اپتا باسىندا اۋدان ورتالىعى كەگەن اۋىلىندا ۇلت قايراتكەرىنىڭ ەسىمى ۇلىقتالىپ, تاۋ تۇلعانىڭ ەڭسەلى ەسكەرتكىش-ءبيۋستى تۇعىرعا قوندى. بيىلعى وقۋ جىلىنىڭ باسىندا وسى اۋماقتا ورنالاسقان كەگەن اۋىلىنداعى بالالار ونەر مەكتەبىنە زامانبەك نۇرقادىلوۆتىڭ ەسىمى بەرىلگەن ەدى. ءوڭىردىڭ ونەرلى ۇلاندارىنىڭ قاناتىن قاتايتىپ, بۋىنىن بەكىتەتىن ساۋلەتتى عيمارات كۇردەلى جوندەۋدەن ءوتىپ, ەسىگىن ايقارا اشسا, ەندى, مىنە, جاس ۇرپاقتىڭ رۋحىن اسقاقتاتىپ, ەل مۇددەسىنە قىزمەت ەتەر پاتريوت بولىپ قالىپتاسۋىنا ىقپال ەتەتىن الىپ تۇلعانىڭ تاس ءمۇسىنى بوي كوتەردى. بۇل جاڭالىققا جيىلعان جۇرتتىڭ قاراسى قالىڭ بولدى. سالتاناتتى ءىس-شاراعا قوعام قايراتكەرلەرى, زيالى قاۋىم وكىلدەرى مەن وتباسى مۇشەلەرى قاتىسىپ, تاۋەلسىز ەلىمىزدىڭ دامۋىنا ولشەۋسىز ۇلەس قوسقان مەملەكەت قايراتكەرى زامانبەك نۇرقادىلوۆتىڭ ەرەن ەڭبەگى مەن دارا بولمىسى تۋرالى تولعاقتى اڭگىمەلەردىڭ تيەگىن اعىتتى.
الماتى وبلىسى اكىمىنىڭ ورىنباسارى نۇرجان قۇدايبەرگەنوۆ قايراتكەردىڭ ەل دامۋىنا قوسقان زور ۇلەسىن اتاپ ءوتىپ, ونىڭ ەڭبەگىنىڭ ۇلت تاريحىندا ماڭگى ساقتالاتىنىن جەتكىزدى.
«بۇل ەسكەرتكىش – حالقىمىزدىڭ قايراتكەرگە دەگەن شىنايى قۇرمەتىنىڭ بەلگىسى. ۇلت جاناشىرى رەتىندە زامانبەك نۇرقادىلوۆ ەل ەگەمەندىگىنىڭ نىعايۋىنا ەلەۋلى ۇلەس قوستى. وسىنداي تۇلعالاردىڭ ەڭبەگىن ۇرپاققا مۇرا ەتۋ – ورتاق پارىزىمىز. سونداي-اق بيىكتىگى 4,5 مەتر بولاتىن بۇل تۋىندىنىڭ اۆتورلارى ايدوس بۇركىتباەۆ پەن تيمۋر نۇرمۇحامەتوۆكە العىسىمىزدى بىلدىرەمىز», دەدى وبلىس اكىمىنىڭ ورىنباسارى.
ءوز كەزەگىندە قوعام قايراتكەرلەرى توققوجا ەستەنوۆ پەن بولات نۇرعازيەۆ قيىن-قىستاۋ شاقتا ەلدىڭ ەڭسە تىكتەۋىنە كۇش سالعان ساڭلاق ساياساتكەر زامانبەك نۇرقادىلوۆتىڭ الماتى قالاسىنىڭ اكىمى قىزمەتىن اتقارعان شاعىندا قالا جاعالاعان قازاق بالاسىنىڭ الىپ شاھاردا شاڭىراق كوتەرىپ, باسپانالى بولۋىنا جاساعان قامقورلىعى مەن ىسكەرلىگىن, ۇلتقا جاساعان جاقسىلىعىن جىپكە تىزگەندەي اتاپ ءوتتى.
ال ۇلى قايرات نۇرقادىلوۆ بولسا, اكەسىنىڭ ەسىمىن جاڭعىرتىپ, 80 جاس مەرەيتويىندا ەڭسەلى ەسكەرتكىش-ءبيۋستىڭ ورناتىلۋىن تىكەلەي تاپسىرعان مەملەكەت باسشىسىنا, قولداۋ بىلدىرگەن تۋىس-تۋعاندارى مەن بۇقاراعا ريزاشىلىعىن ءبىلدىردى.
«قاتال ۋاقىت پەندەسىن كوزدەن جاسىرعانمەن, ونىڭ قوعام يگىلىگىنە سىڭىرگەن ەڭبەگىن جاسىرىپ قالا المايدى. ونىڭ دالەلى بۇگىنگى ءبيۋستىڭ اشىلۋى – زامانبەك قالاباي ۇلىنىڭ تاريحتاعى تاۋسىلماس عۇمىرى, جىعىلماس تۇعىرى», دەدى قازاقستاننىڭ ەڭبەك سىڭىرگەن قايراتكەرى, تەاتر جانە كينو اكتەرى بەكجان تۇرىس.
زاڭعار تۇلعا ەسكەرتكىشىنىڭ اشىلۋ سالتاناتىندا جازۋشى, قوعام قايراتكەرى زەينەپ احمەتوۆا باستاپ, اۋىل اجەلەرى قوستاپ شاشۋ شاشتى. ءور مىنەزدى ۇلت پەرزەنتىنىڭ تاۋداي تۇلعاسىنا باس ءيىپ, تاعزىم ەتكەن قوناقتار مەن اۋدان جۇرتشىلىعى القىزىل گۇل شوقتارىن قويدى.
سالتاناتتى ءىس-شاراعا قاتىسقان قاۋىمعا زامانبەك نۇرقادىلوۆتىڭ ءومىرى مەن قىزمەتى تۋرالى «نە تولكو و سەبە» اتتى كىتاپتىڭ 300 داناسى تاراتىلدى. سونداي-اق قوعام قايراتكەرىنىڭ رۋحىنا باعىشتالىپ قۇران وقىلىپ, اس بەرىلدى.
الماتى وبلىسى,
كەگەن اۋدانى
