جۋىردا اۋماقتىق توتەنشە جاعدايلار باسقارماسىنىڭ قىزمەتكەرلەرى «QazaqGaz Aimaq» اق قاراعاندى وندىرىستىك فيليالى وكىلدەرىمەن بىرلەسىپ جەكە تۇرعىن ءۇي سەكتورلارىندا رەيدتىك ءىس-شارالار وتكىزدى. تەمىرتاۋ گاز شارۋاشىلىعىنا ارنايى ات باسىن بۇرعاندا الەكسەي گريششەنكو ەسىمدى ازاماتپەن تانىستىق. ول ءوزىن اپاتتىق جۇمىستار سلەسارىمىن دەپ تانىستىردى.
قازاقشاعا سۋداي گاز مامانىمەن اڭگىمەمىز جاراسا كەتتى. الەكسەي ءوزىنىڭ كۇندەلىكتى جۇمىسى قالا حالقىن اپاتسىز ءارى ءۇزىلىسسىز گازبەن قامتۋمەن بايلانىستى ەكەنىن ايتىپ, قىزمەت ۇدەرىسىن تۇسىندىرە باستادى. قالاعا گاز بەرۋدە قاتە قادام جاساۋعا بولمايتىنىن, وتە مۇقيات قاداعالاۋ كەرەك ەكەنىن قايتالاعان ول: ء«ار ءىستىڭ وزىندىك ەرەكشەلىگى بار. قاۋىپسىزدىك تەحنيكاسىن قاتاڭ ساقتاۋ جانە توتەنشە جاعدايلاردى بولدىرماۋ ۇلكەن جاۋاپكەرشىلىكتى تالاپ ەتەدى. سونىمەن قاتار كەيدە فيزيكالىق ءارى پسيحولوگيالىق توزىمدىلىك قاجەت بولادى», دەدى.
شىن مانىندە بۇتىندەي ءبىر قالانىڭ, ەلدى مەكەننىڭ تىنىشتىعى مەن قاۋىپسىزدىگىن قامتاماسىز ەتەتىن ۇلكەن قىزمەت شەبىندە جۇرگەن جۇمىسشى ماماندارىمىزدى ەلەپ-ەسكەرمەي جاتاتىنىمىز بار. ءبىز مۇنىڭ ءبارىن وزىنەن-ءوزى بولىپ جاتقانداي قابىلدايمىز. ال راسىندا گاز قاۋىپسىزدىگىن ساقتاۋدىڭ ارتىندا الەكسەي گريششەنكو سەكىلدى قاراپايىم مىڭداعان مامان تۇرعانى بەلگىلى. پرەزيدەنتىمىز قاسىم-جومارت توقاەۆتىڭ 2025 جىلدى «جۇمىسشى ماماندىقتار جىلى» دەپ جاريالاۋى وسىنداي كوزگە كورىنە بەرمەيتىن, الايدا وراسان زور جاۋاپكەرشىلىك ارقالاعان, سونداي-اق ءوز ءىسىن قالتقىسىز ورىنداپ جۇرگەن ءارى ونى ماقتان تۇتاتىن كاسىپ يەلەرىنىڭ مارتەبەسىن وسىرۋگە سەپتىگىن تيگىزەدى دەگەن سەنىم مول.
«حالىققا قىزمەت ەتۋ, ادامدارعا بارىمدى سالا كومەك كورسەتۋ, قاۋىپسىزدىك پەن جايلىلىقتى قامتاماسىز ەتۋ ماعان شابىت بەرەدى. ەگەر ومىردە تاعى ءبىر مۇمكىندىك بەرىلسە, گاز سالاسىن ودان ءارى تەرەڭدەتىپ وقىپ, ءدال وسى جۇمىسىما قايتا ورالاتىن ەدىم. بۇل ماماندىقتى تاڭداۋىما قىزىعۋشىلىعىم سەبەپشى بولدى. تەحنيكالىق سالانىڭ ماڭىزدى ءارى جاۋاپكەرشىلىگى جوعارى ەكەنىن جەتە ءتۇسىندىم ءارى وسى باعىتتا ارقاشان العا قاراي دامي بەرۋدى قالايمىن. جالپى, جۇمىسشى ماماندىعىنا قۇرمەت – كەز كەلگەن ەڭبەكتى باعالاۋ, ەڭبەكتىڭ ادام ومىرىندەگى ماڭىزىن ءتۇسىنۋ دەپ بىلەمىن. قانداي سالا بولسىن, ادامنىڭ قىزمەتىنە دەگەن ادالدىعىن تانۋ – ەڭ ماڭىزدى دۇنيە», دەيدى گاز مامانى.
كۇنى-ءتۇنى قىراعى كۇزەتتەگى, كەيدە ءوز ءومىرىن قاتەرگە تىگەتىن ا.گريششەنكو قاۋىپسىزدىك جايىنا كەڭىنەن توقتالدى.
«گاز پايدالانۋدا نەمقۇرايدىلىققا جول بەرۋ اۋىر زارداپتارعا, سونىڭ ىشىندە جارىلىستارعا, ۋلانۋعا, باسقا دا ومىرگە قاۋىپتى جاعدايعا اكەپ سوعادى. ءالى دە قاۋىپسىزدىك ماسەلەسىنە ساقتىقپەن قارامايتىن تۇرعىندارىمىز جەتەرلىك. ەسىمدە قالعان ءبىر وقيعا بار. گاز جۇيەسىندە اقاۋ بولىپ, تۇرعىن ۇيدە گازدىڭ اۋاعا تارالىپ جاتقانى تۋرالى اقپارات كەلىپ تۇسكەن ەدى. جاعداي وتە قاۋىپتى, جارىلىس بولۋى ابدەن مۇمكىن. ءبىز كوماندامەن جەدەل تۇردە وقيعا ورنىنا جەتىپ, ەڭ الدىمەن, تۇرعىنداردى قاۋىپسىز جەرگە شىعاردىق. كوپ كىدىرۋگە بولمايتىن. جاعداي جىلدام قيمىل مەن باتىل ارەكەتتى, جاۋاپكەرشىلىك پەن كاسىبيلىكتى قاجەت ەتتى. گازدىڭ قايدان تارالىپ جاتقانىن لەزدە انىقتاپ, جۇيەنى شاپشاڭ وشىردىك. بويىڭدى ۇرەي مەن ءۇمىت قاتار بيلەيتىن سونداي ساتتەر ءبىزدىڭ جۇمىستا از ەمەس. ارينە, ءار ءىستىڭ ءوز قيىندىعىمەن قاتار, جانعا جاعىمدى تۇستارى دا بار. سول كۇنگى تۇرعىنداردىڭ العىسىن ەستىگەندە ءوز قىزمەتىمنىڭ جاۋاپكەرشىلىگى مەن مارتەبەسىن انىق سەزىنىپ, مارقايىپ قالدىم», دەيدى سلەسار.
ۇلكەنگە قۇرمەت, كىشىگە ىزەت تانىتىپ, جاستارعا ەڭبەككە جاۋاپكەرشىلىكپەن قاراۋدى, كەز كەلگەن ءىستى ادال اتقارۋدى, ءوز ءىسىنىڭ كاسىبي مامانى بولۋعا ۇمتىلۋدى ۇيرەتۋدەن جالىقپايتىن ا.گريششەنكونى ادامي قاسيەتى ءۇشىن دە ۇجىمدا ارىپتەستەرى جوعارى قۇرمەتتەيدى.
«جۇمىس بارىسىندا تاجىريبەسى از جاستارعا قاۋىپسىزدىك شارالارىن ساقتاۋ مەن توپتىق جۇمىستىڭ ماڭىزىن تۇسىندىرەمىن. ءوز باسىم وسكەلەڭ ۇرپاققا, ولاردىڭ جارقىن بولاشاعىنا سەنەمىن», دەيدى ول.
اسىرەسە ول كوپشىل, كەڭپەيىل قاسيەتى قازاق باۋىرلاردان سىڭگەن دەپ ەسەپتەيدى. ويتكەنى ۇلتى ورىس بولسا دا, قازاق اۋىلىندا ءوسىپ, قازاقشا ءتىل سىندىرعاندىقتان, دۇنيەتانىمى مەن كوزقاراس-پايىمى دا قازاقي ەكەنىن ماقتان تۇتادى.
«مەملەكەتتىك تىلگە دەگەن قۇرمەتىم مەنى ۇلكەن ماقساتقا جەتەلەيدى. وسى ەلدە تۋىپ, ءومىر ءسۇرىپ جاتقاندىقتان جەرگىلىكتى حالىقتىڭ ءتىلىن ءبىلىپ, ءداستۇرىن سىيلاۋ – قاراپايىم عانا ءومىر زاڭى. ءيا, قازاقي ورتادا وسكەنىم مەنىڭ وي-ساناما اسەر ەتتى. قوناقجايلىلىق, ۇلكەندەردى قۇرمەتتەۋ, باۋىرمالدىق سياقتى قۇندىلىقتاردى بالا كەزدەن بويىما ءسىڭىردىم. وتباسىمىزدا دومبىرا شەرتەتىندەر بار, ال قازاقشا ءان ايتۋدى ءبارىمىز جاقسى كورەمىز. قازاق حالقىنىڭ كەڭپەيىلدىلىگى مەن دارقان كوڭىلى – ۇلگى الارلىق قاسيەت. سوندىقتان دا ەلىمىزدىڭ كوپۇلتتى مەملەكەت بولۋى – ىنتىماق پەن تاتۋلىقتىڭ ايقىن كورىنىسى دەپ بىلەمىن», دەپ اعىنان جارىلدى.
