولىنگەن بولاتىن.
جيىندا جىلۋ جانە سۋمەن قامتاماسىز ەتۋ ماسەلەلەرىن شەشۋ قاجەتتىگى اتاپ ءوتىلدى.
«وڭىردە جىلۋمەن جابدىقتاۋدىڭ ىشكى كۆارتالدىق جەلىلەرىنىڭ جوعارى دەڭگەيدە توزۋى – ۇلكەن ماسەلە. جىلىتۋ ماۋسىمى باستالعاننان بەرى 225 ەكپىن تىركەلدى. اقتاۋ قالاسىنىڭ سۋمەن جابدىقتاۋ جەلىلەرىنىڭ توزۋ دەڭگەيى 82% قۇرايدى. ءبىز قالا تۇرعىندارىنىڭ سۋ تاپشىلىعىنا شاعىمداناتىنىن بىلەمىز. بۇل ماسەلەلەردى ءبىرىنشى كەزەكتە وبلىس اكىمدىگى شەشۋى كەرەك. ۇكىمەت تاراپىنان قولداۋ كورسەتىلىپ كەلەدى», دەپ اتاپ ءوتتى ولجاس بەكتەنوۆ. ونەركاسىپ جانە قۇرىلىس مينيسترلىگىنە اكىمدىككە كومەك كورسەتۋ تاپسىرىلدى.
سونداي-اق پرەزيدەنتتىڭ ءتۋريزمدى, ونىڭ ىشىندە «كەندىرلى» كۋرورتتىق ايماعىن دامىتۋ بويىنشا قويعان مىندەتىن ىسكە اسىرۋ بويىنشا جۇرگىزىلىپ جاتقان جۇمىستار بارىسى قارالدى. ماڭعىستاۋ وبلىسىن جاعاجاي ءتۋريزمىنىڭ حالىقارالىق ورتالىعى رەتىندە ۇزاقمەرزىمدى دامىتۋعا باعىتتالعان كەشەندى جوسپار شەڭبەرىندە 2030 جىلعا دەيىن جەكە ينۆەستيتسيالار تارتا وتىرىپ, جالپى سوماسى 165,1 ملرد تەڭگەنى قۇرايتىن 64 ءىس-شارا جوسپارلانعان. باسىم جوبالار قاتارىندا «جىلى جاعاجاي» جانە «كەندىرلى» كۋرورتتىق ايماقتارىن قۇرۋ. اتالعان شارالار تۋريستەر سانىن 1,3 ملن ادامعا دەيىن ارتتىرۋعا جانە ءوڭىردىڭ قوناق ءۇي ينفراقۇرىلىمىن كەڭەيتۋگە مۇمكىندىك بەرەدى. تۋريزم جانە سپورت مينيسترلىگىنە وبلىستاعى ءتۋريزمدى دامىتۋدىڭ ماستەر-جوسپارىن ازىرلەۋدە اكىمدىككە بارىنشا جاردەم كورسەتۋ تاپسىرىلدى.
