بىرلىك ءتۇبى – بىلىكتى ءىس

مينسك قالاسىندا تمد مەملەكەتتەرىندەگى سىبايلاس جەمقورلىققا قارسى ءىس-قيمىلدىڭ قۇقىقتىق جانە ۇيىمداستىرۋشىلىق قىزمەتىن ۇيلەستىرۋ بويىنشا سىبايلاس  جەمقورلىققا قارسى  مەملەكەتارالىق كەڭەستىڭ ءبىرىنشى وتىرىسى ءوتتى. وتىرىسقا تمد اتقارۋشى حاتشىسى س.لەبەدەۆ, رەسەيدىڭ باس پروكۋرورى يۋ.چايكا, بەلارۋس رەسپۋبليكاسىنىڭ باس پروكۋرورى ا.كونيۋك, قازاقستان رەسپۋبليكاسى مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى توراعاسىنىڭ ورىنباسارى ا.شپەكباەۆ, سونداي-اق, تمد اتقارۋشى كوميتەتىنىڭ وكىلدەرى قاتىستى. وندا جوعارىدا اتالعان كەڭەستىڭ باستى مىندەتتەرى ايقىندالدى. سونىڭ ىشىندە سىبايلاس جەمقورلىققا قارسى ءىس-قيمىل بويىنشا قىزمەتتى ۇيىمداستىرۋ, تمد قاتىسۋشى مەملەكەتتەرىمەن وسى سالاداعى مىندەتتەردى ىسكە اسىرۋدى سارالاۋ جانە ءار ەلدىڭ ۇلتتىق زاڭناماسىن ءوزارا ۇيلەستىرۋگە جاردەمدەسۋ, ءارى ىنتىماقتاستىقتىڭ قۇقىقتىق بازاسىن جەتىلدىرۋ بويىنشا ۇسىنىستاردى دايىنداۋ ايرىقشا نازارعا الىندى. سونىمەن قاتار, كەڭەستىڭ وكى­لەتتىگىنە ماماندار بىلىكتىلىگىن ارتتىرۋ, وسى ماقساتتارعا تمد ەلدەرىنىڭ نەگىزگى ۇيىمدارىن قۇرۋ, ءوزارا قىزىعۋشىلىقتى بىلدىرەتىن ماسەلەلەر بويىنشا بىرلەسكەن عىلىمي-زەرتتەۋ جۇمىستارىن جۇرگىزۋ كىرەدى. وتىرىستىڭ بارىسىندا مەم­لەكەتتىك قىزمەت ىستەرى جانە سى­باي­لاس جەمقورلىققا قارسى ءىس-قي­مىل اگەنتتىگىنىڭ توراعاسى قاي­رات قوجامجاروۆ سىبايلاس جەم­قورلىققا قارسى  مەملەكەتارالىق كەڭەستىڭ تەڭ توراعاسى, ال توراعاسى بولىپ بەلارۋس رەسپۋبليكاسىنىڭ باس پروكۋرورى ا.كونيۋك تاعاي­­ىن­­دالدى. وسىلايشا, سىباي­لاس جەمقورلىققا قارسى  مەملە­كەت­ارالىق كەڭەس تۋرالى ەرەجە بەكىتىلىپ, كەڭەستىڭ حاتشىلىعى تاعاي­ىندالدى. سىبايلاس جەمقورلىققا قارسى ءىس-قيمىل جونىندەگى كەڭەستىڭ كەلىسىمىنە ارمەنيا, بەلارۋس, قازاق­ستان, قىرعىزستان, رەسەي جانە تاجىكستان قول قويدى. ال كەلەسى وتىرىس استانا قالا­سىندا 2015 جىلدىڭ 4-توقسانىندا وتكىزىلەدى, دەپ حابارلادى مەم­لە­كەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءباسپاسوز قىزمەتى.