مامانداردىڭ ايتۋىنشا, ەلوردادا 35 شارشى مەترگە 625 ادامدى تىركەگەن «رەزەڭكە پاتەرلەر» انىقتالعان.
«استانادا ادامداردى تۇرعىلىقتى جانە ۋاقىتشا مەكەنجاي بويىنشا تىركەۋگە قاتىستى زاڭناماعا وزگەرىستەر ەنگىزۋ قاراستىرىلىپ جاتىر. ەگەر ول قابىلدانسا, وندا بۇدان بىلاي ءبىر ۇيگە جۇزدەگەن ازاماتتى ەسەپكە قويۋ مۇمكىن بولمايدى. مۇنداي تالاپ رەسپۋبليكالىق ماڭىزداعى وزگە دە قالالاردا قولدانىلماق. «بۇل تىركەۋ ءتارتىبىن رەتكە كەلتىرىپ, ءىرى شاھارلاردىڭ دامۋ جوسپارىن ناقتى ءتۇزۋ ءۇشىن قاجەت», دەيدى ماماندار.
جىل باسىنان بەرى استانادا ونداعان ازامات تىركەلگەن 35 پاتەر انىقتالعان. وسى زاڭسىزدىعى ءۇشىن ولاردىڭ يەلەرىنە سالىنعان ايىپپۇل كولەمى ميلليون تەڭگەدەن اسادى. ال 35 شارشى مەترلىك باسپاناسىنا 625 ادامدى تىركەگەن ەلوردالىق تۇرعىنعا قاتىستى قازىر قىلمىستىق ءىس ءجۇرىپ جاتىر.
ء«بىر پاتەردە تىركەلگەن ادام سانى 20-دان اسسا, ءبىز ونى «رەزەڭكە پاتەر» دەپ ەسەپتەيمىز. تەكسەرۋ بارىسىندا ءبىر پاتەردە 100 ادامعا دەيىن تىركەلگەن فاكتىلەر كەزدەستى. ولاردىڭ بارلىعىن اكىمشىلىك جاۋاپكەرشىلىككە تارتتىق. مەنشىك يەلەرىن حالىققا قىزمەت كورسەتۋ ورتالىقتارىنا اپارىپ نەمەسە وزدەرىنىڭ ەلەكتروندىق تسيفرلىق قولتاڭباسى ارقىلى تىركەۋدەن شىعاردىق. قازىرگى تاڭدا استانا قالاسى بويىنشا 8 رەزەڭكە پاتەر قالدى. ولاردا 623 ادامداي تىركەلىپ تۇر. قازىر وسى ماسەلە قر پارلامەنتى ءماجىلىسىنىڭ قاراۋىندا», دەيدى قالالىق پد كوشى-قون قىزمەتى باسقارماسى باستىعىنىڭ ورىنباسارى قاناي جۇمابەكوۆ.
كوپ ادامنىڭ ءبىر ۇيدە تىركەلۋ دەرەكتەرى ۇلكەن قالالاردا ءجيى انىقتالا باستاعان. سەبەبى تۇسىنىكتى دە. جۇمىس پەن تابىس كوزىن ىزدەگەن تۇرعىندار ءىرى شاھارلارعا اعىلادى. ءارى قولدانىستاعى زاڭدا ءبىر پاتەرگە ناقتى قانشا ادامدى تىركەۋگە بولاتىنى رەتتەلمەگەن. سوندىقتان بۇل رەتتە ءتارتىپتى قامتاماسىز ەتۋ ءۇشىن ءتيىستى زاڭناماعا وزگەرىستەر ەنگىزىلمەكشى.
«استانا قالاسى, الماتى, شىمكەنت قالالارىنا اۋىلدىق جەردەن كوشىپ كەلىپ جاتقان ازاماتتار بار. زاڭ بويىنشا ولار كەلگەننەن كەيىن قۇزىرلى ورگاندارعا بارىپ تىركەلۋگە مىندەتتى. سەبەبى كۇندەلىكتى تىرشىلىكتە بالاباقشا, مەكتەپ, ەمحانا سەكىلدى الەۋمەتتىك مەكەمەلەردىڭ قىزمەتىن پايدالانادى. سوندىقتان زاڭدى ورىنداۋ ءاربىر ازاماتتىڭ پارىزى», دەيدى قالالىق قوعامدىق كەڭەستىڭ مۇشەسى تولەگەن قۋانىشەۆ.
مامانداردىڭ ايتۋىنشا, ازاماتتاردى تۇرعىلىقتى جانە ۋاقىتشا مەكەنجاي بويىنشا تىركەۋ ماسەلەسىن رەتكە كەلتىرىپ, ناقتى ۇسىنىستار دايىنداۋ ءۇشىن بىرنەشە مينيسترلىك وكىلدەرى ات سالىساتىن بولادى. ءتىپتى بولاشاقتا ءتيىستى ەرەجەنى بەكىتۋ ءماسليحاتتاردىڭ دا قاراۋىنا بەرىلۋى مۇمكىن. استانا قالالىق ءماسليحاتىنىڭ دەپۋتاتى نۇرلان وتەشوۆ مۇنداي جاڭاشىلدىق بولا قالسا, ارىپتەستەرىمەن بىرگە تالقىلاۋعا دايىن. سەبەبى ەلوردادا ازاماتتاردى تىركەۋ ماسەلەسىن بىرىزدىلىككە ءتۇسىرۋ قاجەت دەپ سانايدى.
«كەيبىر 50 شارشى مەترلىك پاتەرگە جۇزدەگەن ادامدار تىركەلگەنى بەلگىلى بولىپ جاتىر. بۇل ماسەلەنى ءبىر ىزگە سالۋ كەرەك. ەڭ الدىمەن جەرگىلىكتى بيلىك ءوز جاعدايىنا قاراپ, ءوز ستاندارتتارىنا قاراي قابىلداۋى قاجەت», دەپ اتاپ ءوتتى استانا قالالىق ءماسليحاتىنىڭ دەپۋتاتى نۇرلان وتەشوۆ
ازاماتتاردى تۇرعىلىقتى جانە ۋاقىتشا مەكەنجاي بويىنشا تىركەۋگە قاتىستى زاڭناما ءالى تالقىلانۋ ۇستىندە. ناقتى قانداي وزگەرىستەر بولاتىنى الداعى ۋاقىتتا بەلگىلى بولماق. ءبىر انىعى, ۇيگە تىركەلگەن ءار ادامعا ناقتى اۋماق بەلگىلەنەدى. بىراق ول نورما وتباسى مۇشەلەرىنە قولدانىلمايدى. ال پاتەردە تۇرمايتىن ازاماتتاردى تىركەۋدەن شىعارماعانى ءۇشىن ءۇي يەسىنە سالىناتىن ايىپپۇل 2 ەسەگە وسپەكشى. قازىر ونىڭ كولەمى 10 ايلىق ەسەپتىك كورسەتكىشتى قۇرايدى.
