بۇل مەدال – الىشەردىڭ جازدا جاساعان باتىل ارەكەتىنىڭ باعاسى. 9 ماۋسىم كۇنى ساعات تۇنگى ون بىرلەر شاماسىندا قالاداعى جاعاجايدا سەرۋەندەپ جۇرگەن ەفرەيتور سۋعا باتىپ بارا جاتقان ايەلدى بايقاپ قالادى. ويلانباستان, دەرەۋ كومەككە جۇگىرەدى. وقيعا كۋاگەرلەرى جەدەل جاردەم شاقىرىپ جاتقاندا اسكەري قىزمەتشى سۋعا كۇمپ بەرىپ, ايەل باتىپ بارا جاتقان جەرگە جىلدام ءجۇزىپ جەتەدى. ايەلدى بىردەن جاعاعا شىعارىپ, تىنىس الۋىن جەڭىلدەتەتىن, ءومىرىن ساقتاپ قالۋعا كومەكتەسەتىن العاشقى رەانيماتسيالىق ءىس-شارالاردى دا جاساپ ۇلگەرەدى. ەسسىز جاتقان ايەلدىڭ كىشكەنتاي ۇلى دا سول جەردە ەدى. ول اناسىنىڭ اۋىر حالدە جاتقانىن كورىپ, ءوز-وزىنە كەلە الماي جىلاي باستايدى. اناسىنا العاشقى كومەك كورسەتكەنىنە كوز جەتكىزگەن الىشەر بالاسىن دا پوليتسيا مەن جەدەل جاردەم كەلگەنگە دەيىن تىنىشتاندىرعان.
– بۇگىن ءبىز ەفرەيتور الىشەر اسىلبەكوۆكە قۇرمەت كورسەتىپ جاتىرمىز. ول ناعىز باتىلدىق پەن جانقيارلىق تانىتىپ, قىزمەتتەن تىس ۋاقىتتا جازاتايىم وقيعانىڭ الدىن الدى. ونىڭ ارەكەتى بارشامىز ءۇشىن ۇلگى جانە ءىىم ۇلتتىق ۇلانى اسكەري قىزمەتشىلەرىنىڭ كەز كەلگەن جاعدايدا ادامداردى قورعاۋعا دايىن ەكەنىن كورسەتەدى, – دەدى 5514 اسكەري ءبولىمىنىڭ كومانديرى ءا.مانسۇروۆ.
ەفرەيتور ۇلتتىق ۇلان قاتارىندا 2022 جىلدىڭ مامىر ايىنان باستاپ قىزمەت ەتىپ كەلەدى. وسى ۋاقىت ىشىندە ءوزىن جاۋاپتى ءارى ادال جاۋىنگەر رەتىندە كورسەتكەن ول وقىس وقيعاداعى ءوزىنىڭ ءرولىن باتىرلىق ەمەس, نەگىزگى مىندەتى دەپ سانايتىنىن ايتادى.
– مەنىڭ ورنىمدا كىم بولسا دا ءدال وسىلاي ىستەيتىن ەدى دەپ ويلايمىن. كورىپ تۇرىپ ارەكەت ەتپەۋ – مۇمكىن ەمەس. تۇنگى ۋاقىت, جارىقتىڭ السىزدىگى مەن اعىستىڭ قاتتىلىعى جاعدايدى ءبىراز قيىنداتتى, بىراق ونى دەر كەزىندە جاعاعا شىعارىپ ۇلگەردىم. سۋ ادامنىڭ كۇشىن تەز الادى, سوندىقتان تەز ارەكەت ەتۋ كەرەك بولاتىنىن جاقسى ءتۇسىندىم. قاۋىپسىز جەرگە شىققاسىن دا وعان العاشقى مەديتسينالىق كومەك كورسەتە الدىم. سول ساتتەگى بار ويىم, ايەلدى تەك امان الىپ قالۋ عانا ەدى, – دەيدى ول.
ۇلتتىق ۇلان قىزمەتىنىڭ اجىراماس بولىگىنە اينالعان ادالدىق پەن قايسارلىقتى كورسەتكەن سەرتىنە بەرىك ساربازعا سەرىكتەستەرى دە ءدان ريزا. سەبەبى الىشەردىڭ ارەكەتى – اسكەردەگى ارىپتەستەرىنە عانا ەمەس, وزگەلەرگە دە ۇلگى-ونەگە.
