ەگىن جيناۋدا وبلىستاعى ءداندى داقىلداردىڭ جالپى الاڭى 169,2 مىڭ گەكتاردى قۇراسا, مايلى داقىلدار 23,7 مىڭ گەكتارعا ەگىلدى. سونداي-اق 10,4 مىڭ گەكتار كارتوپ, 15,5 مىڭ گەكتار كوكونىس, 1,8 مىڭ گەكتار باقشا داقىلدارى, 0,2 مىڭ گەكتار قانت قىزىلشاسى جانە 198,4 مىڭ گەكتار ازىقتىق داقىلدار قامباعا ءتۇستى.
جۇگەرى ەگىلگەن الاڭ 50,4 مىڭ گەكتاردى قۇرايدى, وتكەن جىلمەن سالىستىرعاندا بۇل كورسەتكىش 4,3 مىڭ گەكتار ازايعان. قازىرگى ۋاقىتتا 36 مىڭ گەكتار (71,3%) جۇگەرى جينالىپ, ونىمدىلىك گەكتارىنا ورتاشا 70,6 تسەنتنەردى قۇرادى. بۇل كورسەتكىش بويىنشا جالپى 254,9 مىڭ توننا جۇگەرى جينالدى, ال جالپى جينالعان ءونىم كولەمى 378 مىڭ توننادان اسادى دەگەن جوسپار بار.
الماتى وبلىسىندا جىل سايىن جينالعان جۇگەرى مەن باسقا دا داقىلداردى قابىلداپ, وڭدەۋمەن 3 كاسىپورىن, اتاپ ايتساق, پانفيلوۆ اۋدانىنداعى «جاركەنت كراحمال-پاتوكا زاۋىتى» جشس, قاراساي اۋدانىنداعى «ازيااگروفۋد» اق جانە جامبىل اۋدانىنداعى «كوك تەڭىز» جشس اينالىسادى.
قازىر «ازيااگروفۋد» اق زاۋىتى 25 مىڭ توننا جۇگەرى قابىلدادى, ورتاشا باعاسى 50 مىڭ تەڭگە كولەمىندە. «كوك تەڭىز» جشس 62-65 تەڭگەدەن 5 مىڭ توننا جۇگەرى قابىلداعان, ال جەلتوقسان ايىنىڭ ورتاسىنا دەيىن تاعى 15 مىڭ توننا جۇگەرى قابىلداۋدى جوسپارلاپ وتىر. وبلىستا قۇس فابريكالارى كيلوگرامىنا 74 تەڭگەدەن 800 توننا جۇگەرى ساتىپ الدى.
الماتى وبلىسىندا ءداندى داقىلداردى ساقتاۋ, كەپتىرۋ جانە قابىلداۋ جۇمىستارىن اتقاراتىن 3 ليتسەنزيالانعان كاسىپورىن بار. ولار – «بايسەركە اگرو» جشس, «Agro-food» جشس جانە «بالتاباي ءدان» جشس. سونىمەن قاتار ەڭبەكشىقازاق اۋدانىنداعى «نانيەۆ ك.ي», «بۋدان», «حايداروۆ» شق, جامبىل اۋدانىنداعى «ولجاس», «شكاەۆ» شق استىق كەپتىرۋمەن اينالىسادى.
بيىل الماتى وبلىسى كارتوپ پەن كوكونىس ونىمدەرىندە دە كوڭىل توعايتارلىق ناتيجە كورسەتتى. وسى جىلى 741 مىڭ توننا كارتوپ جانە كوكونىس-باقشا ءونىمى جينالدى. بۇل وبلىستىڭ ىشكى نارىعىن تولىقتاي قامتاماسىز ەتۋ ءۇشىن جەتكىلىكتى. كارتوپتىڭ ورتاشا باعاسى – 213 تەڭگە, پياز – 146 تەڭگە, ءسابىز 163 تەڭگەدەن باعالانعان. پياز ءونىمىنىڭ كولەمى ىشكى نارىقتىڭ قاجەتتىلىگىنەن ەكى ەسە ارتىق. قازىرگى كەزدە وبلىس 50,6 مىڭ توننا پياز جينادى, ونىڭ 24,4 مىڭ تونناسى ىشكى تۇتىنۋعا, 8,1 مىڭ تونناسى ماۋسىمارالىق كەزەڭگە ساقتالعان. وبلىستا پيازدى ساقتاۋ ءۇشىن 29 كوكونىس قويماسى ىسكە قوسىلعان, ولاردىڭ جالپى ساقتاۋ سىيىمدىلىعى 57,2 مىڭ تونناعا تەڭ. سونىمەن قاتار شارۋاشىلىقتار پيازدى ۋاقىتىلى وتكىزۋ ءۇشىن ءىرى ساۋدا جەلىلەرىمەن, سۋپەرماركەتتەرمەن كەلىسىمشارتتار جاساسىپ جاتىر.
2024 جىلعا ارنالعان سۋ ۇنەمدەيتىن تەحنولوگيالاردى ەنگىزۋ جوسپارى وبلىستا 42,6 مىڭ گەكتاردى قۇرايدى. بۇگىندە سۋ ۇنەمدەيتىن تەحنولوگيالارمەن قامتىلعان الاڭ 43,1 مىڭ گەكتاردى نەمەسە 101,3%-دى قۇرايدى, ونىڭ ىشىندە تامشىلاتىپ سۋارۋ – 18,4 مىڭ گەكتار, جاڭبىرلاتىپ سۋارۋ – 24,7 مىڭ گەكتار (جاڭا الاڭ 22,5 مىڭ گەكتار, ونىڭ ىشىندە تامشىلاتىپ سۋارۋ – 8,8 مىڭ گەكتار, جاڭبىرلاتىپ سۋارۋ – 13,7 مىڭ گەكتار).
سونىمەن قاتار وبلىستا سۋ ۇنەمدەيتىن تەحنولوگيالاردى ساتىپ الۋ مۇمكىندىگىن ارتتىرۋعا تامشىلاتىپ سۋارۋ جابدىقتارىن وندىرەتىن زاۋىت جۇمىس ىستەيدى. «جىبەك جولى» جشس باستاپقى كەزەڭدە سۋ ۇنەمدەيتىن تەحنولوگيالارعا 10 ميلليون دوللار ينۆەستيتسيالاۋدى جوسپارلاپ وتىر. كومپانيا تامشىلاتىپ سۋارۋ جۇيەسىنە ارنالعان قۇرامداس بولىكتەردى شىعارۋمەن اينالىسادى. وندىرىسكە بولىنگەن جەر ۋچاسكەسىنىڭ اۋماعى – 8 گەكتار.
وبلىستىڭ اگرارلىق سەكتورىندا ىشكى نارىقتى تۇراقتى تۇردە قامتاماسىز ەتۋگە ءتيىمدى لوگيستيكا مەن ساۋدا جەلىلەرىمەن بايلانىس ورناتۋ قاجەت. سونىمەن قاتار ەگىن جيناۋ جۇمىستارىنا قاجەتتى تەحنيكانىڭ ءتيىمدى پايدالانىلۋى, استىقتى ساقتاۋ ينفراقۇرىلىمىنىڭ دامۋى ەگىن شارۋاشىلىعىنىڭ تۇراقتى دامۋىنا ىقپال ەتەدى.
الماتى وبلىسى
