قىزىلورداداعى نازارباەۆ زياتكەرلىك مەكتەبىنىڭ مۇعالىمى گۇلزات شىنتاسوۆا ءۇشىن بۇل جول وڭاي بولماعان. ول 2011 جىلى ۋنيۆەرسيتەتتى اياقتاعان سوڭ, ءبىلىمىن ماگيستراتۋرادا جالعاستىرىپ, 2013 جىلى جاڭادان اشىلعان مەكتەپتە پەداگوگ-ۇيىمداستىرۋشى-كۋراتور بولىپ قىزمەتكە ورنالاسقان. كەيىن ءوز ماماندىعى بويىنشا ساباق بەرۋگە كوشىپ, كاسىبي دەڭگەيىن ۇنەمى ارتتىرىپ وتىرعان.
گۇلزات بۋرابايقىزى — Bilim media group ۇيىمداستىرعان «جاڭاشىل ۇستاز – 2018» رەسپۋبليكالىق بايقاۋىنىڭ جەڭىمپازى, قىزىلوردا وبلىستىق «ورلەۋ» ورتالىعىنىڭ «پەداگوگيكالىق يدەيالار پانوراماسى» باقاۋىنىڭ ءى ورىن يەگەرى جانە تەرمين سوزدەردى قازاقشالاۋ بويىنشا رەسپۋبليكالىق بايقاۋدا باس جۇلدە جەڭىپ الدى. سونداي-اق ول «ادەبي ەسسە» ەلەكتيۆتى كۋرسىنىڭ اۆتورى, جالپى ءبىلىم بەرەتىن مەكتەپ مۇعالىمدەرىنە ارنالعان «ونلاين مەكتەپ» جوباسى تاپسىرمالارىن قۇراستىرۋشى, ءتىل ماسەلەسىنە قاتىستى ايماقتىق شارالاردىڭ تۇراقتى سپيكەرى, ء«تىل-قازىنا» ۇلتتىق عىلىمي-پراكتيكالىق ورتالىعىنىڭ لينگۆيست مامانى.
«قازاقستان مۇعالىمى بايقاۋىن 2019 جىلدان بەرى باقىلاپ ءجۇرمىن, بىراق بەس جىلدان كەيىن عانا ءوتىنىم بەرۋگە بەل بۋدىم. جەڭىس ءدامىن تاتقان ءساتىمدى, ساحنا تورىندەگى قۋانىش سەزىمىن سوزبەن ايتىپ جەتكىزە المايمىن. سول ساتتە بىرەسە قۋانىشتان جىلاپ, بىرەسە وزىممەن ماقتانىپ, ەندى بىردە قۇتتى مەكەنىمە اينالعان نازارباەۆ زياتكەرلىك مەكتەبىنە العىس ايتۋمەن بولدىم. مۇنداي بايقاۋلار ادامدى شىڭدايدى ەكەن. ءارى قاراي دۇرىس باعىتپەن جۇمىس جاساۋعا تالپىندىرادى. بيىككە شىعۋ بار, ونى قۇلاماي ۇستاپ تۇرۋ بار. وزىمە الداعى ۋاقىتتا شىڭداردى باعىندىرۋ عانا بۇيىرسىن دەپ تىلەدىم. الەم مۇعالىمى زەف حانىمنىڭ قولىنان ماراپات العانىمدى دا جاقسىلىققا جورىدىم. بالكىم, الەمدى باعىندىرۋ بۇيىرىپ قالار دەگەن ءۇمىت بار», دەيدى ول.
قوستانايداعى نازارباەۆ زياتكەرلىك مەكتەبى ينفورماتيكا ءپانىنىڭ مۇعالىمى الەكساندر شەرتسەر دە كاسىبيلىگىمەن تانىلعان. ول – «ictlab.kz» ءبىلىم پورتالىنىڭ نەگىزىن قالاۋشى ءارى «NIS Online» بىلىكتىلىكتى ارتتىرۋ كۋرستارىنىڭ بىرلەسكەن اۆتورى. ى.التىنسارين مەدالىنىڭ يەگەرى اتانعان مۇعالىم وقۋشىلاردىڭ ءبىلىمىن ارتتىرۋعا باعىتتالعان بىرقاتار تسيفرلىق پلاتفورما جاساپ, ەل يگىلىگىنە ۇسىنعان, اتاپ ايتساق, الەكساندر «قازاق تىلىندە سويلەۋدى تانۋ جانە سينتەزدەۋ ۆيرتۋالدى داۋىستىق اسسيستەنتى» مەن «Qazaq Oriented Language» باعدارلامالاۋ ءتىلىن جاساپ شىعارعان. سونداي-اق ول «جايلى مەكتەپ» جوباسىنىڭ پاندىك جۇمىس توبىن باسقارادى.
«التىن ۇيا مەكتەپتى اناعا تەڭەۋگە بولاتىن شىعار. ويتكەنى ەكەۋى دە – ءاربىرىمىزدىڭ جۇرەگىمىزگە جاقىن, جىلى سوزدەر. راسىندا, لەكسيكالىق جاعىنان ءارتۇرلى ماعىنا بەرگەنىمەن, ءبىر-بىرىمەن تىعىز بايلانىستى. وتباسى مەن مەكتەپ ارقاشان ءبىلىم مەن مادەنيەتتى بايىتاتىن ورتا دەۋگە بولادى», دەيدى ا.شەرتسەر.
ال تاراز قالاسىنداعى نازارباەۆ زياتكەرلىك مەكتەبى فيزيكا ءپانىنىڭ مۇعالىمى ميرلان جۋسامباەۆ – «TikTok»-تا عىلىمدى ناسيحاتتاپ جۇرگەن بەلسەندى ۇستاز. ول بىلتىر «جىلدىڭ ۇزدىك مۇعالىمى» اتانىپ, CLIL ادىسناماسىمەن اعىلشىن ءتىلىن جاراتىلىستانۋ-عىلىمي پاندەرمەن ينتەگراتسيالاۋ سالاسىندا زەرتتەۋلەر جۇرگىزىپ كەلەدى. ونىڭ عىلىمي ەڭبەكتەرى يتاليادا جانە ارمەنيادا وتكەن حالىقارالىق كونفەرەنتسيالاردا جوعارى باعالانعان. ءبىلىم سالاسىنداعى زەرتتەۋشىلەر قاۋىمداستىعىنىڭ مۇشەسى رەتىندە ول جاراتىلىستانۋ عىلىمدارىن كوپشىلىككە قولجەتىمدى ءارى قىزىقتى ەتۋگە ەرەكشە كوڭىل بولەدى.
«قازاقستان مۇعالىمى» ۇلتتىق سىيلىعى – ەلىمىزدىڭ بارلىق مۇعالىمى ءۇشىن وتە ماڭىزدى جوبا. بايقاۋدىڭ ارقاسىندا بىلىمىمىزبەن عانا شەكتەلىپ قالماي, جان-جاقتى ىزدەنەمىز. ويتكەنى مۇعالىم ۇنەمى دامىپ وتىرۋى كەرەك», دەپ اتاپ ءوتتى م. جۋسامباەۆ.
ءۇش ۇستازدىڭ ارقايسىسى ءوز سالاسىندا ءتۇرلى جەتىستىككە جەتكەن. ولار ەلىمىزدىڭ پەداگوگيكالىق الەۋەتىن الەمگە تانىتۋعا دايىنبىز دەيدى. سوندىقتان NIS مۇعالىمدەرىنىڭ «Global Teacher Prize» بايقاۋىندا ەلىمىزدىڭ ابىرويىن اسقاقتاتادى دەگەن سەنىم مول.
