بۇعان قازاقستان حالقى اسسامبلەياسى توراعاسىنىڭ ورىنباسارى – پرەزيدەنت اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى مارات ءازىلحانوۆ, شىمكەنت قالاسى اكىمىنىڭ ورىنباسارى سارسەن قۇرانبەك, دۇنيەجۇزىلىك احىسقا تۇرىكتەرى وداعىنىڭ پرەزيدەنتى زياتدين كاسانوۆ, تۇركيا رەسپۋبليكاسىنىڭ الماتى قالاسىنداعى باس كونسۋلى مۋدەرريسوگلى ەۆرەن, «شىمكەنت قالالىق «احىسقا» تۇرىك ەتنومادەني ورتالىعى» قوعامدىق بىرلەستىگىنىڭ توراعاسى, تۇركيا رەسپۋبليكاسىنىڭ قازاقستانداعى قۇرمەتتى كونسۋلى لاتيپشا اسانوۆتار قاتىستى.
ءىس-شارا بارىسىندا قوناقتار دوستىق ءۇيى الدىنداعى «قازاق ەلىنە مىڭ العىس» مونۋمەنتىنە گۇل شوقتارىن قويدى. سودان سوڭ احىسقا تۇرىكتەرى تۋرالى دەرەكتەر قامتىلعان اقپاراتتىق ستەندتەر مەن قولونەر كورمەسىن تاماشالادى. كەلۋشىلەر نازارىنا كسرو-نىڭ سولاقاي ساياساتىنان زارداپ شەككەن باۋىرلاس حالىق جايىندا ارنايى بەينەروليك ۇسىنىلدى.
قازاقستان حالقى اسسامبلەياسى حاتشىلىعىنىڭ مەڭگەرۋشىسى م.ءازىلحانوۆ ءسوز الىپ, تۋىس حالىقتىڭ قازاق ءۇشىن ەڭ جاقىن اعايىنىنا اينالعانىن ايتىپ بەردى.
«قازاقستانداعى ەتنوستار اراسىندا احىسقا تۇرىكتەرىنىڭ ورنى ەرەكشە. 80 جىل بويى قازاقتىڭ كيەلى جەرىندە ءومىر ءسۇرىپ, ورتاق قۇندىلىقتاردى بولىسە وتىرىپ, تاريحىمىزدى بىرگە جازىپ جاتىرمىز. وسى ۋاقىت ىشىندە ءبىز قيىندىق پەن قۋانىشتى ءبولىسىپ, دوستىعىمىزدى كۇشەيتە تۇستىك. 80 جىلدىق تاريح – باۋىرمالدىقتىڭ, توزىمدىلىك پەن ورتاق بولاشاققا دەگەن سەنىمنىڭ جارقىن بەلگىسى», دەدى ول.
ال شىمكەنت قالاسى اكىمىنىڭ ورىنباسارى سارسەن قۇرانبەك شاھار باسشىسى عابيت سىزدىقبەكوۆتىڭ ىقىلاسىن جەتكىزىپ, 1944 جىلى بولعان وقيعانى سانادا قايتا جاڭعىرتتى.
«العاش احىسقا تۇرىكتەرى قازاقستانعا قونىستانعاندا ەل باسىنا كۇن تۋعان, ەر ەتىگىمەن سۋ كەشكەن, ات اۋىزدىعىمەن سۋ ىشكەن قيىن-قىستاۋ زامان بولدى. ستاليندىك ساياسات كوپتەگەن ۇلت وكىلىن قازاقستانعا جەر اۋدارتتى. ارينە, ولار وركەندەسىن-ءوسسىن, كوگەرىپ-كوكتەسىن دەپ ويلاماعانى ايدان انىق. دەگەنمەن ءتۇبى ءبىر تۇركى جۇرتىنا قازاق حالقى شاما-شارقى كەلگەنشە قولۇشىن سوزدى. بارلىعى بىرلەسىپ, بۇگىنگى بەيبىتشىلىك زامانعا امان-ەسەن جەتتى. قازاقستاننىڭ دامۋىنا احىسقا تۇرىكتەرىنىڭ قوسقان ۇلەسى بار. ولار قازاق حالقىنا دەگەن ريزاشىلىعىن ءبىلدىردى. ءبىز دە وسىنشا جىل بىزبەن بىرگە بولعاندارىڭىزعا, ورتاق ەلىمىزدىڭ, مەملەكەتىمىزدىڭ گۇلدەنۋىنە, وركەندەۋىنە قوسقان سۇبەلى ۇلەستەرىڭىزگە العىس ايتامىز», دەدى قالا اكىمىنىڭ ورىنباسارى.
ءىس-شاراعا ارنايى كەلگەن قۇرمەتتى قوناقتار لەبىزىن ءبىلدىرىپ, جۇرتتىڭ ىستىق ىقىلاسىنا بولەندى. بىرقاتار بەلسەندى ازاماتقا قازاقستان حالقى اسسامبلەياسىنىڭ «العىس» توسبەلگىسى مەن شىمكەنت قالاسى اكىمىنىڭ العىسحاتى تابىستالدى. مەرەكەلىك ءىس-شارا كونتسەرتتىك قويىلىممەن جالعاسىن تاپتى.
بۇگىندە ەلىمىزدىڭ ءۇشىنشى مەگاپوليسى – شىمكەنت قالاسىندا 7 مىڭعا جۋىق تۇرىك ەتنوسىنىڭ وكىلى تۇرادى. قالالىق قازاقستان حالقى اسسامبلەياسى جانىنداعى «شىمكەنت قالالىق «احىسقا» تۇرىك ەتنومادەني ورتالىعى» قوعامدىق بىرلەستىگى قاشان دا يگى باستامالارعا قولداۋ ءبىلدىرىپ, قوعامدىق كەلىسىم مەن جالپىۇلتتىق بىرلىكتى نىعايتۋ جولىندا قىزمەت ەتىپ كەلەدى.
شىمكەنت
