گاز قۇبىرى جارىلدى

بەلەس اۋىلى تۇسىنداعى جوعارى قىسىمداعى تۇربا جارىلىپ, سونىڭ سالدارىنان وسى ماڭداعى 16 ەلدى مەكەن گازسىز قالدى. كەشە تۇنگى ساعات ءۇشتىڭ شاما­سىندا زەلەنوۆ اۋدانى اۋما­عىن­­دا توتەنشە جاعداي ورىن ال­دى. وسى وڭىرگە قاراستى بەلەس اۋى­لى تۇسىندا «ورىنبور-نوۆوپسكوۆ» ماگيسترالدى گاز قۇ­بى­رى ورىن تەپكەن بولاتىن. سو­نىڭ 283-شاقىرىمىندا «ينتەرگازورتالىقازيا» اق-تىڭ تەڭگەرىمى بار. وسى ءيىرىمىن­دەگى  جوعا­رى قىسىمداعى تۇربا قۇبىرى جارىل­دى. بۇل قۇبىر جەر استىمەن ءجۇر­گىزىلگەن. سونىڭ سالدارىنان اتالعان ارالىق ءتۇن ىشىندە وتقا وراندى. قازىرگى كۇنى جارىلىستىڭ سالدارىنان ون التى ەلدى مەكەن گازسىز قالىپ وتىر. باتىس قازاقستان وبلىستىق ءتو­تەن­شە جاعدايلار جونىندەگى دە­پارتامەنتىنىڭ ءبولىم باسشىسى مارات وتاروۆتىڭ ايتۋىنشا وقيعا ورنىنا 45 ادام, 12 تەحنيكا جەتكىزىلگەن. وعان وبلىستىق ءىش­كى ىستەر دەپارتامەنتىنىڭ قۇرا­مى دا جۇ­مىلدىرىلعان. «ين­تەرگازورتالىقازيا» اق-تىڭ ورال ماگيسترالدى باسقار­ماسىنىڭ ماماندارى مەن ارنايى تەحنيكالارى دا گاز قۇبىرى جارىلعان جەردەن تابىلدى. «سەمسەر» ءورت ءسوندىرۋ جشس-ءنىڭ ۇجىمى دا الاۋدى سوندىرۋگە ءبىر كىسىدەي جۇمىلدى. كەشەگى كۇندىزگى ساعات 12.00-دەگى مالىمەت بويىنشا زەلەنوۆ اۋدانىندا 9 ەلدى مەكەن ۋاقىتشا گازسىز قالىپ وتىر. زەلەنوۆ اۋدانى بويىنشا 32 الەۋمەتتىك نىسان ۋاقىتشا تابيعي گاز بەرىلۋ تارتىبىنەن اجىراتىلعان. سونىڭ ىشىندە 11 مەكتەپ, 3 بالاباقشا, 14 مادەنيەت جانە دەنساۋلىق ساقتاۋ نىساندارىنىڭ بولۋى جارىلىستىڭ زاردابىنىڭ از ەمەس ەكەنىن كورسەتەدى. بۇگىنگى كۇنى گاز قۇبىرىنىڭ جارىلۋىنا بايلانىستى ارنايى كوميسسيا قۇرىلدى. ولار اپات­تىڭ ورىن الۋ سەبەپتەرىن انىق­تاۋعا كىرىستى. قازىر تۇتانعان ءورت سوندىرىلگەن. بۇدان كەيىنگى كەزەك­تە قايتا قالپىنا كەلتىرۋ جۇ­مىستارى جۇرگىزىلۋدە. ازىرگە بۇل تەحنوگەندىك سيپاتتا بولعان وقيعا دەگەن بولجام جاسالىپ وتىر. تەمىر قۇسايىن, «ەگەمەن قازاقستان». باتىس قازاقستان وبلىسى, زەلەنوۆ اۋدانى.