جاڭا تۇجىرىمداما تانىستىرىلدى

كەزدەسۋ بارىسىندا مەملە­كەتتىك قىزمەت ىستەرى اگەنتتىگى­نىڭ توراعاسى دارحان جازىقباي مەملەكەتتىك قىزمەتشىلەردىڭ قاجەتتى داعدىلارى مەن قۇزى­رەتتەرىن جەتىلدىرۋ ءۇشىن بارلىق جاعداي جاسالعانىنا توقتالىپ, مەملەكەتتىك قىزمەتكە كىرۋدى جەڭىلدەتۋ جانە كاسىبي مامانداردى تارتۋ ماقساتىندا ەنگىزىلگەن زاڭنامالىق باستامالاردى جۇزەگە اسىرۋدىڭ تيىمدىلىگى تۋرالى ايتتى. سونداي-اق ول مەملەكەتتىك قىزمەت­شىلەردىڭ قوعام الدىن­داعى جاۋاپكەرشىلىگىن جانە ادەپ­تىلىك مىنەز-ق ۇلىقتىڭ جوعارى ستاندارتتارىن ساقتاۋى, كوم­مۋنيكاتسيالىق داعدىلارىن ۇنەمى دامىتۋى ماڭىزدى ەكەنىنە ەرەكشە نازار اۋداردى.

– مەملەكەت باسشىسى قاسىم-جومارت توقاەۆ بيىلعى جول­داۋىندا «حالىق ۇنىنە قۇلاق اساتىن مەملەكەت» تۇجىرىمدا­ما­سىن ۇسىنعالى قوعام مەن بي­لىك قۇرىلىمدارى اراسىنداعى قارىم-قاتىناس مادەنيەتى وزگەر­گەنىن اتاپ ءوتتى. مەملەكەت پەن قوعام اراسىنداعى ديالوگتىڭ ساپاسىن ودان ءارى ارتتىرا ءتۇسۋ ءۇشىن ادال ءارى ءادىل بولۋىمىز, تەك زاڭ اياسىندا ارەكەت ەتۋىمىز, بەرگەن ۋادەمىز بەن ءىسىمىز ءۇشىن جاۋاپ بەرە ءبىلۋىمىز كەرەك ەكەنىن العا قويدى. بۇل ايتىلعان مىندەتتەر مەملەكەتتىك قىزمەتشىلەردىڭ رۋحاني-ادامگەرشىلىك الەۋەتىن جەتىلدىرۋدى جانە ادامي قۇندى­لىقتارعا باستايتىن «ادىلەتتى قازاقستان – ادال ازامات» يدەياسىن ولاردىڭ ساناسىنا ورنىقتىرۋدى تالاپ ەتەدى, – دەدى د.جازىقباي.

ءباسپاسوز تۋرى اياسىندا اگەنت­تىك وكىلدەرى مەملەكەتتىك قىز­مەت­تىڭ گيبريدتى مودەلى نەگى­زىن­دە مەملەكەتتىك اپپاراتتى كاسى­بي­لەندىرۋ, پەرسونالدى بەيىم­دەۋ, تۇراقتاندىرۋ جانە ىنتالان­دىرۋ نەگىزىندە HR-ۇدەرىس­تەر­دى جەتىلدىرۋ, سەرۆيستىك جانە ادام­عا باعدارلانۋ قاعيداتىن ىلگەرى­لەتۋگە باعىتتالعان جوسپار­لارىمەن ءبولىستى. بۇل شارالار مەملەكەتتىك قىزمەتتى دامىتۋدىڭ 2024–2029 جىلدارعا ارنالعان جاڭا تۇجىرىمداماسىندا جوس­پارلانىپتى.

بۇعان قوسا كەزدەسۋدە مەم­لە­كەتتىك قىزمەتكە ىرىكتەۋ جانە ونى وتكەرۋ, مەملەكەتتىك كورسەتى­­لە­تىن قىزمەتتەر ساپاسىن ارتتى­رۋ, مەملەكەتتىك اپپارات قىز­مە­تىن بيۋروكراتيادان ارىلتۋ سالا­سىنداعى نەگىزگى جەتىستىكتەرى اتاپ ءوتىلدى. كەيىن قاتىسۋشىلارعا مەم­لەكەتتىك قىزمەتكە ونلاين ىرىك­تەۋدى جۇرگىزۋگە مۇمكىندىك بەرەتىن «eQyzmet» سىرتقى پورتالىنىڭ جۇمىسى تانىستىرىلدى.

سونىمەن قاتار «جاڭا فور­ماتسيا باسشىسى» مەملەكەتتىك سايا­سي قىزمەتشىلەرگە ارنالعان كۋرس­تاردا وقۋدىڭ قالاي وت­كى­زىلەتى­نىن كوردى. جاڭا فورماتسيا باس­شىلارى ءۇشىن ادىلدىك, اشىق­تىق, مەملەكەتشىلدىك جانە حالىق­قا ادال قىزمەت ەتۋ قاعيداتتارىن ساقتاۋدىڭ ماڭىزىنا باسىمدىق بەرىلەدى.

باق جانە مەديا وكىلدەرى اگەنتتىك توراعاسىنا مەملەكەتتىك قىزمەتتى ودان ءارى دامىتۋعا قاتىستى سۇراقتار قويىپ, پىكىر-ۇسىنىستارىن ورتاعا سالدى. جيىن قورىتىندىسىندا د.جازىقباي مەملەكەت باسشىسىنىڭ «ادام مەملەكەت ءۇشىن ەمەس, مەملەكەت ادام ءۇشىن» قاعيداتىن ىسكە اسىرۋدا مەملەكەتتىك ورگانداردىڭ باق وكىلدەرى جانە ازامات­تىق قوعاممەن سىندارلى ديالوگ قۇرۋىنىڭ ماڭىزىن اتاپ ءوتىپ, قاتىسۋشىلاردى بەلسەندى ىنتىماقتاستىققا شاقىردى.